បញ្ញើក្អែក
(បទពាក្យប្រាំពីរ)
១.ពូជបញ្ញើក្អែកដូចគ្នាទេ ប្តូរហៅអ័រគីដេដាំទុកតាំង
ចេញផ្កាលាស់ស្លឹកឈ្មោះបារាំង បិទបាំងរឿងដើមនៅឯព្រៃ ។
២.រីបញ្ញើក្អែកតោងដើមស្វាយ ត្រសុំរាងកាយគន់ត្រឈៃ
ម្ចាស់ស្វាយឃើញភ្លាមកើតទុក្ខភ័យ លកលៃកាប់ចោលខ្លាចសាយញាតិ ។
៣.គេមិនឱ្យតោងព្រោះចង្រៃ នាំស្វាយឱ្យក្ស័យលែងផ្លែទៀត
គេជេរគេដៀលពាក្យស៊កសៀត បញ្ញើក្អែកបៀតសម្លាប់ស្វាយ ។
៤.បញ្ញើក្អែកខ្លះតោងព្រៃខ្ពស់ បានសុខបានរស់ផ្កាគ្រប់កាយ
មនុស្សឃើញកាប់ផ្សាំដាំសប្បាយ ផ្សព្វផ្សាយឈ្មោះថា ផ្កាប្រពៃ ។
៥.តាមពិតអ័រគីដេបញ្ញើក្អែក ពូជគ្មានអ្វីប្លែកស្រុកដូចព្រៃ
តែរស់មិនស្មើខ្លះជួបជ័យ ឯខ្លះជួបភ័យគេខ្ពើមស្អប់ ។
៦.នេះឯងធម្មជាតិនៃលោកា ខ្លះលិចកាយាព្រោះឈាមកប់
ខ្លះឈាមអណ្តែតព្រោះប្រសប់ ជីកកប់សមធម៌លិចបាត់ទៅ ៕
(ដោយ ប៉ែន សមិទ្ធិ)
0 comments:
Post a Comment