 |
| ទណ្ឌិតថៃ វីរៈ និង នាងលេខា រ៉ាទ្រី ពេលឲ្យជួបសាច់ញាតិ។ |
Friday, 16 March 2012
ដោយៈ ជាង សុខា
ភ្នំពេញៈ មន្រ្តីរដ្ឋាភិបាលកម្ពុជាជាថ្មីម្តងទៀត
បានច្រានចោល នូវឆន្ទៈរបស់រដ្ឋមន្រ្តីការបរទេសថៃ លោក សុរពង្ស
តូវីចាក់ឆៃគុល ដែលចង់ដោះដូរអ្នកទោសរវាងប្រទេសទាំងពីរ។
កាសែតបាងកកប៉ុស្តិ៍រាយការណ៍ពីថ្ងៃព្រហស្បតិ៍ ស្រង់សម្តីលោក
សុរពង្ស មកថា
ថៃនឹងពិភាក្សាអំពីលទ្ធភាពនៃការដោះដូរអ្នកទោសជាមួយកម្ពុជាដើម្បី
ទទួលបាននូវសកម្មជនថៃពីរនាក់គឺលោក វីរៈ ស៊ុមខ្វាមឃីត
សកម្មជនបណ្តាញអ្នកស្នេហាជាតិថៃ និងលេខាគាត់គឺនាង រ៉ាទ្រី ពីប៉ា
តាណាបៃប៊ុនមកប្រទេសថៃវិញ។
លោក សុរពង្ស បានថ្លែងថា៖«ការដោះដូរបែបនេះ
ប្រហែលជាមិនផ្អែកលើមូលដ្ឋានសមភាពនោះទេ។
ថៃប្រហែលជាអាចផ្តល់នូវអ្នកទោសកម្ពុជាបួននាក់
ទៅឲ្យក្រុងភ្នំពេញដើម្បីជាការដោះដូរនឹងសកម្មជនថៃទាំងពីរដែលកំពុង
ជាប់ឃុំនៅពន្ធនាគារព្រៃស»។
លោក វីរៈ និងនាង រ៉ាទ្រី ត្រូវចាប់ខ្លួននៅថ្ងៃទី២៩ ធ្នូ ២០១០
ពីបទចារកម្ម និងចូលមកទឹកដីកម្ពុជាខុសច្បាប់ ហើយលោក វីរៈ
ត្រូវបានកាត់ទោសដាក់ពន្ធនាគារចំនួន៨ឆ្នាំ និងនាង រ៉ាទ្រី
ត្រូវកាត់ឲ្យជាប់ពន្ធនាគារចំនួន ៦ឆ្នាំ។
លោក កុយ គួង អ្នកនាំពាក្យក្រសួងការបរទេសកម្ពុជាបានថ្លែងថា
ការដោះដូរអ្នកទោស អាចធ្វើទៅបានលុះត្រាតែធ្វើក្នុងលក្ខណៈជាកញ្ចប់។
លោកថ្លែងថា៖«បើថៃស្នើសុំឲ្យមានការដោះដូរអ្នកទោសជាកញ្ចប់នោះ
កម្ពុជាអាចនឹងពិចារណា។ ខ្ញុំមិនផ្តោតតែករណីរបស់ វីរៈ ទេ។
បើថៃចង់ពួកគេអាចធ្វើសំណើក្នុងលក្ខណៈជាកញ្ចប់»។
ថៃនឹងកម្ពុជាមានកិច្ចព្រមព្រៀងផ្ទេរអ្នកទោសគ្នាហើយកាលពីថ្ងៃទី១
ខែកុម្ភៈ ថៃបានបញ្ចូនអ្នកទោសកម្ពុជាបួននាក់
ដែលជាប់ពន្ធនាគារក្នុងប្រទេសថៃពីបទជួញដូរគ្រឿងញៀន
មកដាក់ពន្ធនាគារបន្តក្នុងប្រទេសកម្ពុជាវិញ
នូវចំនួនទោសដែលនៅសល់»។
គំនិតនៃការដោះដូរអ្នកទោសជាកញ្ចប់រវាងកម្ពុជានិងថៃ
កើតមានឡើងក្នុងអំឡុងដំណើរទស្សនកិច្ចលោក សុរពង្ស នៅកម្ពុជា
កាលពីខែធ្នូឆ្នាំមុន នៅក្នុងជំនួបជាមួយសមភាគីលោក គឺលោក រដ្ឋមន្ត្រី
ហោ ណាំហុង។
លោក វីរៈ និងនាង រ៉ាទ្រី
ធ្លាប់បានស្នើសុំការប្រទានទោសពីព្រះមហាក្សត្រកម្ពុជាតាមរយៈក្រសួង
ការបរទេសនិងក្រសួងយុត្តិធម៌ ប៉ុន្តែ ពុំទាន់ទទួលបានការអើពើ។
តាមលោក កុយ គួងថា ការដោះដូរអ្នកទោសជាកញ្ចប់
គឺកម្ពុជាចង់ធ្វើការដោះដូរតែមួយលើករវាងអ្នកទោសកម្ពុជាទាំងអស់
ដែលជាប់ពន្ធនាគារក្នុងប្រទេសថៃ
ជាមួយនឹងអ្នកទោសថៃទាំងអស់ដែលបានជាប់ពន្ធនាគារនៅកម្ពុជា។
មានអ្នកទោសថៃជិត៤០នាក់កំពុងជាប់ឃុំនៅកម្ពុជា
ប៉ុន្តែពុំមានតួលេខអ្នកទោសកម្ពុជានៅក្នុងប្រទេសថៃទេ៕ PS
0 comments:
Post a Comment