ដោយ ហង្ស សាវយុត
2012-07-12
ក្រុមមន្ត្រីជាន់ខ្ពស់ នៃក្រសួងកិច្ចការនារី មកពីបណ្ដាប្រទេសទន្លេមេគង្គក្រោមចំនួន៥ កំពុងជួបពិភាក្សាគ្នារយៈពេលពីរថ្ងៃ នៅឯខេត្តសៀមរាប។
 |
RFA/Hang Savyouth រដ្ឋមន្ត្រី និងអនុរដ្ឋមន្ត្រី នៃបណ្ដាប្រទេសទន្លេមេគង្គក្រោម ទាំង៥ ជួបពិភាក្សាគ្នាលើគោលនយោបាយលើកទី១ ស្តី ពីសមភាពយេនឌ័រ និងការលើកកម្ពស់ភាពអង់អាចរបស់ ស្ត្រី នាសណ្ឋាគារសូហ្វីតែល (Sofitel Hotel) ខេត្តសៀ មរាប កាលពីព្រឹកថ្ងៃទី១២ ខែកក្កដា ឆ្នាំ២០១២។ |
កិច្ចប្រជុំនេះ គឺផ្ដើមសន្ទនាអំពីគោលនយោបាយលើកទី១ ស្តីពីសមភាពយេនឌ័រ និងការផ្ដល់ភាពអង់អាចដល់ស្ត្រី ដើម្បីស្វែងរកនូវគំនិតសំខាន់ៗរួមគ្នា ក្នុងការជួយលើកស្ទួយស្ថានភាពស្ត្រីឱ្យប្រសើរឡើង។
ប្រទេសទន្លេមេគង្គក្រោមទាំង៥ ដែលកំពុងជួបប្រជុំនោះមាន ប្រទេសមីយ៉ាន់ម៉ា (Burma/Myanmar ) ប្រទេសឡាវ (Lao) ប្រទេសថៃ (Thailand) ប្រទេសវៀតណាម (Vietnam) និងប្រទេសកម្ពុជា (Cambodia)។
អ្នកស្រី អ៊ឹង កន្ថាផាវី ជារដ្ឋមន្ត្រីក្រសួងកិច្ចការនារី នៃប្រទេសកម្ពុជា អ្នកស្រីបានមានប្រសាសន៍នៅក្នុងបទសម្ភាសន៍ បន្ទាប់ពីបើកកិច្ចពិភាក្សា កាលពីព្រឹកថ្ងៃព្រហស្បតិ៍ ទី១២ ខែកក្កដា ថា ការជួបប្រជុំគ្នារវាងប្រទេសទាំង៥ នៃទន្លេមេគង្គក្រោម នេះ គឺជាការស្វែងរកឱ្យឃើញបញ្ហារួមគ្នាដែលជាឧបសគ្គដល់ស្ត្រី នៅក្នុងតំបន់ ហើយនឹងធ្វើការចែករំលែកបទពិសោធន៍គ្នា ដើម្បីដោះស្រាយ។
អ្នកស្រី អ៊ឹង កន្ថាផាវី បានបញ្ជាក់ថា ប្រទេសទាំង៥ បានរកឃើញបញ្ហាចំនួន ៤ចំណុច ដែលគេនឹងដាក់លើតុជជែកជាមួយគ្នា៖ «ពាក់ព័ន្ធទៅលើការអប់រំ ពាក់ព័ន្ធទៅលើបញ្ហាសុខភាព ពាក់ព័ន្ធទៅលើបរិស្ថាន និងពាក់ព័ន្ធទៅលើហេដ្ឋារចនាសម្ព័ន្ធ ដែលយើងនឹងពិគ្រោះយោបល់គ្នាក្នុងរវាងប្រទេសទាំង៥ ហ្នឹង។ ដោយសារតែស្ត្រីបច្ចុប្បន្នក្នុងរវាងប្រទេសទាំង៥ ហ្នឹង ឃើញថា វប្បធម៌ និងប្រពៃណី នៅមានគាបសង្កត់ទៅលើផ្នត់នៃគំនិតរបស់ស្ត្រី ក៏ដូចមាតាបិតា ដែលចេះតែបញ្ជូនស្ត្រីទៅរៀនសូត្រ នៅលើចំណេះដែលគាត់យល់ឃើញថាជាចំណេះសម្រាប់ស្ត្រី»។
សហរដ្ឋអាមេរិក គឺជាអ្នកដែលបានផ្ដួចផ្ដើមឱ្យមានកិច្ចពិភាក្សាស្តីពីសមភាពយេនឌ័រ និងការលើកកម្ពស់ភាពអង់អាចរបស់ស្ត្រីនេះ ក្នុងបំណងឱ្យបណ្ដាប្រទេសនៃទន្លេមេគង្គក្រោម ចាប់ផ្ដើមរៀបចំយុទ្ធសាស្ត្រជួយដល់ស្ត្រីនៅតំបន់អាស៊ីអាគ្នេយ៍។
អ្នកស្រី ម៉ាឡេន វើវៀ (Melanne Verveer) ឯកអគ្គរដ្ឋទូតសហរដ្ឋអាមេរិកទទួលបន្ទុកបញ្ហាស្ត្រីសកល បានមានប្រសាសន៍ថា សហរដ្ឋអាមេរិក និងប្រទេសចំនួន៥ ដែលជួបពិភាក្សាគ្នាពេលនេះក្នុងគោលបំណងធ្វើឱ្យមានការវិវឌ្ឍយុទ្ធសាស្ត្រដ៏សំខាន់មួយ ហើយក៏ជាកិច្ចសហប្រតិបត្តិការរួមគ្នាថ្មីមួយ ដើម្បីចែករំលែកបទពិសោធន៍ក្នុងការជួយដល់ស្ត្រីនៅក្នុងតំបន់ ដើម្បីឱ្យមានការផ្លាស់ប្ដូរផ្នែកសង្គម។
អ្នកស្រី ម៉ាឡេន វើវៀ ៖ «យើងដឹងថា ស្ត្រីម្នាក់គឺជាឆ្អឹងខ្នងនៃគ្រួសាររបស់គេ ជាឆ្អឹងខ្នងរបស់សហគមន៍ និងរបស់ជាតិទាំងមូលផង។ អំណាចរបស់ស្ត្រី គឺជាមូលដ្ឋានដ៏ចម្បងមួយ ដែលអាចឈានទៅរកការពិភាក្សាដើម្បីយកទៅអនុវត្តឱ្យមានការផ្លាស់ប្ដូរពីសេដ្ឋកិច្ច ដែលមានឱកាសឱ្យក្លាយទៅជាសន្តិសុខ ហើយយើងនឹងធ្វើការផ្លាស់ប្ដូរទម្លាប់ដែលមានការគាបសង្កត់ជាយូរមកហើយ ឱ្យឆ្ពោះទៅរកភាពប្រសើរមួយសម្រាប់ស្ត្រីពេលអនាគត»។
រដ្ឋមន្ត្រីក្រសួងកិច្ចការនារី នៃប្រទេសកម្ពុជា បានបញ្ជាក់ថា រដ្ឋាភិបាលកម្ពុជាបច្ចុប្បន្នកំពុងអនុវត្តគោលនយោបាយ ជំរុញឱ្យសមភាពយេនឌ័រ និងការលុបបំបាត់អំពើហិង្សាដល់ស្ត្រី ដោយរដ្ឋាភិបាលបានបង្កើនថវិកាទៅលើកម្មវិធីជាច្រើនជារៀងរាល់ឆ្នាំ។
ក្នុង១ឆ្នាំៗ ក្រសួងកិច្ចការនារីបានចំណាយប្រាក់ប្រមាណ ៣លានដុល្លារសហរដ្ឋអាមេរិក ដើម្បីធ្វើការងារជាច្រើនជួយដល់ស្ត្រីកម្ពុជាហើយ។ កាលពីពេលថ្មីៗ ប្រមុខនៃរាជរដ្ឋាភិបាលផ្ដល់ថវិកាចំនួន ២០០លានរៀល ដើម្បីធ្វើកិច្ចការជំនួយផ្នែកច្បាប់ ជួយទៅដល់ស្ត្រីដែលជាជនរងគ្រោះដោយអំពើហិង្សា៕
0 comments:
Post a Comment