ដោយ ហង្ស សាវយុត
2012-08-25
ក្រុមឧត្តមមន្ត្រីនៃក្រុមប្រឹក្សាសេដ្ឋកិច្ចអាស៊ាន មកពីបណ្ដាប្រទេសចំនួន១០ បានចាប់ផ្ដើមជួបប្រជុំគ្នាហើយ កាលពីព្រឹកថ្ងៃសៅរ៍ ទី២៥ ខែសីហា ដើម្បីរៀបចំសេចក្តីព្រាងជាច្រើន ព្រមទាំងធ្វើការពិនិត្យទៅលើរបាយការណ៍មួយចំនួន សម្រាប់ទុកជាឯកសារត្រៀមដាក់ជូនទៅក្នុងអង្គប្រជុំថ្នាក់រដ្ឋមន្ត្រីសេដ្ឋកិច្ចអាស៊ាន លើកទី៤៤ ដែលនឹងធ្វើឡើងក្នុងអំឡុងពេល២ថ្ងៃខាងមុខទៀតនេះ។
 |
ក្រុមឧត្តមមន្ត្រីនៃក្រុមប្រឹក្សាសេដ្ឋកិច្ចអាស៊ានទាំង១០ ជួបប្រជុំគ្នាធ្វើ សេចក្តីព្រាង និងពិនិត្យទៅលើរបាយការណ៍មួយចំនួន ដើម្បីត្រៀម ដាក់ជូនរដ្ឋមន្ត្រីសេដ្ឋកិច្ចអាស៊ាន ដែលនឹងជួបប្រជុំនៅពេលឆាប់ៗ នាសណ្ឋាគារអប្សរាអង្គរ ខេត្តសៀមរាប កាលពីថ្ងៃទី២៥ ខែសីហា ឆ្នាំ២០១២។ |
លោក កាន់ ច័ន្ទមេត្តា ជាអនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម របស់ប្រទេសកម្ពុជា លោកបានមានប្រសាសន៍បន្ទាប់ពីសម្រាកពីកិច្ចប្រជុំថា ក្រុមឧត្តមមន្ត្រីនៃក្រុមប្រឹក្សាសេដ្ឋកិច្ចអាស៊ាន កាលពីព្រឹកថ្ងៃសៅរ៍ ទី២៥ ខែសីហា គឺបានធ្វើការពិភាក្សារួមគ្នាអំពីតំបន់វិនិយោគ និងធ្វើការពិនិត្យទៅលើរបាយការណ៍មួយចំនួន ស្ដីពីតំបន់សេរីអាស៊ាន៖ «កាលពីព្រឹកមិញហ្នឹង កិច្ចប្រជុំមានការពិភាក្សាគ្នា ដោយផ្លាស់ប្ដូរនូវយោបល់ជាច្រើន។ ប៉ុន្តែអត់ទាន់បានលទ្ធផលនោះទេ។ ប្រហែលជាបានលទ្ធផល នៅពេលដែលចប់ព្រឹកនេះ ឬក៏អាចជារសៀលនេះ ឬក៏អាចថ្ងៃស្អែក។ របាយការណ៍នេះជាធម្មតា កាលណាឧត្តមមន្ត្រីសេដ្ឋកិច្ចអាស៊ាន គាត់នឹងជូនរដ្ឋមន្ត្រីសេដ្ឋកិច្ចអាស៊ាន ដើម្បីអនុម័តរាយការណ៍ជូនថ្នាក់ដឹកនាំ»។
ដំណើរការនៃកិច្ចប្រជុំក្រុមរដ្ឋមន្ត្រីសេដ្ឋកិច្ចអាស៊ាន ដែលមានរយៈពេល៧ថ្ងៃ នៅក្នុងខេត្តសៀមរាប ប្រទេសកម្ពុជា ក៏នឹងមានការជួបពិភាក្សារវាងក្រុមរដ្ឋមន្ត្រីបណ្ដាប្រទេសអាស៊ាន ជាមួយនឹងប្រទេសក្រៅតំបន់ចំនួន៨ផ្សេងទៀតដែរ។
ប្រទេសចំនួន៨ គឺមានសហរដ្ឋអាមេរិក អូស្ត្រាលី កាណាដា ឥណ្ឌា នូវែលហ្សេឡង់ រុស្ស៊ី ចិន និងជប៉ុន មានគម្រោងបញ្ជូនមន្ត្រីរបស់គេ ដើម្បីជួបពិភាក្សាជាមួយក្រុមរដ្ឋមន្ត្រីពាណិជ្ជកម្មរបស់បណ្ដាប្រទេសអាស៊ាន នៅរយៈពេលពីរបីថ្ងៃខាងមុខនេះ។
សេចក្តីប្រកាសព័ត៌មានមួយរបស់ស្ថានទូតអាមេរិកប្រចាំកម្ពុជា បានឱ្យដឹងថា សហរដ្ឋអាមេរិកមានគម្រោងនឹងបញ្ជូនលោក រ៉ន ខឺក (Ron Kirk) ដែលជាទីប្រឹក្សាពាណិជ្ជកម្មជាន់ខ្ពស់របស់លោកប្រធានាធិបតី អូបាម៉ា (Obama) មកកាន់កម្ពុជា ចាប់ពីថ្ងៃទី៣០-៣១ ខែសីហា ដើម្បីចូលរួមកិច្ចប្រជុំជាមួយរដ្ឋមន្ត្រីសេដ្ឋកិច្ចអាស៊ាន និងជួបប្រជុំផ្នែកធុរកិច្ចកំពូលរវាងសហរដ្ឋអាមេរិក អាស៊ាន ផង៕
0 comments:
Post a Comment