គណបក្សសមរង្ស៊ី បដិសេធលទ្ធផលបោះឆ្នោត - SRP rejects commune election results
ដោយ: លីនណា
Cambodia Express News
ភ្នំពេញ: លោក យឹម សុវណ្ណ អ្នកនាំពាក្យគណបក្សសមរង្ស៊ី បានប្រកាសបដិសេធមិនទទួលស្គាល់លទ្ធផលបោះឆ្នោតឃុំសង្កាត់ កាលពីថ្ងៃទី៣ ខែមិថុនា។ ប៉ុន្តែលោក ទេព នីថា អគ្គលេខាធិការរៀបចំការបោះឆ្នោត បាននិយាយថា រហូតមកទល់ពេលនេះ គណៈកម្មាធិការជាតិរៀបចំការបោះឆ្នោត (គ.ជ.ប.) មិនទាន់បានទទួលព័ត៌មានផ្លូវការនៅឡើយទេ។
នៅក្នុងសន្និសីទសារព័ត៌មាន លោក យឹម សុវណ្ណ បាននិយាថា លោកមិនទទួលស្គាល់លទ្ធផល នៃការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៣នេះទេ។ លោកបញ្ជាក់ថា “ប្រព័ន្ធឃោសនាបោះឆ្នោត ជាប្រព័ន្ធអាក្រក់បំផុត ប្រជាជនមិនមានសិទ្ធិស្មើគ្នា”។
នៅក្នុងសន្និសីទនេះដែរ លោក យឹម សុវណ្ណ បានទទួលស្គាល់ថា អំពើហិង្សានយោបាយបានថយចុះ តែបានកើនឡើងនូវរូបភាពគំរាមកំហែង។
លទ្ធផលបណ្តោះអាសន្នបង្ហាញថា គណបក្សប្រជាជនកម្ពុជា ទទួលកាន់កាប់ឃុំសង្កាត់ ចំនួនរហូតដល់ ១៥៩១ ឃុំសង្កាត់ ចំណែកឃុំចំនួន ៤២ ដែលនៅសល់ នឹងបានទៅគណបក្សសមរង្ស៊ី និងគណបក្សសិទ្ធិមនុស្ស។
លោក ទេព នីថា អគ្គលេខាធិការ គ.ជ.ប. និយាយថា រហូតមកទល់ពេលនេះ លោកមិនទាន់ទទួលលិខិតណាមួយ ពីគណបក្សសមរង្ស៊ី អំពីការបដិសេធលទ្ធផលនៃការបោះឆ្នោតនេះទេ។ ប៉ុន្តែលោកបាននិយាយថា បើសិនជាគណបក្សសមរង្ស៊ី គាត់បដិសេធមិនទទួលយកអាសនៈ ដែលគាត់បានទទួលនោះ វានឹងត្រូវបែងចែកទៅឲ្យគណបក្សដែលបានទទួលអាសនៈនៅក្នុងឃុំសង្កាត់នោះ។
ចំពោះលទ្ធផលផ្លូវការ លោកនិយាយថា អាចនឹងដល់ថ្ងៃទី២៤ ខែមិថុនា ទើបអាចប្រកាសបាន ដោយសារតែមានពាក្យបណ្តឹងដែលត្រូវដោះស្រាយ៕
0 comments:
Post a Comment