ដោយ ទីន ហ្សាការីយ៉ា
2012-09-02
ក្រសួងមហាផ្ទៃយល់ព្រមឲ្យបង្កើតគណបក្សសង្គ្រោះជាតិ ទៅតាមការស្នើសុំចុះបញ្ជីបង្កើតគណបក្សថ្មីរបស់គណបក្ស សម រង្ស៊ី និងគណបក្សសិទ្ធិមនុស្ស នោះហើយ។
លោក ប៉ុល ហំម ជាអនុប្រធានគណៈកម្មាធិការបក្សបណ្ដោះអាសន្ននៃគណបក្សសង្គ្រោះជាតិ មានប្រសាសន៍ថា នៅច័ន្ទ ទី៣ កញ្ញា លោកនឹងទៅយកលិខិតអនុញ្ញាតស្ដីពីការទទួលស្គាល់គណបក្សសង្គ្រោះជាតិនេះពីក្រសួងមហាផ្ទៃ។
លោក ប៉ុល ហំម អះអាងទៀតថា ជាជំហានបន្ទាប់ទៀត លោកនឹងរៀបចំរកស្នាមមេដៃគាំទ្រគណបក្សសង្គ្រោះជាតិចំនួន ៤ពាន់នាក់ ដើម្បីឲ្យគណបក្សនេះមានសុពលភាព៖ «ហើយគណបក្ស សម រង្ស៊ី និងគណបក្សសិទ្ធិមនុស្សហ្នឹងនៅដដែលទេ ប៉ុន្តែគណបក្សទាំងពីរនេះមិនឈរឈ្មោះប្រកួតប្រជែងបោះឆ្នោតនោះទេ គឺមានតែគណបក្សសង្គ្រោះជាតិទេ ដែលចុះបញ្ជីប្រកួតប្រជែងបោះឆ្នោត ហើយសមាជិកគណបក្សសិទ្ធិមនុស្ស និងសមាជិកគណបក្ស សម រង្ស៊ី នឹងមកចូលរួមជាមួយគណបក្សសង្រ្គោះជាតិ រួមនឹងសមាជិកបក្សដទៃទៀត»។
ច្បាប់ស្ដីពីគណបក្សនយោបាយត្រង់ជំពូកទី៥ បញ្ជាក់ថា គណបក្សនយោបាយសុំចុះបញ្ជីគណបក្សត្រូវមានសមាជិកយ៉ាងតិច ៤ពាន់នាក់ មកពីតាមបណ្ដាខេត្តក្រុងនានាក្នុងប្រទេសកម្ពុជា។ សមាជិកទាំងនោះមានអាយុចាប់ពី ១៨ឆ្នាំឡើងទៅ មានអាសយដ្ឋានស្នាមមេដៃមានប័ណ្ណសមាជិកគណបក្ស និងកាលបរិច្ឆេទចូលជាសមាជិកភាព គណបក្សនយោបាយឲ្យបានច្បាស់លាស់។
គណបក្សសង្គ្រោះជាតិ មានលោក សម រង្ស៊ី ធ្វើជាប្រធានគណៈកម្មាធិការបក្សបណ្ដោះអាសន្ន និងលោក ប៉ុល ហំម ធ្វើជាអនុប្រធានគណៈកម្មាធិការបក្សបណ្ដោះអាសន្ន។
ក្រសួងមហាផ្ទៃបានទទួលយកសំណើសុំបង្កើតគណបក្សសង្គ្រោះជាតិនេះ នៅក្រោយពេលគណបក្សសិទ្ធិមនុស្ស និងគណបក្ស សម រង្ស៊ី បានស្នើសុំទៅក្រសួងមហាផ្ទៃ កាលពីថ្ងៃទី២០ សីហា កន្លងទៅ។
វិទ្យុអាស៊ីសេរី មិនអាចទាក់ទងមន្ត្រីនាំពាក្យក្រសួងមហាផ្ទៃ លោក ខៀវ សុភ័គ ដើម្បីសុំការបញ្ជាក់បន្ថែមអំពីបញ្ហានេះបាននៅឡើយទេ នៅថ្ងៃអាទិត្យ ទី២ ខែកញ្ញា។
ទោះជាយ៉ាងណាក៏ដោយ មន្ត្រីឃ្លាំមើលការបោះឆ្នោតនៅកម្ពុជា បានលើកឡើងថា នេះជាសញ្ញាល្អមួយដែលក្រសួងមហាផ្ទៃ បានបើកចំហឲ្យប្រកួតប្រជែងផ្នែកនយោបាយ។
លោកបណ្ឌិត ហង្ស ពុទ្ធា ជាប្រធានគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរីនៅកម្ពុជា។
លោកមានប្រសាសន៍ថា ជាបញ្ហាចោទចំពោះគណបក្សសង្គ្រោះជាតិនៅពេលខាងមុខនោះ នៅត្រង់ថា កន្លងមកទាំងរដ្ឋាភិបាល ទាំងគណៈកម្មាធិការជាតិរៀបចំការបោះឆ្នោតមិនទទួលស្គាល់លោក សម រង្ស៊ី ពីព្រោះថា គេចាត់ទុកលោក សម រង្ស៊ី ជាទណ្ឌិត៖ «ការយល់ព្រមដោយក្រសួងមហាផ្ទៃ គឺស្របនឹងនីតិវិធីហើយ និងជាការបើកចំហខាងប្រកួតប្រជែងខាងនយោបាយ»។ឆ្លើយតបទៅនឹងបញ្ហានេះ លោក ប៉ុល ហំម ពន្យល់ថា គណបក្សសង្គ្រោះជាតិ នឹងធ្វើសមាជនៅពេលខាងមុខ ដើម្បីជ្រើសរើសប្រធានគណបក្សសង្គ្រោះជាតិ។ ប៉ុន្តែលោក ប៉ុល ហំម បញ្ជាក់ថា ប្រធានគណបក្សសង្គ្រោះជាតិនេះ គឺលោក សម រង្ស៊ី រីឯអនុប្រធានគណបក្ស គឺលោក កឹម សុខា ដូចដែលគណបក្សសិទ្ធិមនុស្ស និងគណបក្ស សម រង្ស៊ី បានចុះហត្ថលេខាព្រមព្រៀងគ្នាកាលពីថ្ងៃទី១៧ ខែកក្កដា នៅទីក្រុងម៉ានីល ប្រទេសហ្វីលីពីន កន្លងមក។
កាលបរិច្ឆេទចុះឈ្មោះតំណាងគណបក្សនយោបាយចូលរួមបោះឆ្នោតជ្រើសរើសតំណាងរាស្ត្រអាណត្តិទី៥ ចាប់ផ្ដើមកាលពីថ្ងៃទី២៣ ខែសីហា ដល់ថ្ងៃទី២២ ខែធ្នូ ឆ្នាំ២០១២។ ចំណែកឯកាលបរិច្ឆេទនៃការបោះឆ្នោតនឹងចាប់ផ្ដើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣ ខាងមុខ៕
0 comments:
Post a Comment