ដោយ ស៊ុន ណារិន ថ្ងៃពុធ ទី08 សីហា ឆ្នាំ2012 ម៉ោង11:58
ខុទ្ទកាល័យនាយករដ្ឋមន្រ្តី ហ៊ុន សែន បានបដិសេធលិខិតក្នុងទម្រង់ផ្លូវការមួយដែលមានហត្ថលេខាលោកនាយករដ្ឋមន្រ្តី ហ៊ុន សែន និយាយអំពីការចូលបំភ្លឺរបស់លោកនាយករដ្ឋមន្រ្តីក្នុងរដ្ឋសភាទាក់ទងនឹងបញ្ហាព្រំដែន គឺធ្វើឡើងតាមការណែនាំរបស់នាយករដ្ឋមន្រ្តីវៀតណាម។ មន្រ្តីខុទ្ទកាល័យនាយករដ្ឋមន្រ្តីអះអាងថា នេះជាអំពើដ៏ថោកទាប រកអ្វីប្រៀបផ្ទឹមមិនបានរបស់ជននយោបាយមួយចំនួន ដែលហ៊ានលេងល្បែង តែខ្លាចចាញ់ម្ល៉ោះហើយត្រូវលួចបន្លំ។ ចំណែកឯលិខិតរបស់លោក ហេង សំរិន ដែលត្រូវបានអះអាងថាក្លែងបន្លំដែរនោះ បង្ហាញថា លិខិតរបស់លោកនាយករដ្ឋមន្រ្តី ហ៊ុន សែន ទាក់ទងនឹងបញ្ហាព្រំដែន គឺមិនអាចផ្សព្វផ្សាយបានទេ ព្រោះអាចនាំឲ្យមានទំនាស់ជាមួយប្រទេសវៀតណាម ដែលជាអ្នកមានគុណរបស់ប្រជាជនកម្ពុជា។
អ្នកស្រាវជ្រាវឯករាជ្យជាន់ខ្ពស់ លោក កែម ឡី លើកឡើងថា នេះជាការប្រណាំងប្រជែងផ្នែកនយោបាយ ដែលអាចនាំឲ្យមានអស្ថេរភាពក្នុងសង្គម ៖ “ខ្ញុំគិតថា ទីមួយវាឆ្នុះបញ្ចាំងពីអសីលធម៌ ក្នុងចំណោមអ្នកនយោបាយ ទោះបីអ្នកនយោបាយ ទោះបីនយោបាយស្តាំក៏ដោយ ឆ្វេងក៏ដោយ កណ្តាលក៏ដោយ យើងឃើញថាភាពអសីលធម៌ហ្នឹង កាន់តែច្រើនឡើងៗ ហើយទីពីរខ្ញុំគិតថារបៀប ប្រកួតប្រជែងមិនមានតម្លាភាព របៀបប្រកួតប្រជែងមិនលំហរ របៀបប្រកួតប្រជែងមិនមានការចូលរួម អញ្ចឹងជាចំនុចដែលខាតបង់មួយ ទៅដល់ស្រុកខ្មែរយើង ខ្ញុំគិតថាចំនុចនេះ ប្រសិនបើមានច្រើឡើងៗ វាធ្វើឲ្យមានអស្ថេរភាពសង្គមដែរ ផលអវិជ្ជាមានរបស់វាណា។”
ស្តាប់សំឡេង៖
លោកថា ការផ្សព្វផ្សាយបែបនេះ អាចនាំឲ្យរដ្ឋាភិបាលកាន់តែរឹតបន្តឹងបន្ថែម លើការប្រើប្រាស់អ៊ិនធើណែតនៅកម្ពុជា ជាពិសេសបណ្តាញទំនាក់ទំនងសង្គមហ្វេសប៊ុក ៖ “ខ្ញុំគិតថា ចំនុចទាំងអស់នេះ ជំរុញឲ្យរដ្ឋាភិបាល បង្កើតច្បាប់ហើយ ហើយច្បាប់នេះ អាចវានឹងតឹងតែងទៅទៀតណាស។”
យោងតាមការប៉ាន់ស្មាន បច្ចុប្បន្ន អ្នកប្រើប្រាស់អ៊ិនធើណែតនៅកម្ពុជា មានប្រមាណជិត ១លាននាក់ ដែលក្នុងនោះ មានប្រមាណជា ៥០ម៉ឺននាក់ ប្រើប្រាស់ហ្វេសប៊ុក ហើយភាគច្រើនជាយុវជន។ ស្របពេលនេះផងដែរ រដ្ឋាភិបាល កំពុងតែពង្រាងច្បាប់គ្រប់គ្រងប្រព័ន្ធអ៊ិនធើណែតនៅកម្ពុជា។អ្នកជំនាញខាងសរសេរប្លក(blog) និងបណ្តាញទំនាក់ទំនងសង្គម កញ្ញា ចក់ សុភាព មានប្រសាសន៍ថា ការផ្សព្វផ្សាយព័ត៌មាននេះ មិនមែនចេញពីរដ្ឋាភិបាលនោះទេ បើទោះបីជាការប្រើប្រាស់អ៊ិនធើណែតនៅកម្ពុជា កំពុងតែកើនឡើងក៏ដោយ។ កញ្ញាថា រដ្ឋាភិបាលខ្លួនឯង ក៏មិនអាចយកបញ្ហាមួយនេះ មកធ្វើជាលេសមួយក្នុងការគ្រប់គ្រងការផ្សព្វផ្សាយព័ត៌មានលើប្រព័ន្ធអ៊ិនធើណែតនោះទេ ៖ “អញ្ចឹងខ្ញុំគិតថា វាមិនមែនជាហេតុផលមួយ ដែលរដ្ឋាភិបាលនៅពីក្រោយខ្នងនេះទេ។ ប៉ុន្តែដូចនាងខ្ញុំនិយាយអញ្ចឹងថា បើទោះប្រភពនេះ ចេញពីខាងណាក៏ដោយ ក្នុងផ្លូវដូចថា ក្នុងផ្លូវមួយ ដែលរដ្ឋាភិបាល មានគោលបំណង ទប់ស្កាត់ហើយគាត់ចេញលិខិតនេះ វាប្រហែល ទៅមិនរួច ហើយមួយទៀតគេថា បើសិនជាខាង ប្រឆាំងណាមួយ ជាមួយរដ្ឋាភិបាលគាត់ចង់ ផ្សព្វផ្សាយព័ត៌មានមិនពិត ក្នុងគោលបំណងប្រមាថអីនោះ នោះគឺជារឿងមួយទៀត ហើយខ្ញុំគិតថា នោះបើក្នុងវិធីណាក៏ដោយ វាមិនគួរជាលេះមួយ ដែលយើង!!!រដ្ឋាភិបាល តាក់តែងគោលនយោបាយយកមក ទៀមទារលេះក្នុងការទប់ស្កាត់ ប្រព័ន្ធអ៊ិធើណែតទេចា។”
អ្នកវិភាគសង្គម លោក ឡៅ ម៉ុងហៃ វិភាគថា នេះអាចជាបញ្ហានយោបាយនៅពីក្រោយ តែលោកថាមានបុគ្គលអសីលធម៌មួយចំនួន កាត់តក្លែងបន្លំ ដូចដែលកើតឡើងនៅប្រទេសដទៃផងដែរ។ លោកថា អ្នកផ្សព្វផ្សាយព័ត៌មាននេះ ចង់ឲ្យមានចលាចលក្នុងសង្គម ស្របពេលដែលកម្ពុជា នឹងមានការបោះឆ្នោតថ្នាក់ជាតិនៅឆ្នាំ២០១៣ ៖ “ក្រែងលោផ្សព្វផ្សាយអញ្ចឹង ស្ថានការណ៍ហ្នឹង វាអាប់អួលទៅទៀត ជាពិសេសគឺ មុនការបោះឆ្នោត ២០១៣ គឺឆ្នាំក្រោយអីអញ្ចឹងណា។”
ទាក់ទងនឹងព័ត៌មានដែលថា លោក ជា ស៊ីម ទទួលមរណភាពនោះ លោក ឡៅ ម៉ុងហៃបានពន្យល់ថា ៖ ”អញ្ចឹងឃើញថា ការណាមានមរណភាពអីអញ្ចឹង មានការផ្លាស់ប្តូរអញ្ចឹងទៅ មានការគិតឡើង គិតចុះ ពីសម្នាក់ដែលបាន អ្នកទទួលស្គាល់ដំណឹងហ្នឹង។”
ចំណែក ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានលើកឡើងថា ការផ្សព្វផ្សាយព័ត៌មានបែបនេះ គេរំពឹងថា នឹងមានហើយនៅក្នុងសង្គម ដែលប្រើប្រាស់ប្រព័ន្ធអ៊ិនធើណែត ហើយលោកថា ព័ត៌មាននេះ អាចចេញពីអ្នកចង់រិះគន់រដ្ឋាភិបាល ហើយលោកចាត់ទុកព័ត៌មានទាំងអស់នោះ ជាព័ត៌មានមិនបានការ ៖ “ព័ត៌មានទាំងអស់នេះ មកពីបុគ្គលមួយចំនួនតូច ដែលចេះតែចង់ បំភ្លៃលេង ពេលខ្លះចង់បំភ្លៃលេង ជួនខ្លះចង់មានឆន្ទៈអីមួយ អាចសុទ្ធតែរឿងគ្មានបានការសំរាប់ប្រទេសជាតិទាំងអស់។”
ទោះបីជាយ៉ាងណាក៏ដោយ លោក អ៊ូ វីរៈ បន្ថែមថា ប្រជាពលរដ្ឋគួរតែពិចារណាប្រភពនៃព័ត៌មានឲ្យបានច្បាស់លាស់ និងមានការប្រុងប្រយ័ត្ននូវព័ត៌មានទំាងអស់នោះ៕
0 comments:
Post a Comment