ដោយ វណ្ណ វិចារ
2012-07-24
រចនាសម្ព័ន្ធដឹកនាំក្នុងគណបក្ស នរោត្តម រណឫទ្ធិ ចាប់ផ្ដើមបែកខ្ញែក ក្រោយពេលដែលគណបក្សនេះបរាជ័យក្នុងការចងសម្ព័ន្ធភាព ដើម្បីច្របាច់បញ្ចូលគ្នាជាមួយគណបក្ស ហ៊្វុនស៊ិនប៉ិច។
 |
RFA/Sok Serey ប្រធានគណបក្ស នរោត្តម រណឫទ្ធិ សម្ដេចក្រុមព្រះ នរោត្តម រណឫទ្ធិ ធ្វើសន្និសីទ កាសែត នៅដំណាក់ នារាជធានីភ្នំពេញ កាលពីថ្ងៃទី១៩ ខែមិថុនា ឆ្នាំ២០១២។ |
សេចក្ដីសម្រេចចុះថ្ងៃទី២១ ខែកក្កដា ចុះព្រះហស្តលេខាដោយសម្ដេចក្រុមព្រះ ប្រធានគណបក្ស បានបញ្ជាក់ថា លោក ឈឹម សៀកឡេង ដែលកំពុងបំពេញតួនាទីជាប្រធានស្ដីទី ត្រូវតែងតាំងជាអគ្គលេខាធិការគណបក្សជំនួសលោក សៅ រ៉ានី ដែលត្រូវបណ្ដេញចេញ។
អតីតអគ្គលេខាធិការគណបក្ស នរោត្តម រណឫទ្ធិ លោក សៅ រ៉ានី នៅថ្ងៃទី២៣ កក្កដា មានប្រសាសន៍ថា លោកដាក់ពាក្យបណ្ដឹងជាផ្លូវការទៅកាន់តុលាការរាជធានីភ្នំពេញ ដើម្បីស្វែងរកយុត្តិធម៌។ លោកបន្តថា លោកចង់ឲ្យមានការបង្រួបបង្រួមរវាងគណបក្សរាជានិយមទាំងពីរ ប៉ុន្តែព្រះអង្គម្ចាស់ នរោត្តម រណឫទ្ធិ មិនយល់ស្របដោយជឿសម្ដីមន្ត្រីមិនល្អមួយចំនួនទៅវិញ។
លោកបញ្ជាក់ថា ការដកហូតតំណែងលោកចេញពីគណបក្ស ជាអំពើខុសច្បាប់៖ «ដំណើរការហ្នឹង វាចេញដល់កណ្ដាលទន្លេទៅហើយ ខ្ញុំចង់ថា ឲ្យទូកហ្នឹង វាដល់ច្រាំងខ្ញុំចង់ធ្វើការងារសម្របសម្រួលមួយបញ្ចប់ការងារហ្នឹង ឲ្យលោកមកដឹកនាំ ហ៊្វុនស៊ិនប៉ិច ដង្កូវលោកបែរជាទន្លាក់កំហុសលើខ្ញុំទៅវិញ នៅក្បែរលោកច្រើនពេក ខ្ញុំចង់ដកដង្កូវចេញ»។
លោក សៅ រ៉ានី បន្តថា លោកដាក់ពាក្យបណ្ដឹងទៅកាន់សាលាដំបូងរាជធានីភ្នំពេញ ទាមទារ ទី១ សូមឲ្យទទួលស្គាល់សិទ្ធិកាន់កាប់ តួនាទី ភារកិច្ច អគ្គលេខាធិការ អគ្គលេខាធិការរង និងសមាជិកគណៈកម្មាធិការអចិន្ត្រៃយ៍ គណបក្ស នរោត្តម រណឫទ្ធិ ជាបណ្ដោះអាសន្ន។ ទី២ បង្គាប់ឲ្យចុងចម្លើយប្រគល់ត្រាគណបក្ស នរោត្តម រណឫទ្ធិ ឲ្យដើមបណ្ដឹង ដើម្បីគ្រប់គ្រងប្រើប្រាស់បន្តនិរន្តរភាពការងារប្រចាំថ្ងៃរបស់អគ្គលេខាធិការដ្ឋានគណបក្ស នរោត្តម រណឫទ្ធិ និងទី៣ សុំឲ្យព្យួរជាបណ្ដោះអាសន្ននូវសិទ្ធិរបស់ចុងចម្លើយ ក្នុងការដកបញ្ចប់ភារកិច្ច ឬដកតំណែង ឬបណ្ដេញចេញថ្នាក់ដឹកនាំគណបក្សគ្រប់លំដាប់ថ្នាក់។
យ៉ាងណាក៏ដោយ មន្ត្រីអ្នកនាំពាក្យគណបក្ស នរោត្តម រណឫទ្ធិ លោក ប៉ែន សង្ហា មានប្រសាសន៍ថា ព្រះអង្គម្ចាស់ នរោត្តម រណឫទ្ធិ ព្រះប្រធានគណបក្ស នរោត្តម រណឫទ្ធិ បានឡាយព្រះហស្តលេខាបញ្ឈប់តំណែងលោក សៅ រ៉ានី និងមន្ត្រីគណបក្សមួយចំនួនទៀត។ លោកបន្តថា មូលហេតុដែលបញ្ចប់តួនាទីមន្ត្រីគណបក្សទាំងនោះ មកពីពួកគាត់ទៅចរចានឹងលោក ញឹក ប៊ុនឆៃ ដោយមានបំណងបណ្ដេញសម្ដេចក្រុមព្រះ ចេញពីឆាកនយោបាយ៖ «អ្វីដែលខ្ញុំចង់និយាយ គឺថាលិខិតគឺជាលិខិតផ្លូវការរបស់គណបក្ស នរោត្តម រណឫទ្ធិ និងហត្ថលេខាដែលមានសុពលភាពរបស់សម្ដេចក្រុមព្រះ។ ព្រះអង្គក៏បានធ្វើលិខិតមួយ ដើម្បីបញ្ជាក់ពីការពិតទៀតផង»។លោកបន្តថា ការប្ដឹងផ្ដល់របស់លោក សៅ រ៉ានី ជាបញ្ហាផ្ទាល់ខ្លួនរបស់លោក សៅ រ៉ានី។
បញ្ហាទាំងអស់នេះ ត្រូវបានអ្នកវិភាគមើលឃើញថា ជាការបរាជ័យថ្មីមួយទៀតរបស់សម្ដេចក្រុមព្រះ នរោត្តម រណឫទ្ធិ ក្នុងការដឹកនាំគណបក្សនយោបាយ បន្ទាប់ពីការបែកបាក់ផ្ទៃក្នុងរបស់គណបក្ស ហ៊្វុនស៊ិនប៉ិច។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ មានប្រសាសន៍ថា ជម្លោះផ្ទៃក្នុងរបស់គណបក្ស នរោត្តម រណឫទ្ធិ បណ្ដាលមកពីការដឹកនាំរបស់សម្ដេចក្រុមព្រះមិនមានជោគជ័យ។
លោកបន្តថា សមាជិកនៅក្នុងគណបក្សនោះអស់ជំនឿចិត្តលើថ្នាក់ដឹកនាំ។ លោកបញ្ជាក់ថា មានកត្តាផ្សេងពីខាងក្រៅខ្លះដែរ ដូចជាការលូកដៃពីខាងក្រៅរបស់គណបក្សដទៃ ដែលចង់បំបែកបំបាក់ និងជាពិសេសផលប្រយោជន៍បុគ្គលតែម្តង៖ «ថ្នាក់ដឹកនាំអស់អនុភាព កាលណាបរាជ័យជាប់ៗគ្នាអីចឹង តាមធម្មតាគេត្រូវលាឈប់។ អ្នកថ្មីគឺថ្មី មានគំនិតថ្មី ដែលដឹកនាំទៅវិញ អាចមានគំនិតថ្មី កាលណានៅដដែលៗហ្នឹង គឺដឹកនាំអត់ទៅមុខទេ»។
ទន្ទឹមនឹងនេះ លោក សៅ រ៉ានី ឲ្យដឹងថា លោកបានដើរតាមសម្ដេចក្រុមព្រះជាយូរមកហើយ ដោយសុខចិត្តចោលតំណែងជាមន្ត្រីនគរបាលជាន់ខ្ពស់ ប៉ុន្តែទ្រង់ រណឫទ្ធិ នៅតែបោះបង់រូបលោកចោលទៀត ដោយសុខចិត្តជឿតាមពាក្យសម្ដីអ្នកនៅជុំវិញព្រះអង្គ។ ទោះជាយ៉ាងណាក្តី លោក ប៉ែន សង្ហា បដិសេធលើកឡើងរបស់លោក សៅ រ៉ានី ដោយលោកអះអាងថា ការដឹកនាំរបស់សម្ដេចក្រុមព្រះប្រកបដោយសេចក្តីសន្តោសប្រណី និងការអត់ឱនដល់កូនចៅនៅក្រោមបង្គាប់ តែអ្នកនៅក្រោមបង្គាប់តែងតែក្បត់ព្រះអង្គ ដើម្បីផលប្រយោជន៍ផ្ទាល់ខ្លួន ដោយមិនគិតពីប្រយោជន៍ជាតិ។
គណបក្ស នរោត្តម រណឫទ្ធិ កើតឡើងបន្ទាប់ពីការបែកបាក់របស់គណបក្ស ហ៊្វុនស៊ិនប៉ិច បន្ទាប់ពីមន្ត្រីជាន់ខ្ពស់គណបក្សបានបណ្ដេញព្រះអង្គចេញពីតំណែងជាព្រះប្រធានគណបក្ស ហ៊្វុនស៊ិនប៉ិច។ ព្រះអង្គត្រូវបានគេចោទថា មិនគិតការងារបក្ស គិតតែពីផលប្រយោជន៍ផ្ទាល់ខ្លួន ប៉ុន្តែសម្ដេចក្រុមព្រះបានធ្វើការបដិសេធជាញយដងរួចទៅហើយ។
កាលពីថ្ងៃទី១៦ ខែកក្កដា លោក សៅ រ៉ានី បានសរសេរលិខិតមួយថ្វាយសម្ដេចក្រុមព្រះ នរោត្តម រណឫទ្ធិ ពីកំណត់ហេតុនៃការចរចារវាងរូបលោក និងគណបក្ស ហ៊្វុនស៊ិនប៉ិច ពីគម្រោងការច្របាច់បញ្ចូលគ្នារវាងគណបក្សទាំងពីរ ព្រមទាំងស្នើឲ្យព្រះអង្គចាកចេញពីឆាកនយោបាយទៀត។ លោក សៅ រ៉ានី ក៏បានដាក់លិខិតថ្វាយទៅព្រះមហាក្សត្រ និងបិតាព្រះអង្គទៀតផង។
ចលនាច្របាច់បញ្ចូលគ្នាទៅជាបក្សតែមួយរវាងគណបក្ស ហ៊្វុនស៊ិនប៉ិច និងបក្ស នរោត្តម រណឫទ្ធិ បានលេចជារូបរាងឡើងវិញ ដោយការចុះហត្ថលេខាលើកិច្ចព្រមព្រៀងរួមគ្នា នៅព្រឹកថ្ងៃទី២៤ ខែឧសភា ឆ្នាំ២០១២ នាវិមានសន្តិភាព ដើម្បីស្ដារកិត្តិយសបក្សរាជានិយម ដែលធ្លាប់ឈ្នះឆ្នោតកាលឆ្នាំ១៩៩៣។ ប៉ុន្តែគម្រោងនេះបានជាប់គាំងជាថ្មីទៀត គឺនៅរយៈពេលមិនដល់២ខែផង បន្ទាប់ពីមានការព្រមព្រៀងនោះ។
អ្នកវិភាគយល់ថា ការបែកបាក់គណបក្ស ហ៊្វុនស៊ិនប៉ិច ពីពេលមុន និងគណបក្ស នរោត្ដម រណឫទ្ធិ ជាកំហុសដ៏ធំរបស់ថ្នាក់ដឹកនាំបក្ស ដែលពួកគេតែងតែមិនមានសាមគ្គីភាព និងចង់បានផលប្រយោជន៍រៀងៗខ្លួន ហើយប្រការទាំងអស់នេះនឹងនាំឲ្យពលរដ្ឋលែងសូវមានជំនឿលើគណបក្សរាជានិយម៕
0 comments:
Post a Comment