អ្នកភូមិ​បឹងកក់​តវ៉ា​នៅ​មុខ​ក្រសួង​យុត្តិធម៌​ដើម្បី​ឲ្យមាន​ការ​ដោះ​លែង​ស្រ្តី​១៥​នាក់​ពី​ពន្ធនា​គារ​ព្រៃ​ស

Thursday, May 31, 2012

អ្នកភូមិបឹងកក់តវ៉ានៅមុខក្រសួងយុត្តិធម៌ដើម្បីឲ្យមានការដោះលែងស្រ្តី១៥នាក់ពីពន្ធនាគារព្រៃស

ថ្ងៃ 31 May 2012 /ABC

អ្នកភូមិបឹងកក់ប្រមាណជាង១០០នាក់ នៅព្រឹកថ្ងៃព្រសហ្បតិ៍នេះ បាននាំគ្នាឈរស្រែកទាមទារឲ្យក្រសួងយុត្តិធម៌ជួយអន្តរាគមន៍ដោះលែងស្ត្រី១៥ នាក់ ដែលបានជាប់ពន្ធនាគារពីព្រោះតែក្រាញការពារផ្ទះរបស់ខ្លួន។

អ្នកភូមិទាំងនោះមានកាន់បដា ផ្កាឈូក ហើយកុមារមានចងក្រណាត់សលើក្បាលដែលសរសេរថា« ដោះលែងម្តាយខ្ញុំ»។

តាំងពីម៉ោងជាង៨ព្រឹកនេះ ក្រុមអ្នកតវ៉ា បានស្រែករកយុត្តិធម៌ រួមទាំងបានច្រៀងបន់ស្រន់ទេវតា ។ ក្មេងតូចៗ ប្រុសស្រីដែលម្តាយរបស់ពួកគេត្រូវបានតុលាការក្រុងភ្នំពេញចាប់ដាក់ពន្ធនាគារ បានស្រែកថា ពួកគេគ្មានម្តាយ ដើម្បីឲ្យលុយទៅសាលារៀននោះទេ។

នៅវេលាម៉ោងជាង៩ ព្រឹកនេះមន្រ្តីក្រសួងយុត្តិធម៌បានអញ្ជើញតំណាងអ្នកតវ៉ាចំនួន៥ នាក់ ដើម្បីយកញ្ញត្តិទៅជូនថ្នាក់ដឹកនាំក្រសួងយុត្តិធម៌។

សូមរំលឹកថា ស្រ្តីចំនួន១៥ នាក់ ត្រូវអាជ្ញាធរចាប់ខ្លួននៅពេលក្រាញតវ៉ារឿងដីធ្លី នៅបឹងកក់កាលពីថ្ងៃទី២៤ ឧសភា ហើយបន្ទាប់មកតុលាការក្រុងភ្នំពេញបានចោទប្រកាន់ទោសឲ្យជាប់ពន្ធនាគារចំនួន២ឆ្នាំ៦ខែ។ បន្ទាប់ពីពេលនោះមក អ្នកភូមិបឹងកក់បាននាំគ្នាទៅតវ៉ាដល់ ពន្ធនាគារព្រៃស តវ៉ានៅមុខតុលាការក្រុង នៅមន្ទីររដ្ឋសភា ប៉ុន្តែពុំបានលទ្ធផលនោះឡើយ។