បាត់ដំបងៈ មន្ត្រីជាន់ខ្ពស់គណបក្សប្រជាជនម្នាក់ បានរងនូវការចោទប្រកាន់ថា បានប្រើលុយ ទិញសន្លឹកឆ្នោតពីសកម្មជន គណបក្សប្រឆាំង នៅក្នុងការបោះ-ឆ្នោតព្រឹទ្ធសភាដែលនឹងប្រព្រឹត្តទៅនាថ្ងៃទី២៩ខែមករានេះ។ នេះបើយោងតាមមន្ត្រីបក្សប្រឆាំង។
លោក ជា ជីវ សមាជិកក្រុមប្រឹក្សាខេត្តបាត់ដំបង មកពីគណបក្ស សម រង្ស៊ី បានថ្លែងប្រាប់ភ្នំពេញ ប៉ុស្តិ៍ កាលពីម្សិលមិញថា លោកបានដាក់ពាក្យប្តឹងរួចហើយ ទៅគណៈកម្មាធិការរៀបចំការបោះឆ្នោតខេត្តកាលពីថ្ងៃសៅរ៍ប្រឆាំងនឹងលោក ជាម ប៉េអា សមាជិកគណបក្សប្រជាជន ដោយចោទប្រកាន់គាត់ថាទិញសមាជិកក្រុមប្រឹក្សាសង្កាត់ទួលតាឯក ក្រុងបាត់ដំបង ក្នុងតម្លៃ ៧០០ ដុល្លារ ដើម្បីឲ្យបោះឆ្នោត ជូនគណបក្សប្រជាជន។
លោក ជា ជីវ បានគូសបញ្ជាក់ថា៖ «ខ្ញុំប្តឹងទៅគណៈកម្មាធិការរៀបចំការបោះឆ្នោតខេត្តឲ្យដាក់ទោសលោក ជាម ប៉េអា ពីបទទិញសន្លឹកឆ្នោតពីសមាជិកក្រុមប្រឹក្សាសង្កាត់ទួលតាឯក លោក ម៉ក់ រ៉ាមកពីគណបក្សសមរង្ស៊ី»។
លោកបន្តថា ក្រុមលោក ជាម ប៉េអា បានទូរស័ព្ទរកលោក ម៉ក់ រ៉ា កាលពីល្ងាចថ្ងៃសុក្រ ទី ២០ ខែមករា ដោយប្រាប់គាត់ឲ្យទៅជួបនៅសណ្ឋាគារបាណន់ដើម្បីនិយាយគ្នាអំពីការទិញសន្លឹកឆ្នោត។ លោក ជា ជីវ បានអះអាងថា នៅពេលជួបជាមួយលោក ម៉ក់ រ៉ា លោក ជាម ប៉េអា បានឲ្យប្រាក់លោក ម៉ក់ រ៉ា ២០០ ដុល្លារសិន ហើយសន្យាថា បើពុំមានការប្តឹងប្តល់អ្វីទេ គាត់នឹងប្រគល់ប្រាក់ ៥០០ ដុល្លារបន្ថែមទៀត នៅក្រោយការបោះឆ្នោតព្រឹទ្ធសភា។ លោកជា ជីវ បន្តថា លោកជាម ប៉េអា បាននិយាយទៅកាន់លោក ម៉ក់ រ៉ា ថា តាមគោលការណ៍ គណបក្សប្រជាជន ទិញសន្លឹកឆ្នោត ពីសមាជិកក្រុមប្រឹក្សាឃុំសង្កាត់គណបក្ស សម រង្ស៊ី ដើម្បីឲ្យបោះឆ្នោតឲ្យគណបក្សប្រជាជន នៅក្នុងការបោះឆ្នោតព្រឹទ្ធសភាក្នុងតម្លៃតែមួយលានរៀលតែប៉ុណ្ណោះ ប៉ុន្តែថា លោក ជាម ប៉េអា ហ៊ានឲ្យ ៧០០ ដុល្លារ ដើម្បីទិញលោក ម៉ក់ រ៉ា ព្រោះលោក ជាម ប៉េអា ស្គាល់លោក ម៉ក់ រ៉ា ជាយូរមកហើយ។
លោក ម៉ក់ រ៉ា បានឯកភាពនឹងការលើកឡើងរបស់លោក ជា ជីវ ដោយថ្លែងថា លោកបានជួបជាមួយលោក ជាម ប៉េអា និងមន្ត្រីរបស់គាត់ ២ រូបទៀត នៅក្នុងបន្ទប់មួយនៃសណ្ឋាគារបាណន់ នៅវេលាម៉ោងជាង ៩ យប់ និងថា លោក ជាម ប៉េអា បានយកឯកសារ ៣ ច្បាប់ ដែលរួមមានកិច្ចសន្យាខ្ចីប្រាក់ ពាក្យសុំចូលគណបក្សប្រជាជនកម្ពុជា និងទម្រង់បែបបទបោះឆ្នោត ហើយបានប្រាប់លោកឲ្យផ្តិតមេដៃ លើកិច្ចសន្យា និងពាក្យសុំចូលជាសមាជិកគណបក្សប្រជាជន។
លោក ម៉ក់ រ៉ា គូសបញ្ជាក់ថា៖«ពេលជួបគ្នាក្នុងបន្ទប់ [លោក ជាម ប៉េអា]និយាយថា [គាត់] ឲ្យ[ខ្ញុំ] ២០០ ដុល្លារ ហើយឲ្យខ្ញុំ ផ្តិតមេដៃលើឯកសារបញ្ជាក់ថា ជាកិច្ចសន្យាខ្ចីប្រាក់»។ លោកបន្តថា៖«ពេលឃើញហេតុការណ៍នេះ ខ្ញុំមិនចង់ប្រព្រឹត្តបែបនេះទេ ប៉ុន្តែដោយសារបារម្ភពីសុវត្ថិភាព ខ្ញុំត្រូវអនុវត្តតាមពួកគេ។ ខ្ញុំមានសំឡេងលោក ជាម ប៉េអា ធ្វើជាភស្តុតាងនិយាយគ្នាទៅវិញទៅមក»។
លោក វន ពន ប្រធានគណៈកម្មាធិការរៀបចំការបោះឆ្នោតខេត្ត បានថ្លែងថា លោកបានកោះហៅភាគីទាំង ២ មកសួរនាំកាលពីថ្ងៃម្សិលមិញ ហើយនៅលើកទី ២ គណៈកម្មាធិការ នឹងធ្វើការផ្សះ-ផ្សាដើមបណ្តឹង និងចុងបណ្តឹង ហើយបើសិនភាគីទាំង ២ មិនអាចផ្សះផ្សាបានទេ គណៈកម្មា-ធិការបោះឆ្នោត នឹងបើកសវនា-ការលើបណ្តឹងនោះ។
លោក ជាម ប៉េអា បានបដិ-សេធមិនធ្វើអធិប្បាយពីម្សិល-មិញដោយថ្លែងថា កំពុងជាប់រវល់ប្រជុំ រីឯលោក អ៊ុក វង្ស ប្រធានក្រុមប្រឹក្សាខេត្តបាត់ដំបងរបស់គណបក្សប្រជាជន ក៏បានច្រានចោលមិនធ្វើអធិប្បាយផងដែរ ដោយគ្រាន់តែឆ្លើយតបថា លោកកំពុងជាប់រវល់បើកបរ៕ CR
0 comments:
Post a Comment