 |
| មួកទ័ពខ្មែរ ដែលមានរំលេចទង់ជាតិអាមេរិក។ រូបថត ហេង ជីវ័ន |
Joseph Freeman/ phnom penh post
ក្រចេះ : ក្រោយពីមានប្រតិបត្តិការយោធាមួយ កាលពីសប្ដាហ៍មុន
ដែលមានការបាញ់សម្លាប់ក្មេងស្រីអាយុ ១៤ ឆ្នាំម្នាក់
នៅឃុំកំពង់ដំរី ស្រុកឆ្លូង ក្រុមអ្នកសង្កេតការណ៍នានា
បានកត់សម្គាល់ពីឯកសណ្ឋានចម្លែក របស់ទាហានមួយចំនួន។
អ្វីដែលចម្លែកនោះ មួកការពាររបស់ពួកគេ
មានរូបសញ្ញាទង់ជាតិអាមេរិកពណ៌ឆើត លេចឡើង
នៅចន្លោះក្បូរក្បាច់ពណ៌បៃតងនិងពណ៌ប្រផេះ
មានលក្ខណៈដូចឯកសណ្ឋានទាហានប៉ារ៉ា។
អ្នកនាំពាក្យស្ថានទូតអាមេរិក បានបញ្ជាក់ពីថ្ងៃម្សិលមិញថា
ឯកសណ្ឋាន
ដែលទាហានខ្លះបានពាក់ក្នុងការចុះទៅបណ្តេញអ្នកភូមិនោះ
គឺជាផលិតផលមកពីអាមេរិក។ ប៉ុន្តែមួកការពារដែលគេបានរចនាម៉ូដនោះ
មិនមែនផ្លូវការទេ។
លោក Sean McIntosh មន្ត្រីទទួលបន្ទុកកិច្ចការសាធារណៈ
ស្ថានទូតអាមេរិក ថ្លែងថា៖ «នោះមិនមែនជាពួកយើងទេ។
នៅពេលយោធាអាមេរិក ផ្ដល់ឯកសណ្ឋានទាំងនេះ
មិនមានសញ្ញាអាមេរិកណាមួយ នៅលើឯកសណ្ឋានទាំងនោះទេ»។ បើតាមលោក
McIntosh ឯកសណ្ឋាន ដែលត្រូវបានគេទិញ
តាមរយៈការផ្ដល់ប្រាក់របស់អាមេរិក
ហើយដឹកជញ្ជូនមកកាន់កម្ពុជាទាំងនេះ
ត្រូវបានសមាជិកកងទ័ពជើងទឹក និងជើងគោក យកទៅពាក់។
ការដោះដូរនូវស្លាកសញ្ញាឯកសណ្ឋាន និងក្រុមឆត្រយោង
ក៏បានកើតឡើងរវាងទាហានកម្ពុជានិងអាមេរិកដែរ។
ដោយត្រូវបានសួរថា តើលោកមានការព្រួយបារម្ភថា
ផ្កាយនិងឆ្នូតនៅលើមួកការពារ នៃទាហានកម្ពុជា
អាចបញ្ជូនសារដ៏មានគ្រោះថ្នាក់មួយ
ទៅកាន់អ្នកភូមិរងគ្រោះដែរឬយ៉ាងណានោះ?
លោកបានរៀបរាប់យោងទៅដល់សេចក្ដីថ្លែងការណ៍មួយ
ដែលចេញកាលពីសប្ដាហ៍មុន។
លោកបានថ្លែងថា៖«យើងមិនចោទអំពើហិង្សានេះ
ទៅលើផ្នែកនៃភាគីណាមួយ ដើម្បីឲ្យដោះស្រាយបញ្ហាទាំងនេះទេ។
តើទាំងនេះ ជាឯកសណ្ឋានរបស់សហរដ្ឋអាមេរិកជាផ្លូវការឬ?
យើងនិយាយថា ទេ»។
ទាហាននៅក្នុងជួរកងយោធពលខេមរភូមិន្ទ
កំពុងធ្វើការជាមួយកងរាជអាវុធហត្ថ
ក្នុងការបណ្ដេញអ្នកស្រុកដោយបង្ខំឲ្យចេញពីភូមិប្រមា
ឃុំកំពង់ដំរី ស្រុកឆ្លូង។ អ្នកស្រុកទាំងនេះ មានជម្លោះដីធ្លី
ជាយូរមកហើយជាមួយក្រុមហ៊ុនកាប់ឈើនៅលើដីនេះ
ប៉ុន្តែក្រុមមន្ត្រី បាននិយាយថា ការបង្រ្កាបនេះ គឺជាលទ្ធផល
នៃចលនាអបគមន៍ ដែលចាប់ផ្ដើមនៅទីនោះ។
ក្មេងស្រីឈ្មោះ ហេង ចន្ថាអាយុ ១៤ ឆ្នាំ បានត្រូវគ្រាប់ស្លាប់
បន្ទាប់ពីអ្នកភូមិ បានចោទប្រកាន់ថា ទាហាននិងកងរាជអាវុធហត្ថ
រាប់រយនាក់ បានបើកការបាញ់រះ ទៅលើពួកគេ។
តំណាងប្រជាពលរដ្ឋនៅភូមិប្រមា បានច្រានចោលការចោទប្រកាន់ ដែលថា
ពួកគេកំពុងបង្កើតតំបន់អបគមន៍ ខណៈពួកគេគ្មានអាវុធ
និងគ្មានអង្គការចាត់តាំងអ្វីទាល់តែសោះនោះ៕ PN
0 comments:
Post a Comment