ពលរដ្ឋនៅភូមិវាលបីផ្ទុះកំហឹងបិទផ្លូវ៧៦អា បន្ទាប់ពីសន្តិសុខបាញ់អ្នកភូមិ។ រូបថត ជីវ័ន
មណ្ឌលគិរីៈ លោកនាយករដ្ឋមន្រ្តី ហ៊ុន សែន កាលពីម្សិលមិញ បានគំរាមបញ្ឈប់តួនាទីទីប្រឹក្សារបស់លោកឧកញ៉ា ណា ម៉ារឌី ដែលជាប្រធានក្រុមហ៊ុន TTY និងគំរាមដកអាជ្ញាប័ណ្ណដីសម្បទានសេដ្ឋកិច្ចពីក្រុមហ៊ុននេះ ប្រសិនបើលោកមិនប្រគល់សន្តិសុខដែលបានបាញ់ និងបង្ករបួសធ្ងន់ធ្ងរលើអ្នកភូមិ ៤ នាក់ ក្នុងអំឡុងពេលធ្វើបាតុកម្ម នៅខេត្តក្រចេះ កាលពីថ្ងៃទី ១៨ ខែមករានោះទេ។
លោក ថ្លែងថា៖ «ខ្ញុំនឹងបញ្ឈប់លោក[ណា ម៉ារឌី] ជាទីប្រឹក្សានាយករដ្ឋមន្រ្តី [ប្រសិនបើលោកមិនប្រគល់អ្នកទាំងនោះទេ]។ ក្រុមហ៊ុនមិនរួចពីកំហុសទេ យើងត្រូវសួរថា តើក្រុមហ៊ុនបានកាំភ្លើងបែបនេះពីណាមក ហើយអ្នកបាញ់ជាអ្នកណា ព្រោះយើងមានរូប»។
អាជ្ញាធរបានប្រកាសពីម្សិលមិញថា សន្តិសុខ កែ សុវណ្ណា អាយុ ២៩ ឆ្នាំ សន្តិសុខ យុន ឆៃណា អាយុ៣២ឆ្នាំ និងសន្តិសុខ ភីន អឿន អាយុ៣៥ឆ្នាំ ជាសន្តិសុខដែលអាជ្ញាធរតាមចាប់ខ្លួន ដើម្បីធ្វើការសាកសួរអំពីការបាញ់ប្រហារនោះ។
ថ្លែងនៅក្នុងពិធីសម្ពោធផ្លូវជាតិលេខ ៧៦ ក្នុងខេត្តមណ្ឌលគិរី លោក ហ៊ុន សែន ថា លោក ណា ម៉ារឌី ត្រូវទទួលខុសត្រូវនាំមនុស្សដែលនគរបាលតាមចាប់ខ្លួនមកឲ្យនគរបាល ហើយរកមេធាវីឲ្យគេ ដោយលោកព្រមានថា លោក ណា ម៉ារឌី អាចជាអ្នកដែលត្រូវគេសាកសួរវិញ ប្រសិនបើគាត់មិនព្រមអនុវត្តតាម។
លោក ហ៊ុន សែន បានបន្តថា ប្រសិនបើក្រុមហ៊ុន TTY ត្រូវបានរកឃើញថា កំពុងផ្តល់កន្លែងឲ្យបុរសទាំងបីនាក់នេះ ក្រុមហ៊ុននឹងត្រូវទទួលទណ្ឌកម្ម។
សន្តិសុខក្រុមហ៊ុនម្នាក់ បានបាញ់កាំភ្លើង AK 47 ទៅក្រុមប្រជាជន ៤០០ នាក់ដែលបានព្យាយាមរារាំងគ្រឿងចក្ររបស់ក្រុមហ៊ុនកុំឲ្យឈូស ចម្ការដំឡូងមីពួកគេ ក្នុងភូមិវាលបី ឃុំ២ធ្នូ ស្រុកស្នួល កាលពីថ្ងៃទី១៨ខែមករាកន្លងទៅ។
បុរសម្នាក់រងរបួសធ្ងន់ដោយរងគ្រាប់កាំភ្លើងជាច្រើនកន្លែង ហើយបីនាក់ទៀតក៏រងរបួសដោយសារគ្រាប់កាំភ្លើងដែរ។ ក្រោយមក មានលេចរូបថតសន្តិសុខម្នាក់ឈរលើគ្រឿងចក្រតម្រង់កាំភ្លើងមក កាន់ប្រជាជន។
លោក ហ៊ុន សែន បានបន្តថា៖ «ខ្ញុំសោកស្តាយបញ្ហានេះ ហើយខ្ញុំចាត់ទុកជាបញ្ហាធ្ងន់ធ្ងរ ដែលមិនអាចលើកលែងទោសបាន យើងកំពុងបង្ហួរឈាមប្រជាជននៅទីនេះ។ ខ្ញុំថ្កោលទោសសកម្មភាពនេះហើយមិនអាចលើកលែងទោសវាទេ។ ខ្ញុំសូមអភ័យទោសគ្រួសារជនរងគ្រោះ ... វាមិនគួរកើតឡើងទេ»។
កាលពីឆ្នាំ ២០០៨ ក្រុមហ៊ុន TTY បានទទួលដីសម្បទានសេដ្ឋកិច្ទ ៩ពាន់ហិកតា ក្នុងនោះមានស្រែចម្ការនិងផ្ទះរបស់ប្រជាជនក្នុងភូមិវាលបី។ ប៉ុន្តែ ពីថ្ងៃចន្ទ ក្នុងដំណើរទស្សនកិច្ចទៅភូមិវាលបី លោក ម៉ុក ម៉ារ៉េត រដ្ឋមន្រ្តីក្រសួងបរិស្ថាន បានសន្យា ប្រគល់ដីឲ្យប្រជាជនវិញ។
លោក ហ៊ុន សែន បានឲ្យដឹងទៀតថា លោកបានបញ្ជារួចហើយឲ្យលោក ស ខេង រដ្ឋមន្រ្តីក្រសួងមហាផ្ទៃ ចាប់ខ្លួនសន្តិសុខដែលបានបាញ់លើប្រជាជន ហើយជំរុញឲ្យជនល្មើសប្រគល់ខ្លួន ដោយព្រមានថា ប៉ូលិសអន្តរជាតិនឹងចាប់ខ្លួនពួកគេ បើពួកគេរត់ទៅក្រៅប្រទេស។
លោកនាយករដ្ឋមន្រ្តី ហ៊ុន សែន ក៏បានគំរាមចាត់វិធានការលើក្រុមហ៊ុន ដែលបានប្រើអំពើហិង្សាលើប្រជាជន។ លោកថ្លែងថា ៖ «យើងនឹងដកអាជ្ញាប័ណ្ណទាំងអស់ពីក្រុមហ៊ុន ដែលទទួលដីសម្បទានសេដ្ឋកិច្ច បើគេប្រើអំពើហិង្សា»។
លោកមានប្រសាសន៍ថា ក្រុមហ៊ុនណាក៏ដោយដែលទទួលសិទិ្ធអភិវឌ្ឍន៍ដី មានករណីកិច្ចត្រូវធានាថា ប្រជាជនមិនត្រូវបានធ្វើបាប ហើយត្រូវរកដំណោះស្រាយដល់អ្នកទាំងឡាយ ដែលទទួលរងផលប៉ះពាល់ដោយសារការអភិវឌ្ឍ។ លោកបន្តថា ដំណោះស្រាយនឹងរកជូនប្រជាជនជាដីឬប្រាក់ ហើយបានជំរុញពួកគេកុំឲ្យលេងហ្គេមជាមួយនឹងរដ្ឋាភិបាល។
លោក ហាក់ ហ៊ន ព្រះរាជអាជ្ញារងក្នុងខេត្តក្រចេះ បានថ្លែងថា សេចក្តីលម្អិតអំពីរឿងក្តីនេះ បានបញ្ជូនទៅចៅក្រមស៊ើបសួររួចហើយ ហើយថា សន្តិសុខទាំង ៣ ដែលកំពុងតាមចាប់ខ្លួន សាកសួរនោះ គឺលោក កែ សុវណ្ណា យុន ឆៃណា និងឈ្មោះ ភីន អឿន។ លោកបញ្ជាក់ថា៖ «ចៅក្រមស៊ើបសួរនឹងចាត់វិធានការតាមច្បាប់ និងធ្វើការស៊ើបអង្កេតបន្ថែមទៀត ដើម្បីសិក្សាអំពីសាវតារពួកគេ»។
លោក ហេង សារ៉ាត អគ្គនាយករងនៃក្រុមហ៊ុន TTY បានថ្លែងថា លោកគ្មានព័ត៌មានអំពីទីកន្លែងរបស់សន្តិសុខទេ។ លោកថា៖ «ខ្ញុំកំពុងស៊ើបរកអ្នកដែលបំផ្លាញក្រុមហ៊ុន»។ លោកបន្តថា សកម្មភាពនេះធ្វើឲ្យរដ្ឋាភិបាលយកដីវិញ។
លោក អ៊ូច ឡេង ប្រធានកម្មវិធីដីធ្លីនៅអង្គការអាដហុកថ្លែងថា លោកស្វាគមន៍សុន្ទរកថារបស់លោកនាយករដ្ឋមន្រ្តី ប៉ុន្តែ លោកឆ្ងល់ថា មូលហេតុអ្វីថ្ងៃនោះជនល្មើសមិនត្រូវចាប់ខ្លួន៕ TK
0 comments:
Post a Comment