 |
| លោក ឈូក បណ្ឌិត អភិបាលក្រុងបាវិត (រូបថត VOA) |
ថ្ងៃសុក្រ ទី02 មីនា ឆ្នាំ2012
ដោយ ពេជ្រ សុធារី
Voice of Democracy
អភិបាលក្រុងបាវិត លោក ឈូក បណ្ឌិត ដែលត្រូវបានអាជ្ញាធរ និងតុលាការដាក់ការសង្ស័យថា ជាអ្នកបាញ់កម្មការនី៣នាក់ អោយរងរបួសនោះ ត្រូវបានអាជ្ញាធរក្រុងបាវិត ចាប់ឃាត់ខ្លួនហើយ កាលពីម៉ោងប្រមាណ ៥ល្ងាចថ្ងៃសុក្រ ទី០២ ខែកុម្ភៈ នេះ។
បើតាមលោក អំ សំអាត ប្រធានផ្នែកស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ និងលោក មឿន តុលា ប្រធានផ្នែកសិទ្ធិការងារនៃមជ្ឈមណ្ឌលអប់រំច្បាប់សំរាប់សហគមន៍ បានប្រាប់សម្លេងប្រជាធិបតេយ្យថា លោក ឈូក បណ្ឌិត ត្រូវបានអាជ្ញាធរឃាត់ខ្លួន កាលពីម៉ោងប្រមាណ ៥ល្ងាចថ្ងៃសុក្រនេះ នៅក្រុងបាវិត ខេត្តស្វាយរៀង ហើយខណៈនេះ លោក ឈូក បណ្ឌិត កំពុងត្រូវបានឃុំខ្លួននៅស្នងការនគរបាលខេត្ត។
តែទោះជាយ៉ាងណា ភ្លាមៗនេះ សម្លេងប្រជាធិបតេយ្យ VOD នៅពុំទាន់អាចសុំការអត្ថាធិប្បាយជុំវិញការចាប់ខ្លួននេះ ពីសំណាក់អាជ្ញាធរខេត្តស្វាយរៀងបាននៅឡើយទេ។
គួរបញ្ជាក់ថា កាលពីថ្ងៃទី២០ ខែកុម្ភៈ កន្លងទៅថ្មីៗនេះ កម្មកររាប់រយនាក់ នៅរោងចក្រផលិតស្បែកជើង ឈ្មោះកៅវ៉េ នៅក្រុងបាវិត ខេត្តស្វាយរៀង ជាប់ប្រទេសវៀតណាម បានទាមទារអោយថៅកែរោងចក្រគោរពលក្ខខណ្ឌការងារ ហើយខណៈនោះ សាក្សីអះអាងថា មានជនល្មើសបានជិះរថយន្តទំនើបដកកាំភ្លើងខ្លីបាញ់កម្មករ កំពុងតវ៉ានោះ បណ្តាលអោយរងរបួសកម្មការនី៣នាក់។ បន្ទាប់ពីមានការស៊ើបអង្កេតអស់ជាច្រើនថ្ងៃរួចមក កាលពីថ្ងៃព្រហស្បតិ៍ម្សិលមិញ រដ្ឋមន្រ្តីក្រសួងមហាផ្ទៃ បានបង្ហើបអោយដឹងថា ជនសង្ស័យដែលបាញ់កម្មការនីនៅក្រុងបាវិត ខេត្តស្វាយរៀងនោះ គឺអភិបាលក្រុងបាវិត ដែលគេស្គាល់ឈ្មោះថា ឈូក បណ្ឌិត ទើបនៅថ្ងៃនេះ បានឈានដល់ការចាប់ឃាត់ខ្លួនជនសង្ស័យរូបនេះ៕
0 comments:
Post a Comment