សុន ស្រីពេជ្រ ទៅច្រៀងឲ្យវៀតណាមស្តាប់នៅហូជីមិញ
Friday, 18 May 2012 12:01
សេត គឹមសឿន/phnom penh post
ភ្នំពេញៈ តារាចម្រៀងរបស់ផលិតកម្មរស្មីហង្សមាស
ដែលកំពុងក្តោបក្តាប់បទចម្រៀងផ្សព្វផ្សាយវិស័យទេសចរណ៍របស់ក្រសួង
ទេសចរណ៍នាង សុន ស្រីពេជ្រ
នឹងចេញដំណើរទៅច្រៀងឲ្យប្រជាជនវៀតណាមនៅទីក្រុងហូជីមិញស្តាប់
នៅព្រឹកនេះ។
ក្នុងនាមជាតារាចម្រៀងម្នាក់ប្រចាំនៅក្រសួងទេសចរណ៍ផ្នែកចម្រៀង
ខេមរភាសា សុន ស្រីពេជ្រ
នឹងត្រូវចេញទៅសម្តែងច្រៀងនៅទីក្រុងហូជីមិញប្រទេសវៀតណាម
នៅព្រឹកថ្ងៃទី១៨ ខែឧសភា នេះ
នៅក្នុងព្រឹត្តិការណ៍មួយដែលរៀបចំឡើងដោយសណ្ឋាគារលំដាប់ផ្កាយ៥
ណាហ្គាវើល ។
បើតាមរបាយការណ៍របស់សណ្ឋាគារណាហ្គាវើលបានឲ្យដឹងថា
តារាចម្រៀងកម្ពុជាដែលនឹងលេចវត្តមាននៅក្នុងព្រឹត្តិការណ៍បើក
សម្ពោធសណ្ឋាគារណាហ្គាវើលលំដាប់ផ្កាយ៥មួយផ្សេងទៀតនៅទីក្រុង
ហូជីមិញនោះ គឺមានតារាចម្រៀងរបស់ផលិតកម្មរស្មីហង្សមាសនាង សុន
ស្រីពេជ្រ និងតារាចម្រៀងប្រចាំផលិតកម្មអឹម(M Production) នាង សុខ
ស៊ីឡាលីន ។ សុន ស្រីពេជ្រ
នឹងច្រៀងបទទាក់ទិននឹងវិស័យទេសចរណ៍របស់កម្ពុជាជាភាសាខ្មែរ
រីឯតារាចម្រៀង សុខ ស៊ីឡាលីន នឹងច្រៀងបទ «Kingdom of Wonder» ។
ដើម្បីឆ្លើយតបនឹងការចេញទៅសម្តែងច្រៀងនៅក្រៅប្រទេសដែលមាន
ភូមិផងរបងជាប់គ្នានេះ នៅខណៈពេលដែលកំពុងហាត់សមកាលពីថ្ងៃ១៧
ខែឧសភា ម្សិលមិញ សុន ស្រីពេជ្រ បានបញ្ជាក់ថា
នាងនឹងត្រូវចេញទៅសម្តែងនៅប្រទេសវៀតណាមនៅថ្ងៃនេះ។
ខណៈមានឱកាសចេញទៅសម្តែងច្រៀងលើឆាកអន្តរជាតិ
ប៉ុន្តែមានចម្ងាយត្រឹមប្រទេសវៀតណាមក្តី
ក៏តារារូបនេះនឹងហាត់សមឲ្យបានស្ទាត់មុននឹងធ្វើការបង្ហើរសំនៀង
ខ្លួនឲ្យប្រជាជនវៀតណាមស្តាប់ឲ្យបានពីរោះដែរ
ចៀសវាងបាក់មុខក្នុងប្រការណាមួយនៅពេលសម្តែងច្រៀងនោះ។
សុន ស្រីពេជ្រ
ដែលកំពុងរវល់ស្ទើរពេញមួយថ្ងៃនៅកន្លែងហាត់សមជាមួយនឹងអ្នក
សិល្បៈផ្សេងទៀត បានឆ្លៀតពេលបន្តិច ហើយនិយាយថា៖ «ឥឡូវហ្នឹង
ខ្ញុំកំពុងហាត់សមបង
ដើម្បីចេញទៅច្រៀងនៅប្រទេសវៀតណាមស្អែកហ្នឹង(ថ្ងៃទី១៨ ឧសភា)»។
ដោយសារទីក្រុងហូជីមិញមានចម្ងាយមិនឆ្ងាយប៉ុន្មានពីរាជធានី
ភ្នំពេញ ការចេញច្រៀងនៅវៀតណាមលើកនេះ សុន ស្រីពេជ្រ សុខ ស៊ីឡាលីន
និងអ្នករួមដំណើរជាច្រើនទៀតនឹងត្រូវជួបជុំគ្នានៅសណ្ឋាគារ
ណាហ្គាវើលនៅពេលព្រឹក
ហើយនឹងត្រូវធ្វើដំណើរតាមរថយន្តក្រុងរបស់សណ្ឋាគារណាហ្គាវើល
ភ្លាមតែម្តង ហើយនាងនឹងវិលត្រឡប់មកដល់កម្ពុជាវិញនៅថ្ងៃទី២០
ខែឧសភា ។
ប្រវត្តិខ្លីៗរបស់ សុន ស្រីពេជ្រ
ធ្លាប់បណ្តែតខ្លួនជាក្មេងលក់ត្រកួនព្រលឹតមានជីវភាពខ្វះខាត
ដែល
មានឪពុកជាអ្នកចម្រៀងក្នុងក្រុមភ្លេងមង្គលការមួយនៅខេត្ត
បាត់ដំបង នៅពេលនេះ សុន ស្រីពេជ្រ
បាននិងកំពុងហក់ឡើងកូដគួរឲ្យភ្ញាក់ផ្អើលតាមរយៈអាជីពជាតារា
ចម្រៀងរបស់នាង
តែតារាចម្រៀងរូបនេះនៅតែចងចាំអតីតកាលរបស់ខ្លួនមិនអាចបំភ្លេច
បាន។
រំឭកដល់សំឡេងក្មេងស្រីម្នាក់ «ត្រកួនអើយត្រកួនៗ
មីងទិញត្រកួនទេ អ៊ំទិញត្រកួនទេ!» សុន ស្រីពេជ្រ
ស្ទើរស្រក់ទឹកភ្នែក ខណៈពេលនេះនាងមានហូបចុកគ្រប់គ្រាន់
មានសម្លៀកបំពាក់ស្អាតបាត តែភាពអត់ឃ្លាន
ភាពហេវហត់របស់នាងជាក្មេងស្រីក្នុងត្រកូលក្រីក្រម្នាក់នៅខេត្ត
បាត់ដំបងកាលពីប៉ុន្មានឆ្នាំមុនហាក់នៅសើមៗនៅឡើយ។
សុន ស្រីពេជ្រ មានស្រុកកំណើតនៅខេត្តបាត់ដំបង។
ឪពុករបស់នាងគឺតារាកំប្លែងជើងចាស់
និងជាតារាចម្រៀងកំប្លុកកំប្លែងលោក សង់ ស៊ីស ដែលមានឈ្មោះពិតថា
ម៉ារី សុន វ័យ៦៨ឆ្នាំ។ រីឯម្តាយឈ្មោះ សុន សឿត
ជាមេផ្ទះមានអាយុ៦៦ឆ្នាំ។ ស្រីពេជ្រ
មានបងប្អូន៧នាក់(ប្រុស៣ស្រី៤) នាងជាកូនទី៥។
ដោយសារមានឪពុកជាអ្នកសិល្បៈ និងដោយមានការតស៊ូយ៉ាងស្វិតស្វាញ
សុន ស្រីពេជ្រ ដែលជាក្មេងមានចរិតអៀនប្រៀនច្រើន
បានបណ្តុះខ្លួនក្លាយជាអ្នកសិល្បៈ។
ស្ថិតជាអ្នកសិល្បៈមិនសូវល្បីជាច្រើនឆ្នាំ សុន ស្រីពេជ្រ
ក៏មានរាសីឡើងខ្ពស់មិនធ្លាប់ស្រមៃដល់
ខណៈដែលត្រូវបានក្រសួងទេសចរណ៍ជ្រើសរើសឲ្យច្រៀងបទចម្រៀង
ផ្សព្វផ្សាយពីវិស័យទេសចរណ៍នៅកម្ពុជា។
ចំណុចនេះហើយដែលតារាវ័យ២៨ឆ្នាំរូបនេះ
ត្រូវបានផលិតកម្មរស្មីហង្សមាស មើលឃើញ
និងចុះកុងត្រាឲ្យនាងក្លាយតារាចម្រៀងរបស់រស្មីហង្សមាសពេញ
សិទ្ធិរហូតដល់សព្វថ្ងៃ៕
0 comments:
Post a Comment