.jpg) |
| លោក សម រង្ស៊ី ប្រធានគណបក្ស សម រង្ស៊ី |
ភ្នំពេញ: បន្ទាប់ពីឈ្នះក្ដីជាស្ថាពរលើលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស នៅចំពោះមុខតុលាការទីក្រុងប៉ារីស កាលពីឆ្នាំ២០១១ កន្លងទៅនេះ លោក សម រង្ស៊ី កំពុងតែឈាន ទៅរកជ័យជំនះមួយទៀត លើសម្តេចនាយករដ្ឋមន្ត្រី ហ៊ុន សែន។ នោះគឺអយ្យការតុលាការបារាំង នឹងដំណើរការស៊ើបអង្កេតលើព្រឹត្តិការណ៍គប់គ្រាប់បែក ថ្ងៃទី៣០ ខែមីនា ឆ្នាំ១៩៩៧។ នេះបើតាមការលើកឡើងនៅក្នុងសេចក្ដីប្រកាសព័ត៌មានរបស់ខុទ្ទកាល័យគណបក្សសមរង្ស៊ី នៅល្ងាចថ្ងៃទី២៧ ខែមករា ឆ្នាំ២០១២។
សេចក្ដីប្រកាសព័ត៌មាន លើកឡើងទៀតថា "ថ្ងៃនេះ គណបក្សសមរង្ស៊ី បានទទួលដំណឹងថា អយ្យាការនៃសាធារណរដ្ឋបារាំង ប្រចាំតុលាការទីក្រុងប៉ារីស បានសម្រេចកាលពីដើមសប្ដាហ៍នេះ ដើម្បីបើកការស៊ើបអង្កេតឡើងវិញ ចំពោះព្រឹត្តិការណ៍គប់គ្រាប់បែក នៅទីក្រុងភ្នំពេញ កាលពីថ្ងៃទី៣០ ខែមីនា ឆ្នាំ១៩៩៧"។
សេចក្ដីប្រកាសព័ត៌មានពីគណបក្សសមរង្ស៊ី បន្ថែមទៀតថា ដោយគួបផ្សំព័ត៌មាន និងភស្ដុតាង ទទួលបានពី FBI ដែលជានគរបាលនៃសហរដ្ឋអាមេរិក តុលាការបារាំង អាចកោះហៅ ដើម្បីសាកសួរសម្ដេច ហ៊ុន សែន និងសហការីរបស់សម្ដេចមួយចំនួន ដូចជា លោក ហ៊ីង ប៊ុនហៀង និងលោក ហ៊ុយ ពិសិដ្ឋ ឲ្យចូលមកឆ្លើយក្នុងពេលឆាប់ៗ ខាងមុខនេះ។
សេចក្ដីប្រកាស បញ្ជាក់ថា តែបើសាមីខ្លួន មិនព្រមមកឆ្លើយចំពោះមុខតុលាការទេ នោះនឹងមានវិធានការថ្នាក់អន្តរជាតិ ដើម្បីចាប់បង្ខំសាមីខ្លួនឲ្យមកឆ្លើយទាល់តែបាន។
ជុំវិញសេចក្តីប្រកាសខាងលើនេះ មិនទាន់មានប្រតិកម្មបែបណាពីមន្ត្រីជាន់ខ្ពស់រដ្ឋាភិបាលកម្ពុជានៅឡើយទេ៕
0 comments:
Post a Comment