ថ្ងៃច័ន្ទទី 26 មីនា 2012
ដោយ សារព័ត៌មានសេរី
កាសែតរបស់អូស្រ្តាលីឈ្មោះ The Age បានរាយការណ៍នៅថ្ងៃទី២៦
ខែមីនា ថា ក្មួយប្រុសរបស់លោកនាយករដ្ឋមន្រ្តីខ្មែរ ហ៊ុន សែន គឺលោក
ហ៊ុន តូ មានជាប់ពាក់ព័ន្ធទៅនឹងក្រុមឧក្រិដ្ឋជនជួញដូរគ្រឿងញៀន
និងលាងលុយក្រខ្វក់។
 |
| លោក ហ៊ុន តូ ក្មួយប្រុសនាយករដ្ឋមន្រ្តីខ្មែរ ហ៊ុន សែន ខាងស្តាំ |
បើតាមសេចក្តីរាយការណ៍របស់កាសែតដដែល លោក ហ៊ុន តូ
ត្រូវបានអាជ្ញាធរអូស្រ្តាលីរៀបគម្រោងចាប់ខ្លួននៅទីក្រុងម៉ែលប៊ន
ប៉ុន្តែត្រូវអាក់ខានទៅវិញ
ដោយសារតែស្ថានទូតអូស្រ្តាលីប្រចាំទីក្រុងភ្នំពេញបានបដិសេធ
ទិដ្ឋាការដល់លោក។
កាសែតបានបន្តថា ផែនការតាមចាប់ខ្លួនលោក ហ៊ុន តូ
ដែលមានឈ្មោះថា ប្រតិបត្តិការ Operation Illipango
បានស៊ើបអង្កេតលើការដឹកគ្រឿងញៀនហេរ៉ូអ៊ីនមកពីប្រទេសកម្ពុជាចូល
ក្នុងប្រទេសអូស្រ្តាលី ដោយលាក់ជាមួយឈើ។ ហើយថា
ពេលនោះប្រាក់ដែលបានមកពីការលក់គ្រឿងញៀនត្រូវបានបញ្ជូនចេញពី
កាស៊ីណូឈ្មោះក្រោនក្នុងទីក្រុងម៉ែលប៊នមកកាន់តំបន់អាស៊ីក្រោម
បង្គាប់របស់លោក ហ៊ុន តូ។
របាយការណ៍របស់កាសែត The Age បានអះអាងថា លោក ហ៊ុន តូ
ក៏ជាមុខសញ្ញារបស់គណៈកម្មការស៊ើបអង្កេតបទឧក្រិដ្ឋអូស្រ្តាលីនៅ
ក្នុងរង្វង់ឆ្នាំ២០០២ និង២០០៤ផងដែរ ដែលគ្រានោះឈ្មោះ ផៃនី ថៃ
ជាអ្នកមានទំនាក់ទំនងជិតស្និតជាមួយលោកលោក ហ៊ុន តូ
ត្រូវបានចាប់ខ្លួន និងចោទប្រកាន់ដោយតុលាការប្រទេសអូស្រ្តាលី។
កាសែត The Age ក៏បានរាយការណ៍ផងដែរថា
ក្រុមឧក្រិដ្ឋជនធំៗនៅទីក្រុងស៊ីដនីមួយចំនួន
ក៏បានវិនិយោគលុយរាប់លានទៅលើអាជីវកម្មដែលសង្ស័យថា
មានពាក់ព័ន្ធទៅនឹងគ្រឿងញៀននៅក្នុងប្រទេសកម្ពុជា
ដែលក្នុងនោះរួមមានការពាក់ព័ន្ធជាមួយនឹងមន្រ្តីរដ្ឋាភិបាល
និងឈ្មួញធំៗសព្វថ្ងៃ។
របាយការណ៍បានបន្តថា
ក្នុងចំណោមជនជាតិអូស្រ្តាលីដែលមានការសង្ស័យពាក់ព័ន្ធទៅនឹង
ឧក្រិដ្ឋកម្មនៅប្រទេសកម្ពុជា គឺមានគ្រួសារយួនកាត់ចិនមួយគ្រួសារ
ដែលគេស្គាល់ថាជាម្ចាស់ភោជនីយដ្ឋានអាស៊ានស៊ីដនីដ៏ល្បីល្បាញមួយ។
ប៉ូលិសបានរកឃើញថា ជាងមួយទសវត្សរ៍កន្លងទៅនេះ
គ្រួសារយួនកាត់ចិននេះបានជួយផ្ញើលុយជាង១០លានដុល្លារមកកាន់
ប្រទេសកម្ពុជា ហើយក្នុងនោះគេរកឃើញថា
មានការពាក់ព័ន្ធទៅនឹងការជួញដូរគ្រឿងញៀនផងដែរ។
ភាគខ្លះក្នុងចំណោមលុយជាង១០លានដុល្លារនោះ
ត្រូវបានប្រើប្រាស់ដើម្បីទ្រទ្រង់ដល់កាស៊ីណូមួយនៅក្នុងប្រទេស
កម្ពុជា ហើយលុយមួយចំណែកផ្សេងទៀតត្រូវគេរកឃើញថា
បានវិនិយោគទៅលើការបង្កើតនាវាកាស៊ីណូនៅក្នុងប្រទេសនេះ៕
0 comments:
Post a Comment