អ្នក​ឃ្លាំមើល​ព្រំដែន​រិះគន់​ការ​ចុះ​ហត្ថលេខា​ផ្លាស់ប្ដូរ​ដី​រវាង​ខ្មែរ-វៀតណាម

ដោយ ខែ សុណង

2012-03-16

គណៈកម្មាធិការ កិច្ចការព្រំដែនកម្ពុជា និងគណៈកម្មាធិការកិច្ចការព្រំដែនប្រទេសវៀតណាម បានចុះហត្ថលេខារួមគ្នាលើកិច្ចព្រមព្រៀងចំនួន២ កាលពីថ្ងៃទី១៤ ខែមីនា ឆ្នាំ២០១២។

ក្រុមតំណាងរាស្រ្ដបក្សសមរង្ស៊ីនិងពលរដ្ឋប្រឈមមុខនឹង

សមត្ថកិច្ចខេត្តស្វាយរៀង ខណៈដែលចុះពិនិត្យស្ថានភាព

នៃការបោះបង្គោលព្រំដែនកម្ពុជា-វៀតណាម នៅឃុំសំរោង

ស្រុកចន្រ្ទា កាលពីថ្ងៃ១៤ ធ្នូ ២០០៩។

កិច្ចព្រមព្រៀងទាំងពីរនោះ មួយគឺទាក់ទងការទទួលជំនួយពីភាគីវៀតណាម និងការអនុវត្តលើអនុស្សរណៈយោគយល់គ្នាឆ្នាំ២០១១ ស្ដីពីការផ្លាស់ប្ដូរដីមួយចំនួននៅតាមបណ្ដោយព្រំដែនកម្ពុជា និងវៀតណាម។

ក្រុមអ្នកឃ្លាំមើលព្រំដែនកម្ពុជា បានរិះគន់ថា ការចុះហត្ថលេខារួមគ្នាលើកិច្ចព្រមព្រៀងទទួលជំនួយពីភាគីវៀតណាម និងការអនុវត្តលើអនុស្សរណៈស្ដីពីការផ្លាស់ប្ដូរដីមួយចំនួននៅតាម បណ្ដោយព្រំដែនកម្ពុជា និងវៀតណាមនោះ គឺពុំមានប្រយោជន៍ដល់កម្ពុជាទេ។ ផ្ទុយទៅវិញធ្វើឲ្យកម្ពុជា ខាតបង់ទឹកដី ដោយសារបង្គោលព្រំដែនវៀតណាម ដែលចេះតែខិតចូលមកទឹកដីខ្មែរ។

សមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន មានប្រសាសន៍នៅថ្ងៃទី១៥ ខែមីនា ថា បង្គោលព្រំដែនភាគច្រើនមានភាពមិនប្រក្រតី ព្រោះបានបោះចូលមកទឹកដីកម្ពុជា។ លោកមិនយល់ស្របនោះទេចំពោះការចុះកិច្ចព្រមព្រៀងរវាងកម្ពុជា- វៀតណាមថា បានផ្ដល់ផលប្រយោជន៍ដល់ពលរដ្ឋខ្មែរនោះ ហើយរដ្ឋាភិបាលគួរពិចារណាឡើងវិញចំពោះករណីនេះ។

លោក រ៉ុង ឈុន៖ «ត្រង់ថាគណៈកម្មាធិការព្រំដែនកម្ពុជា អះអាងថា មានចូលគេចូលយើងអីនោះ អត់ឃើញចូលគេទេ ឃើញតែចូលយើងទេ។ បង្គោលព្រំដែនចំណុចមួយទៀតដែលយើងមានមន្ទិលសង្ស័យ ត្រង់ថា បង្គោលដែលបោះហើយ ឬមួយត្រូវបានរឹតបន្តឹងដោយអាជ្ញាធរមិនឲ្យអ្នកតំណាងរាស្ត្រ មិនឲ្យសង្គមស៊ីវិល មិនឲ្យប្រជាពលរដ្ឋចូលទៅមើលដល់ហ្នឹងទេ។ នេះហើយដែលជាចំណុចរសើបថា ក្រុមហ៊ុនហ្នឹងវាពុំមានភាពប្រក្រតី ហើយបានជាបិទបាំងមិនឲ្យសាធារណជនបានទៅឃើញផ្ទាល់ភ្នែក ពីព្រោះថា ឃើញផ្ទាល់ភ្នែកធ្វើឲ្យប្រជាពលរដ្ឋទាំងអស់ ទាំងសង្គមស៊ីវិលទាំងអីនោះ មិនសប្បាយចិត្ត ពីព្រោះបង្គោលនោះវាបានបោះចូលដីខ្មែរពិតប្រាកដមែន»។

កាលពីថ្ងៃទី១៤ ខែមីនា ឆ្នាំ២០១២ គណៈកម្មាធិការកិច្ចការព្រំដែនកម្ពុជា និងគណៈកម្មាធិការកិច្ចការព្រំដែនប្រទេសវៀតណាម បានចុះហត្ថលេខារួមគ្នាលើកិច្ចព្រមព្រៀងចំនួន ២ ទាក់ទងការទទួលជំនួយពីភាគីវៀតណាម និងការអនុវត្តលើអនុស្សរណៈយោគយល់គ្នាឆ្នាំ២០១១ ស្ដីពីការផ្លាស់ប្ដូរដីមួយចំនួននៅតាមបណ្ដោយព្រំដែនកម្ពុជា និងវៀតណាម។

ទាក់ទងបញ្ហានេះ លោក វ៉ា គឹមហុង ប្រធានគណៈកម្មាធិការកិច្ចការចម្រុះព្រំដែនកម្ពុជា បានថ្លែងថា កម្ពុជានឹងទទួលបានប្រយោជន៍ពីការចុះកិច្ចព្រមព្រៀងនេះ។ លោកថា កម្ពុជានឹងទទួលបានផែនទីមួយជាក់លាក់ ដែលមានបង្គោលព្រំដែន និងមានខណ្ឌសីមាព្រំដែនរាប់ពាន់បង្គោលទៀត ដែលអាចកំណត់ព្រំដែនមួយច្បាស់លាស់ពុំមានបាត់បង់ដីខ្មែរទេ។

លោក វ៉ា គឹមហុង៖ «ប្រជាជនយើង ទីមួយគាត់បានរក្សាកន្លែងភូមិអាករគាត់នៅសព្វថ្ងៃ គាត់នៅតែបន្តបាន ស្រែចម្ការគាត់ធ្លាប់ធ្វើគាត់នៅតែធ្វើបាន។ អ៊ីចឹងហើយបានថា គេបោះនោះខ្ញុំតែងតែនិយាយថា បងប្អូនដែលយើងបោះនោះ ជួនកាលខ្ញុំសុំតែ ៣ម៉ែត្រទេ ឬក៏ ៤ម៉ែត្រការ៉េ ដើម្បីបោះបង្គោលសិនទេ កុំអាលថា បាត់បង់។ អ្នកខ្លះយកទៅបំផុសបំផុល ដើម្បីថា អូបាត់ស្រែបាត់ចម្ការបាត់អីៗគាត់ទាំងអស់។ យើងទុកឲ្យរដ្ឋាភិបាល គេគិត ថ្នាក់ដឹកនាំសម្ដេចនាយកគាត់គិតហើយ ធ្វើម៉េចមិនឲ្យបងប្អូនយើងវេទនាទេ យើងតែងតែគិតអ៊ីចឹង ប៉ុន្តែជំហានដំបូងយើងត្រូវតែធ្វើអ៊ីចឹង។បើយើងមិនធ្វើទេ យើងមិនអាចកំណត់ថា ត្រឹមនោះដីយើង ត្រឹមនោះដីគេ ហើយគេគណនាផ្ទែក្រឡាដីដែលយើងដូរគេទេ»។

លោក វ៉ា គឹមហុង បានបញ្ជាក់ទៀតថា តាមរយៈកិច្ចព្រមព្រៀងស្ដីពីជំនួយឥតសំណងរបស់រដ្ឋាភិបាលវៀតណាម ផ្ដល់មកឲ្យកម្ពុជា ដើម្បីផលិតផែនទីឋានលេខាព្រំដែនកម្ពុជា-វៀតណាម ដែលមានទឹកប្រាក់ចំនួន ៥០ម៉ឺនដុល្លារសហរដ្ឋនោះ គឺជាការបន្តដេញថ្លៃកាលពីឆ្នាំទៅដែលបានទៅលើក្រុមហ៊ុន អន្តរជាតិឈ្មោះ ប្លូន (Bloon)។ ប៉ុន្តែដោយសារកម្ពុជាជួបបញ្ហាហិរញ្ញវត្ថុទើបស្នើឲ្យវៀតណាមជួយ។

លោក វ៉ា គឹមហុង៖ «កិច្ចការនោះជាកិច្ចការធ្វើផែនទីនៅក្រោមការ ត្រួតពិនិត្យរួមគ្នា ចែកការគ្នាធ្វើទាំងសងខាង គឺខាងកម្ពុជា និងខាងវៀតណាម ដែលមានក្រុមការងារមួយទៀតគេត្រួតពិនិត្យជារហូត។ ដូចថា ពេលឥឡូវៗនេះ ក៏ប្រជុំ អាទិត្យក្រោយក៏ប្រជុំដើម្បីរើសមើលគុណភាពផែនទីដែលធ្វើហើយ ផែនទីនោះវាមានពីរបីដំណាក់។ ផែនទីដំបូងគឺផែនទីតាមរូបថតអាកាស រួចបានបញ្ចូលទិន្នន័យទាំងអស់ដែលយើងបោះបង្គោលព្រំដែន បោះខណ្ឌព្រំសីមាទាំងអស់នោះបញ្ចូលទៅទើបបានចេញជាផែនទីឋានលេខា ដែលមានផ្លូវថ្នល់ មានភូមិមានអីទាំងអស់ ដើម្បីចេញជាផែនទីដែលUpdate នៅឆ្នាំ២០១១ ២០១២នេះ»។

ទោះយ៉ាងណាក៏ដោយ លោក សុន ឆ័យ ជាអ្នកតំណាងរាស្ត្រមណ្ឌលភ្នំពេញ គណបក្ស សម រង្ស៊ី បានសម្ដែងការមិនពេញចិត្តថា រដ្ឋាភិបាល មិនគួរទទួលយកអំណោយពីប្រទេសវៀតណាមនោះទេ ពីព្រោះវាជាការសបញ្ជាក់ឲ្យឃើញថា កម្ពុជាគ្មានសមត្ថភាពធ្វើបង្គោលការពារទឹកដីរបស់ខ្លួន។

លោក សុន ឆ័យ៖ «គេមិនដែលយកលុយប្រទេសដែលមានបញ្ហាព្រំដែន ជាមួយឲ្យជួយទេ រឿងបោះបង្គោលក្ដី រឿងធ្វើផែនទីក្ដីហ្នឹង ព្រោះវាបង្ហាញថា យើងមិនមានលទ្ធភាពគ្រាន់តែបញ្ជាក់ជាផ្លូវការនូវលក្ខណៈទឹកដីរបស់ ខ្លួន មិនមែនលទ្ធភាពផង។ ដូច្នេះគេមិនយកទេហើយលុយ ៥សែនដុល្លារប៉ុណ្ណឹង រដ្ឋាភិបាលខ្មែរគួរតែមានលទ្ធភាពខ្លួនឯង។ សុខចិត្តឲ្យជួយអីផ្សេង គេមិនដែលធ្វើរបងឲ្យជួយ គូសប្លង់ផ្ទះឲ្យយើងបែបហ្នឹងទេ»។

លោក វ៉ា គឹមហុង បានបញ្ជាក់ថា បង្គោលព្រំដែនគោករវាងប្រទេសកម្ពុជា និងវៀតណាម មានចំនួន ៣១៤បង្គោល ដែលបង្គោលខ្លះជាបង្គោលទោល និងខ្លះជាបង្គោលភ្លោះ អាស្រ័យទៅតាមទីតាំងភូមិសាស្ត្រលើទីតាំងជាក់ស្ដែង ដែលបង្គោលនីមួយៗសាងសង់ពីថ្មក្រានីតយ៉ាងរឹងមាំ ដែលចំណាយថវិកាចំនួនជាង ១៦លានដុល្លារ ហើយភាគីទាំងពីរ នឹងបញ្ចប់ការបោះបង្គោលព្រំដែននៅដំណាច់ឆ្នាំ២០១២។ លោកបានបន្តថា ខេត្តនៅតាមបណ្ដោយព្រំដែនប្រទេសទាំងពីរ គឺមានខេត្តកំពង់ចាម ស្វាយរៀង និងតាកែវ កំពុងមានបញ្ហាស្មុគស្មាញច្រើនជាងគេ។

ប្រជាពលរដ្ឋម្នាក់រស់នៅភូមិបាក់ដៃ ឃុំគោកធ្លក ស្រុកអង្គរបុរី ខេត្តតាកែវ ដែលរស់នៅចម្ងាយ ១គីឡូម៉ែត្រពីព្រំដែនខ្មែរ-វៀតណាម បានត្អូញត្អែរថា ជនជាតិវៀតណាម បានចូលមករកស៊ីក្នុងទឹកដីកម្ពុជា យ៉ាងអនាធិបតេយ្យ និងគ្មានការអន្តរាគមន៍ពីអាជ្ញាធរឡើយ៖ «យើងឲ្យគេបោះឲ្យបានត្រឹមត្រូវ វាពិតប្រាកដ កុំឲ្យខ្មែរវាចេះតែភ័យ ពីព្រោះព្រំដែន តាមខ្ញុំមកនៅនេះជាង ២០ឆ្នាំហើយ ឃើញតែកិលចូលតិចៗរហូត។ កាលមុនឃើញនៅឆ្ងាយ យូរមករាងជិតទៅៗខ្ញុំឆ្ងល់ដែរ»។

កាលពីថ្ងៃទី៩ ខែមីនា ឆ្នាំ២០១២ មន្ត្រីរដ្ឋាភិបាលប្រទេសទាំងពីរ គឺរដ្ឋមន្ត្រីក្រសួងការបរទេសវៀតណាម លោក ផាម បីញមីញ (Pham Binh Minh) និងរដ្ឋមន្ត្រី ក្រសួងមហាផ្ទៃ លោក ស ខេង ក៏បានជួបពិភាក្សាគ្នានៅក្នុងមហាសន្និបាតសហប្រតិបត្តិការ និងអភិវឌ្ឍន៍បណ្ដាខេត្តជាប់ព្រំដែនកម្ពុជា-វៀតណាម លើកទី៧ នៅប្រទេសវៀតណាមដែរ។ ក្នុងជំនួបនោះ គេបានផ្ដោតសំខាន់ទៅលើខេត្តចំនួន២០ ដែលនៅជាប់ព្រំដែន។

ភាគីទាំងពីរបានចេញសេចក្ដីប្រកាសរួមចំនួន ១២ចំណុច ដែលកម្ពុជា-វៀតណាម បានព្រមព្រៀងគ្នា មានដូចជាការពង្រឹងបញ្ហាសន្តិសុខ និងសុវត្ថិភាពតំបន់ជាប់ព្រំដែន អភិវឌ្ឍន៍សេដ្ឋកិច្ចសង្គម ជីវភាពរស់នៅរបស់ប្រជាពលរដ្ឋ និងបង្កើនទំនាក់ទំនងសាមគ្គីភាពរវាងកម្ពុជា-វៀតណាម ទៀតផង៕

កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែ ប៉ុណ្ណោះ។

ខ្មែរក្រោមជាតិនិយម - Khmer Krom Nationalism

ស្តាប់បទចំរៀងខ្មែរ

ចំនួនភ្ញៀវ ចូលទស្សនា

ព័ត៌មានក្នុងស្រុក

Friday, March 16, 2012