 |
|
ក្រុមទាហានប្រដាប់អាវុធ ដែលត្រូវបានគេដាក់ពង្រាយកំពុងចម្អិន
អាហារ កាលពីថ្ងៃព្រហស្បតិ៍។ រូបថត ហេង ជីវ័ន
|
Monday, 21 May 2012
ក្រចេះ: តុលាការខេត្តក្រចេះ បានសម្រេចឃុំខ្លួនអ្នកភូមិ
៨ នាក់ ជាបណ្ដោះអាសន្ន នៅក្នុងពន្ធនាគារខេត្ត
ដើម្បីធ្វើការសាកសួរបន្ថែមទៀត ទាក់ទិនទៅនឹងអ្វី
ដែលអាជ្ញាធររបស់រដ្ឋាភិបាល បានចោទដ៏ចម្រូងចម្រាសថា
អ្នកភូមិដែលមានជម្លោះដីធ្លីដ៏រ៉ាំរ៉ៃ ជាមួយក្រុមហ៊ុនមួយនេះ ជាប់ពាក់ព័ន្ធនឹងការបង្កើតតំបន់អបគមន៍ខុសច្បាប់ នៅក្នុងភូមិប្រមា ឃុំកំពង់ដំរី ស្រុកឆ្លូង។
ការឃុំខ្លួនទាំងនេះ បានធ្វើឡើង ខណៈពេលពលរដ្ឋមួយចំនួន ដែលបានរត់ចេញពីតំបន់ កំពុងត្រូវបានឡោមព័ទ្ធដោយក្រុមកម្លាំងប្រដាប់អាវុធរាប់រយនាក់ ដើម្បីសែ្វងរកការជួយអន្តរាគមន៍ ពីសំណាក់អង្គការក្រៅរដ្ឋាភិបាល ដើម្បីឲ្យពួកគេមានសិទ្ធិចូលទៅរស់នៅក្នុងភូមិរបស់ពួកគេវិញ។
លោក នង ធុចបញ្ចៈសន្តិភាព ព្រះរាជអាជ្ញារងខេត្តក្រចេះ បានថ្លែងឲ្យដឹងថា អ្នកភូមិទាំង ៨ នាក់នោះ បានបញ្ជូនទៅចៅក្រមស៊ើបសួរអស់ហើយ ហើយបច្ចុប្បន្ននេះ បានឃុំខ្លួនបណ្តោះអាសន្ន នៅក្នុងពន្ធនាគារខេត្ត ដើម្បីរង់ចាំធ្វើការសាកសួរបន្ថែមទៀត។ លោកនិយាយថា៖ «ខ្ញុំមិនចាំថា ពួកគេត្រូវបានចោទពីបទអីខ្លះនោះទេ ពីព្រោះពួកគេ ត្រូវបានចោទពី ៤ ទៅ ៥ ករណី»។
លោក កេត សុជាតិចៅក្រមស៊ើបសួរតុលាការខេត្តក្រចេះ បានបដិសេធមិនធ្វើការអត្ថាធិប្បាយទេ ពីម្សិលមិញ ដោយថ្លែងថា កំពុងជាប់រវល់នៅទីក្រុងភ្នំពេញ និងថា លោកមិនបានដឹងរឿងនេះទេ។
ជនសង្ស័យ ដែលត្រូវបានឃុំខ្លួនបណ្តោះអាសន្ន នៅក្នុងពន្ធនាគារនោះ មានដូចជា លោកទូច រៀម អាយុ ៣៣ ឆ្នាំ លោកកាន់ សុវណ្ណ អាយុ ៥៤ ឆ្នាំ លោកពុំ វណ្ណៈ អាយុ ២៤ ឆ្នាំ លោកព័ន្ធ ស្រឿន អាយុ ៣២ ឆ្នាំ លោក ម៉ៅ វាសនា អាយុ ៣៣ ឆ្នាំ លោកហង្ស ផល អាយុ ៤៨ ឆ្នាំ លោក ហេង ធឿន អាយុ ៣១ ឆ្នាំ និងលោក សា រឿនរុំ អាយុ ២៤ ឆ្នាំ។
ចាប់តាំងពីថ្ងៃ ១៦ ខែ ឧសភា រហូតមកដល់ថ្ងៃ ២០ ខែឧសភា ម្សិលមិញ កម្លាំងសមត្ថកិច្ចចម្រុះប្រដាប់អាវុធរាប់រយនាក់ ដែលមានចងកន្សែងក្រហមសម្គាល់ ហាក់ដូចទៅប្រយុទ្ធជាមួយខ្មាំងសត្រូវ នៅក្នុងសមរភូមិនាសម័យសង្គ្រាម ជាអ្វីដែលត្រូវបានអាជ្ញាធរ ប្រើពាក្យថា ជាការចុះអនុវត្តវិធានការរដ្ឋបាល ទៅលើក្រុម អនាធិបតេយ្យ
ដែលបង្កើតតំបន់អបគមន៍នោះ នៅតែបន្តធ្វើការបិទផ្លូវ
ឆែកឆេរពលរដ្ឋ ដែលធ្វើដំណើរឆ្លងកាត់ចូលក្នុងភូមិ
និងចេញក្រៅភូមិ ហើយមិនអនុញ្ញាតឲ្យក្រុមអង្គការសង្គមស៊ីវិលចូលនៅក្នុងតំបន់នោះ ទេ។
នៅក្នុងប្រតិបត្តិការ ដែលចាប់ផ្តើមកាលពីថ្ងៃព្រហស្បតិ៍សប្តាហ៍មុន កម្លាំងទាហាន បានធ្វើការបាញ់រះ បណ្តាលឲ្យកុមារីអាយុ ១៤ ឆ្នាំម្នាក់ស្លាប់នៅក្នុងផ្ទះរបស់នាង។
លោក ម៉ៅ រ៉ាន្នី មេបញ្ជាការរងកងរាជអាវុធហត្ថខេត្តក្រចេះ បានឲ្យដឹងថា សមត្ថកិច្ច បានចែកចេញជាពីរផ្នែក គឺខាងប៉េអឹម ជាអ្នកចុះប្រតិបត្តិ និងចាប់ជនសង្ស័យ
ដែលចូលរួមបង្កើតតំបន់អបគមន៍
រីឯអ្នកបញ្ជូនសុំណុំរឿងទៅតុលាការវាជាការងាររបស់ប៉ូលិស។
បច្ចុប្បន្ននេះ ក្រុមការងារចម្រុះ
មិនទាន់បានធ្វើការងារចប់នោះទេ
គឺពួកគេកំពុងរៀបចំធ្វើរដ្ឋបាល នៅក្នុងតំបន់នោះឡើងវិញ។
លោកបន្តថា៖«បានជាតំបន់នោះ មានការយាមកាមយ៉ាងហ្មត់ចត់ ដោយសារតែយើងកំពុងតែស្វែងរកចាប់ខ្លួនមេខ្លោងរបស់ពួកគេ ដូច្នេះហើយតំបន់នោះ វាអសន្តិសុខខ្លាំងណាស់ តែពលរដ្ឋដែលរស់នៅក្នុងតំបន់នោះចេញចូលតាមធម្មតា»។
លោក តុង សុផល អាយុ ៣៥ ឆ្នាំ កូនប្រុសរបស់លោក សុខ តុង ដែលអាជ្ញាធរកំពុងស្វែងរកចាប់ខ្លួន បានថ្លែងឲ្យដឹងថា លោកបានសម្រេចចិត្តរត់ចេញពីភូមិ ដោយសារតែអាជ្ញាធរ បានគំរាមថា នឹងចាប់មនុស្សចំនួន ១៦ នាក់ផ្សេងទៀត ហើយបច្ចុប្បន្ន
នេះ ខាងកម្លាំងទាំងអស់នោះ បានកាន់រូបថតប្រជាពលរដ្ឋ
ដើម្បីផ្ទៀងមើលមុខពលរដ្ឋ ដែលចេញមកក្រៅភូមិ។ លោកបន្តថា ៖
«ខ្ញុំសុំអំពាវនាវឲ្យរដ្ឋាភិបាល ក៏ដូចជាអង្គការក្រៅរដ្ឋាភិបាល ជួយអន្តរាគមន៍ឲ្យពួកខ្ញុំចូលដាំដំណាំវិញ បើមិនដូច្នោះទេ ពួកខ្ញុំ ច្បាស់ជាដាច់ពោះស្លាប់ជាមិនខាន»។
លោក ប៊ុន ថាវ អាយុ ២២ ឆ្នាំ ប្អូនប្រុសរបស់លោក ប៊ុន រដ្ឋា បានថ្លែងឲ្យដឹងថា គ្រួសាររបស់លោក កំពុងតែមានការព្រួយបារម្ភ
អំពីសុវត្ថិភាពឪពុករបស់លោក គឺលោក ប៊ុន ឆន
ពីព្រោះតាំងពីថ្ងៃដែលមានបញ្ហាមក គ្រួសាររបស់លោក
មិនបានទទួលដំណឹងថា គាត់នៅឯណានោះទេ។ លោកបន្ថែមថា ៖
«បងប្រុសរបស់ខ្ញុំ ប៊ុន រដ្ឋា
គាត់ស្នាក់នៅទីកន្លែងដែលមានសុវត្ថិភាពហើយ ហើយគាត់ អាចចេញធ្វើសន្និសីទកាសែត នៅភ្នំពេញ នៅថ្ងៃចន្ទ ឬក៏ថ្ងៃអង្គារដើម្បីបកស្រាយអំពីការចោទប្រកាន់ លើរូបគាត់ពីសំណាក់រដ្ឋាភិបាល។ គាត់មិនបានធ្វើដូចការចោទ នោះទេ?»។
ហេង ស្រីមុំ អាយុ ២៧ ឆ្នាំ ជាបងស្រីហេង ចន្ថា ដែលស្លាប់បានថ្លែងថា វាអយុត្តិធម៌
បំផុត សម្រាប់ប្អូនស្រីរបស់នាង ពីព្រោះនាង
មិនបានដឹងរឿងរ៉ាវអ្វីទាំងអស់ បែរជាត្រូវស្លាប់ទៅវិញ។
នាងថ្លែងថា៖«ពេលឮសំឡេងផ្ទុះគ្រាប់ ខ្ញុំហើយនិងប្អូនស្រី
បានក្រាបចុះនៅក្រោមផ្ទះទាំងអស់គ្នា
ស្រាប់តែប្អូនរបស់ខ្ញុំត្រូវគ្រាប់។
ខ្ញុំសូមអំពាវនាវដល់រដ្ឋាភិបាល មេត្តាជួយរកយុត្តិធម៌ឲ្យប្អូនស្រីខ្ញុំផង នាងមិនត្រូវស្លាប់ដូចសត្វធាតុនោះទេ»។
លោក ស ចំរ៉ុង ភិបាលខេត្តក្រចេះ បដិសេធមិនធ្វើអត្ថាធិប្បាយទេ កាលពីម្សិលមិញ ដោយប្រាប់ថា ជាប់រវល់។
លោក ចាន់ សូវ៉េត មន្ត្រីស៊ើបអង្កេតជាន់ខ្ពស់
សមាគមសិទ្ធិមនុស្សអាដហុក បានថ្លែងថា អង្គការរបស់លោក
នឹងផ្តល់មេធាវីការពារក្តី ដល់អ្នកភូមិទាំង ៨ នាក់
ដែលកំពុងត្រូវបានចាប់ឃុំខ្លួន នៅក្នុងពន្ធនាគារ ហើយបច្ចុប្បន្ននេះ ពលរដ្ឋដែលបានរត់គេចចេញពីតំបន់នោះ កំពុងតែស្នើសុំឲ្យខាងសិទ្ធិមនុស្សជួយអន្តរាគមន៍ ដើម្បីឲ្យពួកគេ អាចមានសិទ្ធិវិលទៅរស់នៅ និងដាំដំណាំ នៅក្នុងតំបន់របស់ពួកគេវិញ។ លោកបានឲ្យដឹងទៀតថា៖«យើងថ្កោលទោស ចំពោះកងកម្លាំងដែលបានបាញ់ប្រជាពលរដ្ឋឲ្យស្លាប់ នៅខណៈដែលពួកគេ បានចុះទៅបណ្តេញទាំងបង្ខំឲ្យពលរដ្ឋចាកចេញពីផ្ទះរបស់ពួកគេ»។
កាលពីថ្ងៃទី ១៦ ខែឧសភា ក្រសួងមហាផ្ទៃ បានចេញសេចក្តីថ្លែងការណ៍ ដោយបានលើកឡើងថា នៅភូមិសាស្ដ្រភូមិប្រមា ឃុំកំពង់ដំរី ស្រុកឆ្លូង មានពួកអនាធិបតេយ្យមួយក្រុម មានតួនាទីជាអ្នកដឹកនាំ និងជាសមាជិករបស់សមាគមអ្នកប្រជាធិបតេយ្យ ដែលមានឈ្មោះ ប៊ុន រដ្ឋា ជាមេខ្លោង ដោយបានប្រព្រឹត្តល្មើសច្បាប់រដ្ឋធម្មនុញ្ញ និងច្បាប់នានា របស់កម្ពុជា ហើយអាជ្ញាធរកំពុងស្វែងរកចាប់ខ្លួន អ្នកភូមិចំនួន ៥ នាក់ ក្នុងនោះមានដូចជា ឈ្មោះ ប៊ុន រដ្ឋា ភេទប្រុស អាយុ ៣២ឆ្នាំ ប៊ុន ឆន ភេទប្រុស អាយុ ៥៥ ឆ្នាំ ឈ្មោះ សុខ តុង ភេទប្រុស អាយុ ៦១ ឆ្នាំ ម៉ា ឆាង ភេទប្រុស អាយុ ៤៧ ឆ្នាំ និងខាត់ សារឿន ភេទប្រុស អាយុ ៤២ ឆ្នាំ។
លោក ចាន់ សូវ៉េត បានមានប្រសាសន៍ថា អង្គការសង្គមស៊ីវិល ដែលត្រូវបានហាម មិនឲ្យចូលទៅក្នុងតំបន់នោះ កំពុងមានការព្រួយបារម្ភយ៉ាងខ្លាំង ចំពោះកងកម្លាំង ដែលកំពុងតែព្យាយាមតាមចាប់ខ្លួនប្រជាពលរដ្ឋ និងបានស្នើដល់រដ្ឋាភិបាលឲ្យបញ្ឈប់សកម្មភាពតាមចាប់ខ្លួនពលរដ្ឋជាបន្តទៅទៀត៕
0 comments:
Post a Comment