.jpg)
(ថ្ងៃទី 19 មីនា 2012, ម៉ោង 01:31:PM) | ដោយ: មុនីរ័ត្ន
លោក កុយ គួង អ្នកនាំពាក្យក្រសួងការបរទេសកម្ពុជា បានថ្លែងប្រាប់ក្រុមអ្នករាយការណ៍ព័ត៌មាន នៅព្រឹក ថ្ងៃទី១៩ មីនា ឆ្នាំ២០១២ ថា មកដល់ពេលនេះ អាជ្ញាធរខេត្ត ដែលមានព្រំប្រទល់ជាប់ព្រំដែន បានខិតខំស្វែងរក អោយមានការដោះលែង ប្រជាពលរដ្ឋខ្មែរទាំង ៣៨នាក់នោះ ប៉ុន្តែតាមរយៈអគ្គកុងស៊ុល ខ្មែរយើង ប្រចាំខេត្តស្រះកែវ ដែលបានចុះទៅធ្វើការផ្ទាល់ជាមួយអាជ្ញាធរថៃ គឺខាងភាគីថៃ គេចង់ធ្វើការដោះស្រាយ តាមផ្លូវច្បាប់ របស់ប្រទេសថៃ។
លោក កុយ គួង បានបន្តថា ប្រសិនបើអាជ្ញាធរថៃ គេចង់ធ្វើតាមផ្លូវច្បាប់ មកដល់ពេលនេះ អគ្គកុងស៊ុលរបស់យើងរកបានមេធាវី ២នាក់ ហើយដើម្បីជួយ ប្រជាពលរដ្ឋខ្មែរទាំង ៣៨នាក់ តាមផ្លូវច្បាប់ និងរកយុត្តិធម៌តាមផ្លូវច្បាប់។ ទោះជាយ៉ាងណា មកដល់ពេលនេះ មិនទាន់មានការកំណត់ អំពីកាលបរិច្ឆេទ នៃការបើកសវនាការនៅឡើយទេ។
មន្ត្រីអ្នកនាំពាក្យក្រសួងការបរទេស បានបន្តទៀតថា ភាគីថៃបានចោទប្រកាន់ថាទី១ គឺប្រជាពលរដ្ឋខ្មែរចូលក្នុងទឹកដីថៃខុសច្បាប់ និងទី២ ចោទប្រកាន់ ពីបទរុករកអនុផលព្រៃឈើផ្សេងៗ។
ទាក់ទងទៅនឹងបញ្ហាពលរដ្ឋ ខ្មែរនេះដែរ លោក កុយ គួង បានបញ្ជាក់ថា ចាប់ពីដើមឆ្នាំ២០១២ រហូតមកដល់ចុង ខែកុម្ភៈ ឆ្នាំ២០១២ មានពលរដ្ឋរងគ្រោះ បាត់បង់ជីវិត ដោយសារទាហានថៃបាញ់ចំនួន ៧ នាក់៕
0 comments:
Post a Comment