សុក្រ 20 មករា 2012 5:00 PM | 
340 Views
340 Views
ប្រធានសហភាពសហជីពកម្ពុជាបានឲ្យដឹងថា ពេលនេះរូបសំណាកសពលោក ជា វិជ្ជា អតីតប្រធានសហជីពសេរីកម្មករ នៃព្រះរាជាណាចក្រកម្ពុជាដែលឃាតករបានបាញ់សម្លាប់កាលពីថ្ងៃទី២២ មករា ឆ្នាំ២០០៤នោះ កំពុងរៀបចំរចនាដោយក្រុមអ្នកជំនាញ ក្រោយពីនាយករដ្ឋមន្រ្តីបានសម្រេចផ្តល់ទីតាំងសួនច្បារខាងលិចវិមានឯករាជ្យរួចមកនោះ។
វីរបុរស ជា វិជ្ជា កាលនៅរស់
លោក រ៉ុង ឈុន ប្រធានសហភាពសហជីពកម្ពុជាបាននិយាយថា រូបសំណាកលោក ជា វិជ្ជា នឹងត្រូវគេសាងសង់មួយជំហរខ្លួន ដែលមានកម្ពស់១,៦៨ម៉ែត្រ ប៉ុន្តែលោកមិនបានដឹងនឹងត្រូវចំណាយថវិកាអស់ប៉ុន្មាននោះទេ។
ចំពោះថវិកាសម្រាប់សាងសង់រូបសំណាកនេះ លោក រ៉ុង ឈុន បានឲ្យដឹងថា គេគ្រោងនឹងប្រើប្រាស់ថវិកាមូលនិធិ ជា វិជ្ជា ដើម្បីសិទ្ធិកម្មករ ដែលពេលនេះមានថវិកាប្រមាណ៣ពាន់ ទៅ៤ពាន់ដុល្លារ។
ប៉ុន្តែទោះជាយ៉ាងណាក៏ដោយ បើតាមលោក រ៉ុង ឈុន មកដល់ពេលនេះ មិនទាន់មានការជជែកគ្នាណាមួយរវាងអាជ្ញាធរក្រុងភ្នំពេញ និងសហជីពសេរីកម្មករ នៃព្រះរាជាណាចក្រកម្ពុជានៅឡើយទេ ចំពោះការសាងសង់រូបសំណាកលោក ជា វិជ្ជា នៅលើសួនច្បារខាងលិចវិមានឯករាជ្យ ជិតទីដែលឃាតករបានបាញ់សម្លាប់លោក ជា វិជ្ជា កាលពីឆ្នាំ២០០៤នោះ៕
0 comments:
Post a Comment