ដោយ : រតនា / CEN (ថ្ងៃទី 23 មករា 2012,01:06:PM)
ភ្នំពេញ: លោកបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសកម្ពុជា បានជំរុញឲ្យឯកអគ្គរាជទូត និងអគ្គកុងស៊ុលខ្មែរទាំងអស់ ប្រចាំនៅបរទេស ផ្សព្វផ្សាយគោលនយោបាយរបស់រាជរដ្ឋាភិបាលទៅក្រៅប្រទស ឲ្យបានខ្លាំងក្លា។ ការជំរុញនេះ បានធ្វើឡើង នៅក្នុងកិច្ចប្រជុំមួយ កាលពីព្រឹកថ្ងៃទី២៣ ខែមករា ឆ្នាំ២០១២ នៅទីស្តីការក្រសួងការបរទេស។
លោក កុយ គួង អ្នកនាំពាក្យក្រសួងការបរទេស បានមានប្រសាសន៍ប្រាប់ក្រុមអ្នករាយការរាណ៍ព័ត៌មាន នៅព្រឹកថ្ងៃទី២៣ ខែមករាថា នៅព្រឹកនេះ លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសកម្ពុជា បានជួបប្រជុំជាមួយឯកអគ្គរាជទូត និងឯកអគ្គកុងស៊ុលកម្ពុជា ដែលប្រចាំនៅក្រៅប្រទេស ដោយសារតែឆ្នាំនេះ ប្រទេសកម្ពុជា ( ជាប្រធានអាស៊ាន )ជាពិសេសនយោបាយរបស់រាជរដ្ឋាភិបាលកម្ពុជា ប្រឈមនឹងការងារសំខាន់ៗចំនួនបី គឺទី១-ការបកស្រាយរបស់តុលាការយុត្តិធម៌អន្តរជាតិ ( ICJ ) នោះ ទៅលើសាលក្រមឆ្នាំ១៩៦២ ពាក់ព័ន្ធប្រាសាទព្រះវិហារ និងតំបន់ជុំវិញប្រាសាទ។ ទី២-ឆ្នាំនេះ គឺឆ្នាំត្រូវបោះឆ្នោត នៅអង្គការសហប្រជាជាតិ ដើម្បីសម្រាប់បេក្ខភាពកម្ពុជា សម្រាប់បេក្ខភាពសមាជិកមិនអចិន្ត្រៃយ៍ ក្នុងក្រុមប្រឹក្សាសន្តិសុខអង្គការសហប្រជាជាតិ សម្រាប់អាណត្តិឆ្នាំ២០១៣-ឆ្នាំ២០១៤ ហើយនៅឆ្នាំ២០១២នេះ គឺជាឆ្នាំនៃការបោះឆ្នោតជ្រើសរើស ហើយនិងចំណុចទី៣-ឆ្នាំ២០១២នេះ ក៏ជាឆ្នាំធ្វើជាម្ចាស់ផ្ទះ ឬធ្វើជាប្រធានអាស៊ាន។ ដូច្នេះធ្វើយ៉ាងណាឲ្យប្រទេសកម្ពុជា ធ្វើជាប្រធានអាស៊ានប្រកប ដោយជោគជ័យ ហើយក៏ជាកិត្តិយសសម្រាប់ប្រទេសកម្ពុជាដែរ។
លោក កុយ គួង បានបញ្ជាក់ថា “ដូច្នេះហើយដោយសារនយោបាយការបរទេសរបស់រាជរដ្ឋាភិបាលយើង ប្រឈមនឹងការងារសំខាន់ៗទាំងបីនេះហើយ ទើបមានការចាំបាច់ដើម្បីកោះប្រជុំឯកអគ្គរាជទូត និងអគ្គកុងស៊ុលកម្ពុជា ប្រចាំនៅក្រៅប្រទេសនោះ ដើម្បីឲ្យអ្នកទាំងនោះ បានយល់ដឹងអំពីនយោបាយការបរទេសរបស់រាជរដ្ឋាភិបាលយើង ហើយជាពិសេសឲ្យពួកគាត់បន្តអនុវត្តនយោបាយការបរទេនេះ ឲ្យបានល្អ ជាអតិបរមា ហើយនិងស៊ីសង្វាក់ជាមួយការសួងការបរទេស”។
លោកបន្តថា ឆ្លៀតឱកាសនោះ លោកឧបនាយករដ្ឋមន្ត្រីហោណំហុង បានណែនាំអំពីការងារជាក់ស្តែងអំពីកាតព្វកិច្ច និងភារកិច្ច របស់ឯកអគ្គរាជទូត អគ្គកុងស៊ុលកម្ពុជា ទាក់ទៅនឹងគោលនយោបាយសំខាន់ៗបីខាងលើនេះ។
ជាមួយគ្នានោះ លោកឧបនាយករដ្ឋមន្ត្រី ហោ ណាំហុង ក៏បានណែនាំឲ្យធ្វើការតាមដានសភាពការណ៍ស្ថានការណ៍ នៅក្នុងប្រទេស ដែលខ្លួនទៅប្រចាំនោះ និងតាមដានពីការរីកចម្រើនលើគ្រប់វិស័យនៃប្រទេសយើង ហើយឲ្យធ្វើការផ្សព្វផ្សាយដល់ការងាររីកចំរើននៃប្រទេសយើងនេះ ឲ្យទាន់ពេលវេលា និងសមស្រប។
លោកកុយគួង បញ្ជាក់ទៀតថា នៅក្នុងកិច្ចប្រជុំនោះ លោកឧបនាយករដ្ឋមន្ត្រី ក៏បានណែនាំដល់ឯកអគ្គរាជទូត និងអគ្គកុងស៊ុល កម្ពុជាឲ្យខិតខំស្វែងរកទីផ្សារ ជាពិសេសទីផ្សារ សម្រាប់ផលិតផលស្រូវកម្ពុជាយើង និងទាក់ទាញវិនិយោគទុន និងភ្ញៀវទេសចរ ឲ្យបានកាន់តែច្រើន ជាពិសេសដោយសារឯកអគ្គរាជទូត និងអគ្គកុងស៊ុល ដែលប្រចាំនៅប្រទេស ដែលមានពលករធ្វើការច្រើន ដូចជា ម៉ាឡេស៊ី ថៃ កូរ៉េ និងជប៉ុន ជាដើម ឲ្យខំយកចិត្តទុកដាក់ឲ្យបានខ្លាំង ដើម្បីការពារសិទ្ធិសេរីភាពរបស់យើង។ ទន្ទឹមនឹងនោះ ក៏តម្រូវឲ្យទូតយើង រាយការណ៍ឲ្យបានទាន់ពេលវេលាមកក្រសួងវិញ បើសិនមានបញ្ហាអ្វីមួយ។
លោក កុយ គួង បន្តទៀតថា នៅពេលអនាគតកម្ពុជា នឹងបញ្ជូនពលករទៅប្រទេសគុយវ៉ែត និងប្រទេសកាតា បន្ថែមទៀត។ ហើយលោកឧបនាយករដ្ឋមន្ត្រី ក៏បានណែនាំដល់ឯកអគ្គរាជទូត និងអគ្គកុងស៊ុលទាំងអស់ បង់ប្រាក់ចំណូល ដែលរកបានពីការចេញទិដ្ឋាការមកចូលក្នុងថវិកាជាតិឲ្យបានទៀងទាត់ ហើយផ្តល់ទិដ្ឋាការដល់ភ្ញៀវទេសចរ ដល់ភ្ញៀវបរទេស ឲ្យបានទាន់ពេលវេលា និងឆាប់បំផុត ដើម្បីជួយដល់ការវិនិយោគ និងជួយដល់វិស័យទេសចរណ៍ផងដែរ។
នៅព្រឹកថ្ងៃទី២៤ ខែមករា ឆ្នាំ២០១២ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា នឹងអញ្ជើ្ជញជាអធិបតី ដ៏ខ្ពង់ខ្ពស់ នៅក្នុងកិច្ចប្រជុំជាមួយឯកអគ្គរាជទូត និងអគ្គកុងស៊ុលកម្ពុជា ដើម្បីណែនាំឯកអគ្គរាជទូត និងអគ្គកុងស៊ុល ជាពិសេសលើការងារសំខាន់ៗទាំងបីខាងលើនោះ៕
0 comments:
Post a Comment