 |
| លោក សម រង្ស៊ី ប្រធានគណបក្សសមរង្ស៊ី |
| ដោយ: សុខ ភក្តី/ CEN
ភ្នំពេញ: លោកសមរង្ស៊ី ដែលកំពុងរស់នៅក្រៅប្រទេស ដោយសារតែជាប់បណ្តឹងនៅតុលាការកម្ពុជា បានសរសេរលិខិតអំពាវនាវ ឲ្យកម្លាំងប្រជាធិបតេយ្យខ្មែរទាំងអស់ រួបរួមគ្នា ដើម្បីបញ្ចប់អំណាចផ្តាច់ការ។ ជាសេចក្តីអំពាវនាវ ឆ្លើយតបដោយប្រយោល ទៅកាន់លោក កឹមសុខា ដែលចង់ឲ្យមានការចរចា រួបរួមឡើងវិញ រវាងគណបក្សសិទ្ធិមនុស្ស និងគណបក្សសមរង្ស៊ី បន្ទាប់ពីការបោះឆ្នោតឃុំសង្កាត់ អាណត្តិទី៣ ដែលគណបក្សប្រឆាំងទាំងពីរ ចាញ់ឆ្ងាយ បើប្រៀបធៀបនឹងគណបក្សប្រជាជនកម្ពុជា។
លិខិតបន្តថា "ផ្អែកតាមលទ្ធផលនេះ ខ្ញុំ សមរង្ស៊ី ដែលធ្លាប់បានផ្តួចផ្តើមជារហូតមក នូវគោលការណ៍បង្រួបបង្រួម សូមអំពាវនាវឲ្យគណបក្សនយោបាយ ឥស្សរជននយោបាយ និងអ្នកសេ្នហាជាតិ សេ្នហាលទ្ធិប្រជាធិបតេយ្យទាំងអស់ រួមគ្នា បង្កើតកម្លាំងនយោបាយដ៏ធំមួយ ដើម្បីបញ្ចប់អំណាចផ្តាច់ការរបស់គណបក្សប្រជាជនកម្ពុជា នៅថ្ងៃទី២៨ ខែកក្កដា ឆ្នាំ២០១៣។ គោលបំណងយើងទាំងអស់គ្នា គឺការពារទឹកដីយើងឲ្យបានគង់វង្ស និងផ្តើមកសាងការពាររបបប្រជាធិបតេយ្យ សេរីពហុបក្ស ឲ្យបានត្រឹមត្រូវពេញលេញ និងសម្បូរសប្បាយឆាប់រហ័សពិតប្រាកដ"។
លោក សមរង្ស៊ី បានគូសបញ្ជាក់ថា "ខ្ញុំមានជំនឿយ៉ាងមុតមាំថា កម្លាំងប្រជាធិបតេយ្យ នឹងឈ្នះអំណាចផ្តាច់ការជាពុំខាន នៅពេលយើងរួមគ្នាជាកម្លាំងនយោបាយតែមួយ ដើម្បីប្រកួតមួយទល់នឹងមួយ ប្រឆាំងនឹងអំណាចផ្តាច់ការបច្ចុប្បន្ន"។
ជាចុងក្រោយ លោកសមរង្ស៊ី បានគូសបញ្ជាក់ថា "ដើម្បីសម្រេចការងាររួបរួមកម្លាំងនេះ ប្រកបដោយប្រសិទ្ធភាព ខ្ញុំសម្រេចបង្កើតក្រុមការងារមួយ ក្នុងពេលនេះ សម្រាប់ធ្វើការជាមួយគណបក្សនយោបាយ និងឥស្សរជននយោបាយ ដែលមានឆន្ទៈដូចគ្នា ក្នុងការរួបរួមកម្លាំងប្រជាធិបតេយ្យទាំងអស់ ដើម្បីស្រោចស្រង់ប្រទេសជាតិយើងឲ្យបានទាន់ពេលវេលា"។
លិខិតរបស់លោកសមរង្ស៊ី ខាងលើនេះ បានធ្វើឡើងតែមួយថ្ងៃប៉ុណ្ណោះ ក្រោយពីលោកកឹមសុខា បានប្រកាសផ្ទាល់មាត់ អំពាវនាវដោយត្រង់ទៅកាន់គណបក្សសមរង្ស៊ី ឲ្យងាកមកចរចា ដើម្បីរួបរួមឡើងវិញ រវាងគណបក្សសិទ្ធិមនុស្ស និងគណបក្សសមរង្ស៊ី។
ក្នុងសន្និសីទកាសែត កាលពីព្រឹកថ្ងៃទី៤មិថុនា ឆ្នាំ២០១២ លោក កឹម សុខា បានប្រកាសពីជំហររបស់គណបក្សសិទ្ធិមនុស្ស អំពាវនាវដល់គណបក្សសមរង្ស៊ី ដើម្បីបើកការចរចាគ្នា ឈានទៅបង្រួបបង្រួមគ្នាឡើងវិញ។ ការលើកឡើងរបស់លោក កឹម សុខា យ៉ាងដូច្នេះ ដោយលោកសំអាងលើលទ្ធផលបឋម នៃការបោះឆ្នោតឃុំសង្កាត់ កាលពីថ្ងៃអាទិត្យ ទី៣មិថុនា ឆ្នាំ២០១២ ដែលគណបក្សសិទ្ធិមនុស្សរបស់លោក ទទួលបានតំណែងជាមេឃុំចៅសង្កាត់ចំនួន ១៨ ឃុំសង្កាត់ និងសំឡេងនៅក្រុមប្រឹក្សាប្រមាណ ១.០០០ រូប ក្នុងចំណោម ១០៧០ ឃុំសង្កាត់ ដែលគណបក្សសិទ្ធិមនុស្ស បានដាក់បេក្ខជនឈរឈ្មោះ។
សូមរម្លឹកថា លោក កឹមសុខា និងលោកសមរង្ស៊ី បានចុះហត្ថលេខា និងចាប់ដៃ ចងសម្ព័ន្ធភាពអ្នកប្រជាធិបតេយ្យ កាលពីថ្ងៃទី១៥ ខែមករា ឆ្នាំ២០០៩ គឺតែប៉ុន្មានខែ បន្ទាប់ពីការបោះឆ្នោតតំណាងរាស្ត្រ អាណត្តិទី៤។ ក៏ប៉ុន្តែសម្ព័ន្ធភាពនោះ បានរលាយទៅវិញ នៅរយៈពេលជាងមួយឆ្នាំក្រោយមក ដោយសារតែក្រុមការងារទាំងពីរគណបក្ស ចរចាមិនរ៉ូវត្រូវគ្នា។
កាលពីព្រលប់ថ្ងៃទី៤មិថុនា ឆ្នាំ២០១២ លោក គង់ គាំ ប្រធានស្តីទីគណបក្សសមរង្ស៊ី ដែលស្ថិតនៅក្នុងប្រទេស ក៏បានចេញសេចក្តីថ្លែងការណ៍មួយ ដោយអំពាវនាវឲ្យសមាជិក្រុមប្រឹក្សាឃុំសង្កាត់ ដែលទើបជាប់ឆ្នោត របស់គណបក្សសមរង្ស៊ី និងគណបក្សសិទ្ធិមនុស្ស រួបរួមគ្នា ដើម្បីធ្វើការសម្រេចកម្រិតមូលដ្ឋាន ដូចជា ប្តូរមេភូមិមួយចំនួន តាមឆន្ទៈប្រជាពលរដ្ឋ ការទប់ស្កាត់ការរឹបអូសដីធ្លីរបស់ប្រជាពលរដ្ឋដោយខុសច្បាប់ ការលុបបំបាត់អំពើពុករលួយនៅថ្នាក់មូលដ្ឋាន ការការពារទ្រព្យសម្បត្តិសាធារណៈ និងទប់ស្កាត់អំពើអយុត្តិធម៌ ដែលអ្នកមានអំណាចមួយចំនួន កំពុងប្រព្រឹត្តលើប្រជាពលរដ្ឋ...។ល។
យ៉ាងណាក៏ដោយ សម្រាប់ការឆ្លើយតបរបស់លោក គង់ គាំ និងលោកសមរង្ស៊ី ដោយផ្ទាល់ និងដោយប្រយោល ទៅកាន់ការអំពាវនាវរបស់គណបក្សសិទ្ធិមនុស្ស ត្រូវបានលោក កឹម សុខា ប្រធានគណបក្សសិទ្ធិមនុស្ស លើកឡើងថា “ទោះបីគណបក្សសមរង្ស៊ី មិនឆ្លើយចំនឹងការអំពាវនាវរបស់ខ្ញុំក៏ដោយ តែសេចក្តីអំពាវនាវទាំងនោះ បង្ហាញថា ចង់ឲ្យមានការរួបរួមនៅថ្នាក់មូលដ្ឋាន។ ដូច្នេះហើយការរួបរួមនៅថ្នាក់មូលដ្ឋាន គឺខ្ញុំបានអំពាវនាវយូរហើយ តាំងពីមុនបោះឆ្នោតម្លេះ។ ខ្ញុំថា បើថ្នាក់លើ យើងរួមមិនទាន់បាន ថ្នាក់មូលដ្ឋានធ្វើការជាមួយគ្នាសិនទៅ។ ដូច្នេះហើយឥឡូវនេះ យើងបានលទ្ធផលសន្លឹកឆ្នោតប៉ុណ្ណឹងហើយ អីចឹងការរួបរួមនៅមូលដ្ឋានមានសារៈសំខាន់ណាស់ ដើម្បីផ្លាស់ប្តូរមេភូមិ ដែលគណបក្សកាន់អំណាច មានដុះស្លែយូរហើយ។ ដូច្នេះយើងនឹងឈានទៅរួបរួមនៅថ្នាក់ជាតិតទៅទៀត”។
យ៉ាងណាក៏ដោយ មកដល់ថ្ងៃទី៥មិថុនា ឆ្នាំ២០១២ លោក កឹម សុខា អះអាងថា លោកមិនទាន់បានទាក់ទងទៅកាន់លោកសមរង្ស៊ី ចំពោះគម្រោងរួបរួមឡើងវិញ រវាងគណបក្សសមរង្ស៊ី និងគណបក្សសិទ្ធិមនុស្ស នៅឡើយទេ។
ចំពោះគោលជំហររួបរួមឡើងវិញ រវាងគណបក្សសិទ្ធិមនុស្ស និងគណបក្សសមរង្ស៊ី នៅពេលនេះ ត្រូវបានលោក កឹម សុខា លើកឡើងថា “គឺយើងចង់ឲ្យរួបរួមគ្នា ក្រោមផលប្រយោជន៍ជាតិ ផលប្រយោជន៍ប្រជាពលរដ្ឋ ហើយយកគោលការណ៍ប្រជាធិបតេយ្យជាមូលដ្ឋាន។ មិនមែនរួបរួមគ្នាក្រោមបុគ្គល ក្រោមគណបក្សណាមួយ ឬក៏ជុំវិញបុគ្គល ឬជុំវិញគណបក្សណាមួយទេ ហើយក៏មិនដើម្បីប្រយោជន៍បុគ្គល ឬបក្សណាមួយទេ។ គឺរួបរួមគ្នា ក្រោមប្រយោជន៍ជាតិ ប្រយោជន៍ប្រជាពលរដ្ឋ និងតាមគោលការណ៍ប្រជាធិបតេយ្យ”។
ជាការកត់សម្គាល់ ជំហរបង្រួបបង្រួមរបស់លោក កឹម សុខា ខាងលើនេះ គឺមិនខុសគ្នា នឹងជំហររបស់គណបក្សសិទ្ធិមនុស្ស ក្នុងពេលចុះហត្ថលេខាចងសម្ព័ន្ធភាព ជាមួយគណបក្សសមរង្ស៊ី កាលពីថ្ងៃ១៥មករា ឆ្នាំ២០០៩ ឡើយ។ មួយវិញទៀត ជំហរនោះ មិនចុះសម្រុងគ្នាម្តងមកហើយ។ ដូច្នេះ ពេលនេះ ការអំពាវនាវទៅ និងការអំពាវនាវមក រវាងគណបក្សសិទ្ធិមនុស្ស និងគណបក្សសមរង្ស៊ី ប្រហែលគ្រាន់តែជាផែនការរបស់គណបក្សសិទ្ធិមនុស្ស ដើម្បីជាយុទ្ធសាស្ត្រនយោបាយថ្មីមួយទៀត សម្រាប់ឈាន ឆ្ពោះទៅរកការបោះឆ្នោតជាតិ នៅឆ្នាំ២០១៣ ប៉ុណ្ណោះ។
ម្យ៉ាងទៀត ជាការពិត បើសិនជាលោកកឹមសុខា និងលោកសមរង្ស៊ី មានបំណងរួបរួមគ្នាមែន គឺមេដឹកនាំ ដែលតាំងខ្លួនជាអ្នកប្រជាធិបតេយ្យទាំងពីរនេះ នឹងរួបរួមគ្នា តាំងពីសម័យកាលបោះឆ្នោតជ្រើសតាំងតំណាងរាស្ត្រ កាលពីឆ្នាំ២០០៨ មកម្លេះ៕
0 comments:
Post a Comment