ដោយ ម៉ម មុនីរតន៍
2012-09-01
មន្ត្រីរដ្ឋាភិបាលឲ្យដឹងថា ការសម្ពោធជាផ្លូវការនូវរូបសំណាក់មេទ័ព ២រូប ដែលគេចាត់ទុកជាមេទ័ពដែលមានកេរ្តិ៍ឈ្មោះល្បីល្បាញ និងមហិទ្ធិឫទ្ធិការពារទឹកដីក្នុងសម័យលង្វែក គឺតេជោមាស និងតេជោយ៉ត ធ្វើឡើងចំថ្ងៃកំណើតរបស់នាយករដ្ឋមន្ត្រីលោក ហ៊ុន សែន។
+02.png) |
| (Photo: CEN) |
លោក កែប ជុតិមា អភិបាលរាជធានីភ្នំពេញ ឲ្យដឹងក្នុងពិធីសម្ពោធរូបសំណាកមេទ័ពទាំងពីរនៅសួនច្បារមាត់ទន្លេ មុខវត្តឧណ្ណាលោម ក្រុងភ្នំពេញ នៅថ្ងៃទី១ កញ្ញា ថា ថ្ងៃសម្ភោធរូបសំណាកនេះ គឺចំថ្ងៃកំណើតរបស់លោក ហ៊ុន សែន គឺថ្ងៃ ១៥កើត ឆ្នាំរោង។
លោក កែប ជុតិមា ចាត់ទុកថា ក្នុងចំណោមមេទ័ព ៤៩នាក់ ដែលទទួលបានគោរមងារជា "តេជោ" ក្នុងនោះក៏មានលោកនាយករដ្ឋមន្ត្រី ហ៊ុន សែន ដែលគេគិតថា សាកសមក្នុងការទទួលបានឋានៈមួយនេះសម្រាប់ជាតិមាតុភូមិ។
លោក កែប ជុតិមា៖ «ថ្ងៃនេះជាថ្ងៃ ១៥កើតពេញបូណ៌មី ខែស្រាពណ៍ ឆ្នាំរោង ចត្វាស័ក ពុទ្ធសករាជ ២៥៥៦ ដែលជាទិវាខួបមួយចក្ររាសីរបស់សម្ដេចអគ្គមហាសេនាបតី ហ៊ុន សែន។ ការចាប់បដិសន្ធិរបស់សម្ដេចតេជោនៅលើមាតុភូមិយើង គឺជាការបង្ហាញអំពីភ័ព្វសំណាងរបស់ប្រជាជនកម្ពុជាដែលបានទទួលតួអង្គដ៏ខ្លាំងក្លា ហើយដែលប្រជាជនកម្ពុជា ទូទាំងរាជធានីសូមអនុញ្ញាតដ៏ខ្ពង់ខ្ពស់ពីសម្ដេចអគ្គមហាសេនាបតីតេជោ សូមប្រសិទ្ធិនាមជូនសម្ដេចជាមហាបុរសនៃប្រវត្តិសាស្ត្រនាឱកាសដ៏មហាប្រសើរនេះ»។
ទាក់ទិនករណីនេះ លោក កែប ជុតិមា ឲ្យដឹងថា អ្វីដែលដែលលោក ហ៊ុន សែន ទទួលបានគោរមងារដូចអតីតមេទ័ពដែរនោះ ក៏ព្រោះនាយករដ្ឋមន្ត្រី លោក ហ៊ុន សែន ជាមនុស្សដែលមានបុណ្យវាសនា និងឥទ្ធិពលដែលបានសម្រេចកិច្ចការមួយចំនួនសម្រាប់ប្រទេសជាតិ រួមមានការរំដោះប្រទេសជាតិពីរបស់ខ្មែរក្រហម ការបញ្ចប់ជម្លោះរវាងផ្ទៃក្នុងខ្មែរនិងខ្មែរ នយោបាយឈ្នះៗកសាងសន្តិភាព និងអាចរក្សាបាននូវបូរណភាពទឹកដីពីការឈ្លានពានរបស់បរទេសចាប់ពីក្រោយសម័យអង្គរ ការធ្វើបដិវត្តជលផលបឹងទន្លេសាប ដែលអូសបន្លាយជាងមួយសតវត្ស និងកំណែទម្រង់ដីធ្លីសម្រាប់ពលរដ្ឋ។ក៏ប៉ុន្តែបញ្ហានេះត្រូវបានមន្ត្រីបក្សប្រឆាំង និងអង្គការសង្គមស៊ីវិលដែលឃ្លាំមើលការវិវត្តន៍ស្ថានការណ៍សង្គមគិតថា លោក ហ៊ុន សែន ពុំមែនជាវីរជនទេ គឺគ្រាន់តែជាអ្នកក្លាហាន ព្រោះប្រព័ន្ធមួយចំនួនដូចជាអំពើពុករលួយ និងការរំលោភសិទ្ធិមនុស្សនៅតែបន្តញាំញីសង្គមកម្ពុជា ដែលគេរកឃើញថា នៅមានកម្រិតខ្ពស់នៅឡើយ។
លោក ស៊ឺន ស៊ូប៊ែរ្តិ៍ មន្ត្រីជាន់ខ្ពស់របស់គណបក្សសិទ្ធិមនុស្ស ចាត់ទុកថា ការព្យាយាមលើកកម្ពស់តម្លៃលោក ហ៊ុន សែន ទៅនឹងអតីតមេដឹកនាំក្នុងសម័យមុននោះ គឺជាប្រការដែលគួរឲ្យខ្មាសអៀន។លោកគិតថា បើតាមច្បាប់អន្តរជាតិ នយោបាយរបស់រដ្ឋាភិបាលដែលដឹកនាំដោយនាយករដ្ឋមន្ត្រីលោក ហ៊ុន សែន គឺពុំបាននាំនូវការចំណេញសម្រាប់ជាតិនោះទេ។
លោក ស៊ឺន ស៊ូប៊ែរ្តិ៍៖ «កាលតេជោទាំងប៉ុន្មានហ្នឹង ខ្ញុំមិនសូវស្គាល់ប្រវត្តិសាស្ត្រច្បាស់ទេ។ ក៏ប៉ុន្តែបើខ្ញុំគិតទៅតេជោថ្មីនេះ មុននឹងលោកបានទទួលងារពីព្រះមហាក្សត្រហ្នឹង ...បើប្រៀបធៀបទៅនៅស្រុកបារាំង គេថារបបនៃសហការជាមួយបរទេសឈ្លានពានបាត់ទៅហើយហ្នឹង»។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា និងជាអ្នកវិភាគសង្គម។ លោកគិតថា គេគួររំលឹកគុណចំពោះមេដឹកនាំសំខាន់ៗមួយចំនួនទៀតដែលពលិកម្មដើម្បីជាតិក្នុងអតីតកាលបន្ថែមពីនេះ។ លោកចាត់ទុកថា នេះការព្យាយាមបង្ហាញពីឥទ្ធិពលរដ្ឋរបស់លោក ហ៊ុន សែន ដែលទទួលបានងារជាតេជោដែរនោះ។
លោក អ៊ូ វីរៈ៖ «អ្នកដែលបានពលីជីវិតដោយសារសេរីភាពខ្ញុំថាជារឿងមួយដែលចាំបាច់ ប៉ុន្តែរឿងថ្នាក់ដឹកនាំអ្នកនយោបាយជាទូទៅ នៅក្នុងរបបប្រជាធិបតេយ្យអ្នកនយោបាយអត់ឲ្យមានឈ្មោះ អត់ឲ្យមានអីអ៊ីចឹងទេ នៅតាមផ្លូវនៅតាមអីក៏ដោយ គឺទាល់តែអ្នកស្លាប់ហើយទើបគេចាប់ផ្តើមជជែកពីការដាក់ឈ្មោះ។ ប៉ុន្តែទោះជាយ៉ាងណាក៏ដោយគេមិនដែលដាក់ឈ្មោះនៅពេលអ្នកនៅរស់ ឬនៅពេលធ្វើនយោបាយនៅឡើយទេ។ ខ្ញុំមើលទៅជារឿងសោកស្ដាយនៃលទ្ធិប្រជាធិបតេយ្យមួយដែលមិនទាន់ចាស់ទុំទាល់តែសោះបាទ! ហើយយើងឃើញមានការប្រើប្រាស់តួនាទី និងអំណាចដើម្បីលាបពណ៌បែបហ្នឹងចំពោះសាធារណជនជារឿងមួយមិនមែនសបស្របតាមលទ្ធិប្រជាធិបតេយ្យ»។
ទាក់ទិនករណីនេះមន្ត្រីនិយាយថា រូបសំណាកតេជោមាស និងតេជោយ៉ត ដែលគេរៀបចំនៅក្បែរមាត់ទន្លេនេះស្ថិតខាងមុខសួនវត្តឧណ្ណាលោម ក្នុងសង្កាត់ផ្សារកណ្ដាលទីមួយ ខណ្ឌដូនពេញ។ រូបសំណាកទាំងពីរនេះត្រូវគេសាងឡើងអំពីស្ពាន់កម្ពស់ ៣,០៦ម៉ែត្រ ជិះនៅលើខ្នងសេះ មុខបែរទៅទិសពាយព្យ គឺទិសខាងលិចឆៀងខាងជើង ដោយឈរលើផ្ទាំងថ្មដាធម្មជាតិប្រវែង ៥ម៉ែត្រ កម្ពស់ ១,៨០ម៉ែត្រ និងអបដោយស្មៅពណ៌បៃតងព័ន្ធជុំវិញ។ ការសាងសងរូបសំណាកទាំងពីរនេះត្រូវចំណាយពេលជិត ៥ខែ ដោយគិតចាប់ថ្ងៃទី២ ខែមេសា ហើយបញ្ចប់ជាស្ថាពរនៅថ្ងៃទី២៥ ខែសីហា និងសម្ពោធជាផ្លូវការនៅថ្ងៃទី១ ខែកញ្ញា ឆ្នាំ២០១២។
កិច្ចផ្ដួចផ្ដើមដែលនាំឲ្យមានរូបសំណាកពីមេទ័ពទាំងពីរនេះឡើង គឺក្នុងន័យរំលឹកនូវគុណបំណាច់ និងវីរភាពក្នុងពេលដែលមេទ័ពទាំងពីរតស៊ូប្រយុទ្ធប្រឆាំងនឹងសត្រូវឈ្លានពានទឹកដីកម្ពុជា នៅចន្លោះសតវត្សទី១៦-១៧ នៃគ្រិស្តសករាជជាមួយប្រទេសថៃ ក្នុងរាជព្រះបាទជ័យជេដ្ឋាទី២ នាសម័យលង្វែក និងឧត្តុង្គ៕
0 comments:
Post a Comment