ប្រជាពលរដ្ឋខ្មែរកំពុងតែជីករណ្តៅកប់ខ្លួនឯង ?

Boeung Kak Lake protest

ទស្សនសារព៍មាន ថ្ងៃទី១២ ខែឧសភា ឆ្នាំ២០១២ ដោយ: ឆាំ ឆានី http://www.kmn-radio.com/

តំណត់ទឹកភ្នែក សម្រែកទាមទារយុត្តិធម៍របស់ប្រជាពលរដ្ឋរងគ្រោះ ដោយការរំលោភដីធ្លី ផ្ទះសម្បែង និងការសម្លាប់ក្រៅរង្វង់ច្បាប់ នៅមិនទាន់រសាត់ឆ្ងាយពីអារម្ភណ៍របស់យើងទាំងអស់គ្នាផង ។ ស្រាប់តែវិទ្យាស្ថានសាធារណរដ្ឋអន្ដរជាតិ (IRI) ដែលមានមូលដ្ឋាន នៅសហរដ្ឋអាមេរិក បានបញ្ចេញនូវលទ្ធផលនៃការស្ទង់មតិកាលពីព្រឹកថ្ងៃទី១០ ខែឧសភា ឆ្នាំ២០១២ បន្ទាប់ពីបានដំណើរការស្ទាប ស្ទង់មតិចាប់ពីថ្ងៃទី៣០ ខែវិច្ឆិកា ដល់ថ្ងៃទី២៥ ខែធ្នូ ឆ្នាំ២០១១ ដោយមជ្ឈមណ្ឌលសម្រាប់ការស្រាវជ្រាវជាន់ខ្ពស់​ដែលមានមូលដ្ឋាន នៅរាជធានីភ្នំពេញបង្ហាញថា ក្នុងចំណោមប្រជាពលរដ្ឋកម្ពុជា២០០០នាក់ គឺមាន៨១ភាគរយ ដែលបានឆ្លើយថាកម្ពុជាដើរលើផ្លូវត្រូវ។

លទ្ឋផលនៃការស្ទង់មតិនេះបើយើងក្រឡេកមើលមួយភ្លែត ហាក់ដូចជាប្រទេសកម្ពុជា ក្រោមការដឹកនាំរបស់លោក ហ៊ុន សែន ជាប្រទេសដែលប្រជាពលរដ្ឋរស់នៅប្រកបទៅដោយភាពសុខសាន្តគ្មានបញ្ហាអ្វីកើតឡើងនោះឡើយ ។ ផ្ទុយទៅវិញ បើក្រឡេកមើល ពីភាពជាក់ស្តែងក្នុងសង្គមបច្ចុប្បន្ននេះ តាមរបាយការណ៍នៃការឃ្លាំមើលពីការរំលោភសិទ្ខិនមុស្ស ដែលផ្សាយចេញដោយ អង្គការ សម្ពន្ឋ័ជំរឿនខ្មែរដើ្បម្បីសិទ្ឋិមនុស្ស (LICADO) ពេលថ្មីៗនេះបានឲ្យដឹងថា ចាប់ពីឆ្នាំ២០០៧ មកដល់បច្ចុប្បន្ននេះ រដ្ឋាភិបាលលោក ហ៊ុន សែន បានបណ្តេញប្រជាពលរដ្ឋស្លូត្រង់ឲ្យចាកចេញពីផ្ទះសម្បែងជាង ១លាននាក់ ។ ក្នុងនោះមានប្រជាពលរដ្ឋនៅតំបន់បឹងកក់ ចំនួន៤២៥២ គ្រួសារ បូរីកីឡា ចំនួន ១៧៧៦ គ្រួសារ និងតំបន់ដីក្រហម ជាង១ពាន់គ្រួសារ ព្រមទាំងប្រជាពលរដ្ឋរស់នៅតាមបណ្តាខេត្តមួយចំនួនទៀតដូចជា កំពង់ស្ពឺ កោះកុង កណ្តាល កំពង់ធំ កំពត ក្រចេះ កំពង់ចាម រតនគីរី មណ្ឌលគីរី ស្ទឹងត្រែង បាត់ដំបង ពោធិសាត់ បន្ទាយមានជ័យ និងខេត្តព្រះវិហារ ជាដើម ។

ការបណ្តេញប្រជាពលរដ្ឋឲ្យចាកចេញពីលំនៅឋាននេះ រដ្ឋាភិបាលបានប្រើប្រាស់កម្លាំងអាជ្ញាធរមានសមត្ថកិច្ចប៉ូលីស ប៉េអឹម កងរាជអាវុធហត្ថ និងស្ថាប័នតុលាការ ជាដើម ទៅគំរាម បង្រ្កាប និងចាប់តំណាងប្រជាពលរដ្ឋដាក់ពន្ឋនាគារ រួចហើយប្លន់យក ដីធ្លីពីប្រជាពលរដ្ឋទៅប្រគល់ឲ្យក្រុមហ៊ុន ដែលជាសែស្រឡាយអ្នកមានអំណាច​ ដូចជានាយរដ្ឋមន្ត្រីជាដើម ក្រោមឡេសការអភិវឌ្ឍន៍ ដោយអយុត្តិធម៍បំផុត។

ដោយផ្អែកលើរបាយការណ៍របស់អង្គការ(LICADO) និងការស្ទង់មតិរបស់(IRI) នៅពេលនេះ យើងអាចនិយាយបានថា ការស្ទង់មតិរបស់(IRI) មិនអាចឆ្លុះបញ្ចាំងពីការពិតនៅកម្ពុជានាពេលបច្ចុប្បន្នបានឡើយ ព្រោះលទ្ឋផលដែល​ថាកម្ពុជាដើរ លើផ្លូវត្រូវ នោះ បានន័យថាប្រជាពលរដ្ឋកម្ពុជាកំពុងតែជីករណ្តៅកប់ខ្លួនឯង ។ តែការពិតប្រជាពលរដ្ឋកម្ពុជា មិនបានជីករណ្តៅ កប់ខ្លួនឯងនោះ ឡើយ ដោយហេតុថា សិទ្ឋិសេរីភាពនៃការបញ្ចេញមតិនៅក្នុងប្រទេសកម្ពុជា មិនត្រូវបានទទួលនូវការការពារឲ្យមានការជឿទុកចិត្ត បាន ដែលជាហេតុធ្វើឲ្យប្រជាពលរដ្ឋមិនហ៊ាននិយាយការពិត ។ តែអ្វីដែលប្រជាពលរដ្ឋអាចធ្វើបាន គឺការបង្ខំចិត្តទាំងភ័យខ្លាច ក្នុងការតស៊ូមតិដោយសន្តិវីធី តាមរយះធ្វើបាតុកម្មអហឹង្សាដើម្បីទាមទារយុត្តិធម៍ និងការពារផលប្រយោជន៍ជូនប្រទេសជាតិ ។

ជាក់ស្តែងនៅថ្ងៃទីទី១២ ខែឧសភា ឆ្នាំ២០១២ នេះ បើតាមពត៍មានពីខេត្តក្រចេះបានឲ្យដឹងថា ប្រជាពលរដ្ឋ ៨០០០គ្រួសារ មកពីឃុំ ព្រែកសាម៉ាន ឃុំដំរីផុង និងឃុំជម្ពូរ ស្ថិតក្នុងស្រុកឆ្លូង និងប្រជាពលរដ្ឋមកពីឃុំព្រែកចារ្យ ឃុំស្វាយច្រេះ ឃុំខ្សឹម និងឃុំពីរធ្នូ ស្ថិតក្នុងស្រុកស្នួល បាននាំគ្នាធ្វើការតវ៉ាដោយបិទផ្លូវដើម្បីទាទារឲ្យ គណះកម្មាធិការអន្តរក្រសួង ដែលបង្កើតឡើងដោយរដ្ឋាភិបាល ធ្វើបណ្ណ័កំណត់ព្រំប្រទល់ដី ឲ្យមានតម្លាភាព ព្រោះតែគណះកម្មាធិការនេះបានឆ្លៀតឱកាសយកតួនាទីទៅធ្វើការសំរាប់តែបក្សពួកខ្លួន និងកេងចំណេញផ្នែកនយោបាយ ។

ចំណែកប្រជាពលរដ្ឋនៅឯខេត្តកោះកុងវិញនៅថ្ងៃទីទី១២ ខែឧសភា ឆ្នាំ២០១២ នេះក៏បានជួបជុំគ្នាចំនួនជាង៧០០នាក់ នៅភូមិជីខលើ ឃុំជីខលើ ស្រុកកំពង់សិលា ខេត្តកោះកុង ធ្វើការតវ៉ាដោយបិទផ្លូវ ដើម្បីទាមទារឲ្យរដ្ឋាភិបាលដោះស្រាយរឿងជម្លោះដីធ្លីដ៏រ៉ាំរ៉ៃ រវាងប្រជាពលរដ្ឋនិងក្រុមហ៊ុន ស៊ូគ័រភ្នំពេញ ដែលមានលោក លីយ៉ុងផាត់ ជាសមាជិកព្រិទ្ឋិសភាមកពីគណបក្សប្រជាជនកម្ពុជា ជាប្រធាន បានទៅរំលោភយកដីស្រែចំការរបស់ពួកគាត់យ៉ាងអយុត្តិធម៍ ។