(ថ្ងៃទី 23 មីនា 2012, ម៉ោង 03:10:PM) | ដោយ: មុនីរ័ត្ន
 |
|
ប្រជាពលរដ្ឋបឹងកក់
បានសម្តែងការប្រតិកម្ម ជំទាស់យ៉ាង
ខ្លាំងក្លាជាមួយតំណាងគណបក្ស
សម រង្ស៊ី និងសមាជិក
ក្រុមប្រឹក្សាខណ្ឌដូនពេញ
ដែលដាក់ឈ្មោះរបស់ពួកគាត់
ជាសមាជិកគណបក្សសមរង្ស៊ី
សម្រាប់ការសង្កេតការណ៍
បោះឆ្នោត (រូបថត ៖
ស៊ីវ ចាន់ណា)
|
នៅព្រឹកថ្ងៃទី២៣ ខែមីនា ឆ្នាំ២០១២ ស្ត្រីប្រជាពលរដ្ឋបឹងកក់ បានលើកគ្នាទៅតវ៉ា នៅមុខទីស្នាក់ការគណៈកម្មការរាជធានីភ្នំពេញ រៀបចំការបោះឆ្នោត ដែលស្ថិតនៅជិតផ្សារចាស់។
មន្ត្រីគណបក្ស សម រង្ស៊ី ចំនួនពីររូប ដែលប្រជាពលរដ្ឋគ្រោងប្តឹងទៅសាលាដំបូងរាជធានីភ្នំពេញ មានឈ្មោះ លោក ហេង សំណាង តំណាងគណបក្ស សម រង្ស៊ី និងអ្នកស្រី ថៃ នារី សមាជិកក្រុមប្រឹក្សាខណ្ឌដូនពេញ ដែលបានដាក់ឈ្មោះប្រជាពលរដ្ឋបឹងកក់ចំនួន ៦នាក់ ក្នុងបញ្ជីឈ្មោះភ្នាក់ងារ នៃគណបក្សនយោបាយ សម្រាប់ការបោះឆ្នោត និងរាប់សន្លឹកឆ្នោត និងបានក្លែងហត្ថលេខារបស់ប្រជាពលរដ្ឋ។
ប្រជាពលរដ្ឋបឹងកក់ចំនួន ៦នាក់ មានឈ្មោះ ដូចជា៖ ១- អ្នកស្រី ទេព វន្នី, ២-ហេង មុំ , ៣-គង់ ចន្ថា ,៤-ង៉ែត ឃុន ,៥-តុល ស្រីពៅ និង៦ លោក ដួង គា។
បន្ទាប់ពីបញ្ជីឈ្មោះប្រជាពលរដ្ឋទាំង ៦នាក់ ត្រូវបានផ្សព្វផ្សាយជាសាធារណៈ បានធ្វើឲ្យប្រជាពលរដ្ឋបឹងកក់ ធ្វើការតវ៉ានៅសាលាសង្កាត់ស្រះចក នាព្រឹកថ្ងៃទី២៣ ខែមីនា ឆ្នាំ២០១២ ក្នុងគោលបំណងជួបជាមួយចៅសង្កាត់ និងមន្ត្រីគណបក្ស សម រង្ស៊ី ដើម្បីទាមទារឲ្យលុបឈ្មោះពួកគាត់ ចេញពីក្នុងបញ្ជីនោះ ពីព្រោះពួកគាត់មិនបានដឹងខ្លួនទាល់តែសោះ។ ប៉ុន្តែមិនបានជួបលោកចៅសង្កាត់ និងមន្ត្រីគណបក្ស សម រង្ស៊ី នោះទេ ដោយគេចវេសពីប្រជាពលរដ្ឋ។
មន្ត្រីសង្កាត់បានឲ្យប្រជាពលរដ្ឋ ទៅសុំលុបឈ្មោះ នៅគណៈកម្មការរៀបចំការបោះឆ្នោតរាជធានីភ្នំពេញ។ តែត្រូវបានមន្ត្រីនៅទីនោះ ឲ្យប្រជាពលរដ្ឋទៅគណៈកម្មាធិការជាតិរៀបចំការបោះឆ្នោត(គ.ជ.ប) ឬទៅគណបក្ស សមរង្ស៊ី តវ៉ាដើម្បីឲ្យគេលុបឈ្មោះចេញ។
ជាមួយគ្នានោះ លោក សុខ ពេញវុធ អភិបាលរងខណ្ឌដូនពេញ ក៏បានជំរុញឲ្យប្រជាពលរដ្ឋ ទៅគណបក្ស សម រង្ស៊ី ផងដែរ។
អ្នកស្រី គង់ ចន្ថា ដែលមានឈ្មោះក្នុងបញ្ជី បានឲ្យដឹងថា អ្នកស្រី មិនបានដឹងខ្លួនថា គណបក្ស សម រង្ស៊ី យកឈ្មោះអ្នកស្រី ទៅដាក់ក្នុងបញ្ជីឈ្មោះភ្នាក់ងារ នៃគណបក្សនយោបាយ សម្រាប់ការបោះឆ្នោត និងរាប់សន្លឹកឆ្នោតនោះទេ ហើយរឿងបក្សនយោបាយអ្នកស្រី អត់ដឹងទេ។
អ្នកស្រី គង់ ចន្ថា បានអះអាងថា “ទាំងអស់នេះ សុទ្ធតែខាងមន្ត្រីមូលដ្ឋាន ឬក៏មន្ត្រីសាលាក្រុងអ្នករៀបចំគាបសង្កត់ពួកខ្ញុំ មិនឲ្យរើបម្រាស់ឲ្យជួយបងប្អូន ដែលមានវិវាទដីធ្លី”។
ចំណែកអ្នកស្រី ហេង មុំ បានឲ្យដឹងថា “នេះជាការគាបសង្កត់មួយ មកលើប្រជាពលរដ្ឋពួកខ្ញុំ ហើយតំណាងគណបក្សប្រឆាំងចូលខ្លួនជាមួយពួកខ្ញុំ ដើម្បីយកចំណេញរឿងនយោបាយ។ តែគណបក្សផ្សេងទៀត ដែលចោទពួកខ្ញុំ គឺគាត់កំពុងគាបសង្កត់មកលើប្រជាពលរដ្ឋពួកខ្ញុំ ទាំងផ្លូវកាយ ផ្លូវចិត្ត ហើយនិងរកអ្នក ដែលយកឈ្មោះយើងខ្ញុំ មកបន្លំ និងចុះហត្ថលេខាបំផ្លើស”។
ក្នុងនាមអ្នកស្រីរស់ក្នុងតំបន់ បឹងកក់ បានអះអាងថា គឺធ្វើការតស៊ូមតិ ដើម្បីតែផ្ទះមួយគត់ មិនធ្វើការបម្រើក្នុងឆាកនយោបាយណាមួយទេ សូមឲ្យបញ្ឈប់លាបពណ៌ប្រជាពលរដ្ឋពីពេលនេះតទៅ។
អ្នកស្រី ហេង មុំ បានបញ្ជាក់ថា មូលហេតុដែលគណបក្ស សម រង្ស៊ី កេងចំណេញលើប្រជាពលរដ្ឋបឹងកក់ គឺត្រង់ថា គណបក្សបានយកឈ្មោះ និងហត្ថលេខារបស់ប្រជាពលរដ្ឋ ដោយមិនបានមកសួរពីសាមីខ្លួន ដោយផ្ទាល់ ដែលមិនព្រមសោះ ហេតុអីបានជាយកឈ្មោះ និងហត្ថលេខារបស់ប្រជាពលរដ្ឋផ្សព្វផ្សាយថា ប្រជាពលរដ្ឋ(៦នាក់)បម្រើបក្ស។
ចំណែកអ្នកស្រី ទេព វន្នី បានលើកឡើងថា អ្នកស្រីមិនបានចូលគណបក្សទេ ហើយគណបក្សណា ក៏មិនបានចូលដែរ។ ការដែលអ្នកស្រី នារី មន្ត្រីគណបក្ស សម រង្ស៊ី យកឈ្មោះអ្នកស្រី ទៅដាក់នៅក្នុងបញ្ជីឈ្មោះភ្នាក់ងារ នៃគណបក្សនយោបាយ សម្រាប់ការបោះឆ្នោត និងរាប់សន្លឹកឆ្នោតនោះ គឺអត់បានសួរអ្នកស្រីទាល់តែសោះ និងថែមទាំងបានចុះហត្ថលេខាជំនួសថែមទៀត។ អ្នកស្រីមានអារម្មណ៍ថា ចៅសង្កាត់ស្រះចក និងមន្ត្រីគណបក្សសម រង្ស៊ី សហការគ្នា ពីព្រោះរឿងអីសាមីខ្លួន មិនបានទៅចុះហត្ថលេខាដោយផ្ទាល់ ម៉េចបានជាចៅសង្កាត់ គាត់ហ៊ានបោះត្រាជាមួយគណបក្ស សម រង្ស៊ី ហើយចៅសង្កាត់ និងមន្ត្រីគណបក្ស សម រង្ស៊ី រួមដៃគ្នា ធ្វើបាបប្រជាពលរដ្ឋ។
អ្នកស្រី ទេព វន្នី បានបញ្ជាក់ថា “ពីរនាក់គាត់ ត្រូវតែបកស្រាយ ដើម្បីលាងកំហុសខ្លួនឯង និងសុំទោសដល់ប្រជាពលរដ្ឋ បើមិនចឹងទេ ពួកខ្ញុំនឹងដាក់ពាក្យបណ្តឹងជាផ្លូវការ”។
ចំពោះបញ្ហានេះ លោក ប្រាក់ ម៉ូវ អនុប្រធានគណៈកម្មការរៀបចំការបោះឆ្នោតរាជធានីភ្នំពេញ បានឲ្យដឹងថា ខាងលោក អត់មានសិទ្ធិដកឈ្មោះ ប្រជាពលរដ្ឋទាំង ៦នាក់ ចេញបានទេ។ ប៉ុន្តែនៅពេលដែលគេយកឈ្មោះមកដាក់ គឺគ្រាន់តែពិនិត្យលក្ខណៈផ្ទៀងផ្ទាត់ ឲ្យបានត្រឹមត្រូវ អត់ដឹងថា វាក្លែងបន្លំ ឬមិនក្លែងបន្លំអត់ដឹងទេ។ នៅពេល ដែលគេបានពិនិត្យត្រឹមត្រូវហើយ ក៏យកទៅបិទ ហើយនៅពេលដែលបិទបញ្ជីដំបូង ប្រជាពលរដ្ឋមានសិទ្ធិមើល ហើយចង់តវ៉ា ឡើងទៅតវ៉ានៅគណៈកម្មាធិការជាតិរៀបចំការបោះឆ្នោត(គ.ជ.ប) ធ្វើលិខិតសុំតវ៉ាដក។
ចំពោះរឿងនេះ អ្នកស្រី ថៃ នារី សមាជិកក្រុមប្រឹក្សាគណបក្ស សម រង្ស៊ី មិនអាចសុំការអត្ថាធិប្បាយបានទេ ដោយទូរស័ព្ទមិនអាចទាក់ទងបាន។
ចំណែកលោក ហេង សំណាង ប្រធានតំណាងគណបក្សសម រង្ស៊ី ខណ្ឌដូនពេញបានឲ្យដឹងថា ឈ្មោះប្រជាពលរដ្ឋទាំងនោះ មន្ត្រីខាងសង្កាត់បានបញ្ជូនមក ហើយដោយសារតែតក់ក្រហល់ពេក ហើយ គ.ជ.ប ប្រញាប់យកឈ្មោះ និងដោយគណបក្សខ្វះភ្នាក់ងារ ក៏សុំឲ្យប្រជាពលរដ្ឋជួយតែប្រជាពលរដ្ឋថា ចាំគិតមើលសិន។ ការយកឈ្មោះប្រជាពលរដ្ឋដាក់ គឺដើម្បីឲ្យគ្រប់អោយទៅ គ.ជ.ប។
លោក ហេង សំណាង បានបន្តថា គណបក្ស សម រង្ស៊ី កំពុងរៀបចំដកឈ្មោះប្រជាពលរដ្ឋ ចេញបញ្ជីភ្នាក់ងារគណបក្ស និងរៀបចំបញ្ជីថ្មី យកទៅដាក់ជំនួសវិញហើយ៕
0 comments:
Post a Comment