លោក ហ៊ុន សែន ចោទ​លោក ប៉ែន សុវណ្ណ ថា​ជា​មនុស្ស​របស់​វៀតណាម

ដោយ វោហារ ជាតិ

2012-02-03

លោក ហ៊ុន សែន បានចោទលោក ប៉ែន សុវណ្ណ អតីតនាយករដ្ឋមន្ត្រីក្នុងពេលវៀតណាម កាន់កាប់កម្ពុជា ក្នុងទសវត្សរ៍ ៨០ ថា ជាមនុស្សជំនិតរបស់ទីក្រុងហាណូយ។

១៥-មិថុនា-២០១១៖ លោកនាយករដ្ឋមន្ត្រី ហ៊ុន សែន ថ្លែងក្នុងឱកាសចែកសញ្ញាបត្រដល់និស្សិតនៅសាកលវិទ្យាល័យ វិទ្យាសាស្ត្រសុខាភិបាល រាជធានីភ្នំពេញ ។ RFA/Sok Serey

បញ្ហាវៀតណាម នៅតែជាប្រធានបទក្ដៅដដែលចំពោះអ្នកនយោបាយខ្មែរលើកយកមកបន្តុះ បង្អាប់ និងចោទដាក់គ្នាទៅវិញទៅមកតាំងពីជំនាន់មុនមកដល់ជំនាន់នេះ។ ជាពិសេស បញ្ហានេះបានកើតមានឡើងយ៉ាងញឹកញាប់ និងក្ដៅគគុកក្នុងរបបនយោបាយខ្មែរគ្រប់អាណត្តិ ចាប់តាំងពីឆ្នាំ១៩៧៩ នៅពេលកងទ័ពវៀតណាម ចូលមកប្រទេសកម្ពុជា វាយផ្ដួលរំលំរបបប្រល័យពូជសាសន៍ ប៉ុល ពត មកទល់ឆ្នាំ២០១២នេះ។

ជាថ្មីម្ដងទៀត លោកនាយករដ្ឋមន្ត្រី ហ៊ុន សែន បានរិះគន់លោក ប៉ែន សុវណ្ណ អតីតនាយករដ្ឋមន្ត្រីក្នុងរបបសាធារណរដ្ឋប្រជាមានិតកម្ពុជា យ៉ាងចាស់ដៃថា លោក ប៉ែន សុវណ្ណ ជាអ្នកតស៊ូកុម្មុយនិស្តខ្មែរម្នាក់ បម្រើឲ្យកុម្មុយនិស្តវៀតណាម តាំងពីនៅតូចម្ល៉េះ តែធ្វើជាដើរតួប្រឆាំងវៀតណាម។

លោក ហ៊ុន សែន៖ «ហើយតាំងខ្លួនជាបិតា ៧ មករា ហើយអីថា គេហ្នឹងស្នេហាជាតិ គេប្រឆាំងវៀតណាម។ ប្រឆាំងវៀតណាមអី? វៀតណាមយកទៅចិញ្ចឹមតាំងពីក្រោយឆ្នាំ ៥៩ ក្រោយសន្និសីទហ្សឺណែវ អី? ហេ! កោតតែចេះនិយាយទៅរួច!»។

ថ្លែងនៅក្នុងពិធីសម្ពោធអាគារមួយនៅក្រសួងមហាផ្ទៃ នៅថ្ងៃទី២ កុម្ភៈ លោក ហ៊ុន សែន បានអះអាងថា លោក ប៉ែន សុវណ្ណ ជាអ្នកដឹកនាំមិនមានអាជីព និងមិនចុះសម្រុងនឹងថ្នាក់ដឹកខ្មែរដែលមានរូបលោកកាលនោះជា រដ្ឋមន្ត្រីក្រសួងការបរទេស លោក ហេង សំរិន ប្រធានរដ្ឋ និងលោក ជា ស៊ីម ជារដ្ឋមន្ត្រីក្រសួងមហាផ្ទៃ។

លោកបានរំលឹកថា នៅពេលនោះ លោក ប៉ែន សុវណ្ណ បានដឹកនាំកម្លាំងទៅឆែកឆេរផ្ទះអ្នកដឹកនាំខ្មែរកំពូលៗដោយសង្ស័យ ថា បានបង្កើតកម្លាំងប្រឆាំងវៀតណាម ដែលមានវត្តមានលោក នាង ផាត ដែលបច្ចុប្បន្នជាឧត្ដមសេនីយ៍យោធាមួយរូបចូលរួមផង។

លោក ហ៊ុន សែន៖ «ផាត ឯងមិនទៅដែរ ហើយមិនឆែកផ្ទះបង ជា ស៊ីម ដែរ? ហើយផ្ទះបង ហេង សំរិន ទៀត ប៊ិះផ្ទះខ្ញុំទៀតថ្ងៃនោះ។ នែ! លេងដល់ថ្នាក់ហ្នឹង បានគេដេញចោល បានគេចាប់នោះ។ អារឿងហ្នឹងនិយាយតិចទៅចុះ បិតា ៧ មករានោះ ហើយមកធ្វើរដ្ឋមន្ត្រីក្រសួងការពារជាតិ អត់មានទាហានមួយគ្រាប់ទេអាសត្វហ្នឹង ហើយចេះតែថា ខ្ញុំ បង ហេង សំរិន បង ជា ស៊ីម ធ្វើជាទាហានវាទៀតណាស់ វាឆ្ងាញ់អាត្រង់ហ្នឹង។ និយាយបន្តិចទៅចុះរឿងអាថ៌កំបាំងជាន់ដើម។ អាហ្នឹងពាក់សក្ដិ ២ កងទ័ពវៀតណាមតើ!»។

លោក ប៉ែន សុវណ្ណ ត្រូវបានវៀតណាម ចាប់ដាក់គុកនៅទីក្រុងហាណូយ ឆ្នាំ១៩៨១ ដោយសាររិះគន់ និងជំទាស់នយោបាយវៀតណាម ក្នុងពេលលោកមានតំណែងជានាយករដ្ឋមន្ត្រី និងរដ្ឋមន្ត្រីក្រសួងការពារជាតិ។ ជាង ១០ឆ្នាំក្រោយមក លោកត្រូវដោះលែងវិញ។ បច្ចុប្បន្នលោកធ្វើនយោបាយជាមួយបក្សសិទ្ធិមនុស្ស របស់លោក កឹម សុខា ដែលដែលជារឿយៗតែងរិះគន់លោកនាយករដ្ឋមន្ត្រី និងបក្សប្រជាជនកម្ពុជា។ តែលោកនាយរដ្ឋមន្ត្រីបានរិះគន់តបវិញថា លោក ប៉ែន សុវណ្ណ ធ្វើនយោបាយប្រឆាំងវៀតណាម បែរជាយកប្រពន្ធជនជាតិវៀតណាម។

ឆ្លើយតបនឹងពាក្យចោទប្រកាន់ដែលថា វៀតណាមបានយកលោកទៅចិញ្ចឹមតាំងពីមុនទសវត្សរ៍ ៦០ នោះ។ លោក ប៉ែន សុវណ្ណ បានឆ្លើយថា លោកបានទៅរៀននយោបាយនៅវៀតណាមមែន តែបក្សប្រជាជនបដិវត្តន៍កម្ពុជា បញ្ជូនទៅទេ។ លោករំលឹកថា កាលនោះមានកូនខ្មែរក្មេងៗប្រហែល ១០០នាក់ ត្រូវបានបញ្ជូនទៅរៀនជាមួយលោក។

ចំពោះទស្សនៈ ៧ មករា វិញ លោកយល់ឃើញផ្ទុយពីលោកនាយករដ្ឋមន្ត្រី ដូច្នេះហើយទើបលោកសម្រេចចិត្តចូលរួមជាមួយគណបក្សសិទ្ធិមនុស្ស៖ «ទស្សនៈ របស់ខ្ញុំ និង កឹម សុខា អត់ខុសគ្នាទេ ដូចគ្នាត្រង់ថា ៧ មករា ខ្មែរក្រហមដួលរលំ ហើយថ្ងៃហ្នឹងប្រជាពលរដ្ឋកម្ពុជា រួចចាកផុតពីរបបប្រល័យពូជសាសន៍។ ប៉ុន្តែប្រឆាំង ៧ មករា ដោយយួនឆ្លៀតឱកាសជួយខ្មែរដើម្បីយកទឹកដីខ្មែរត្រួតត្រាក្រោម កណ្ដាប់ដៃរបស់យួន។ អាហ្នឹងដែលខ្ញុំប្រឆាំង»។

ទាក់ទងរឿងឆែកផ្ទះអ្នកដឹកដែលលោក ហ៊ុន សែន បានលើកឡើងនោះ លោក ប៉ែន សុវណ្ណ រំលឹកថា កាលនោះជំនាញការវៀតណាម មិនទុកខ្មែរទេ ហើយមានផែនការវែកមុខអ្នកដែលប្រឆាំងវៀតណាម ព្រោះថា មានមន្ត្រីខ្មែរជាច្រើនដែលមិនពេញចិត្តវត្តមានកងទ័ព និងអន្តោប្រវេសន៍ វៀតណាម នៅលើទឹកដីខ្មែរ។

លោក ប៉ែន សុវណ្ណ៖ «ដល់ពេលហ្នឹងលោក ជា ស៊ីម កាលនោះក៏មានគំនិតប្រឆាំងយួនដែរ។ គាត់ចង់កសាងកម្លាំងប្រដាប់អាវុធរបស់គាត់ដោយឡែកនៅមុខកំពូល ហើយដល់យួនឃើញអ៊ីចឹង គេបង្កើតសេរីកា ក្រសួងការបរទេសរបស់ ហ៊ុន សែន ក៏មានដែរ គ្រប់ក្រសួងមន្ទីរពួកសេរីកាទាំងអស់ ហើយកាលហ្នឹងចាប់ពាយតែម្ដង»។

លោក ប៉ែន សុវណ្ណ ដែលជាកូនចៅអ្នកតាកែវ កើតនៅឆ្នាំ១៩៣៦ ហើយចូលបក្សកុម្មុយនិស្តតាមរយៈ តា ម៉ុក ក្នុងទសវត្សរ៍ ៥០ បានរំលឹកដែរថា នៅទសវត្សរ៍ឆ្នាំ៨០ វៀតណាមក៏បានបង្កើតចលនាតស៊ូក្លែងក្លាយ ដើម្បីវែកមុខរកអ្នកស្មោះត្រង់ និងអ្នកក្បត់វៀតណាមដែរ។ លោកថា នៅពេលដែលក្រុមខ្មែរតស៊ូនៅជំរំព្រំដែនថៃ បង្កើតចលនានេះចូលនៅក្នុងប្រទេសដូចគ្នា ហើយមានខ្មែរជាច្រើនធ្លាក់ចូលអន្ទាក់នេះ។

លោក ប៉ែន សុវណ្ណ៖ «គឺមហិច្ឆតារបស់យួន គេចង់រែងច្រោះរកឲ្យឃើញខ្មែរសេរី ខ្មែរណាជាតិនិយមណាប្រឆាំងយួន។ ម្ល៉ោះហើយយួនបង្កើតចលនាតាំងពីជំរំ ០០៧ នៅណងចាន់ ហើយគេចាប់ប្រជាជននៅទីក្រុងភ្នំពេញ។ ជាពិសេសចាប់តាមក្រសួងមន្ទីរ ហើយដល់ខ្មែរយើងកាលហ្នឹងខឹងយួនត្រួតត្រា ឮថា ពូកសេរីកា ឬអ្នកជាតិនិយម ដើម្បីរួមចំណែកដើម្បីប្រឆាំងយួន»។

ចំពោះការចោទប្រកាន់គ្នារវាងលោកនាយករដ្ឋមន្ត្រី ហ៊ុន សែន និង លោក ប៉ែន សុវណ្ណ នេះ អ្នកស្រី ពុង ឈីវកេក ក្នុងនាមអ្នកវិភាគនយោបាយក្នុងស្រុកឯករាជ្យ មានប្រសាសន៍ថា មិនមែនរឿងថ្មីនោះទេ ហើយក៏កើតឡើងជាញឹកញាប់មកហើយ។ ហេតុផលគឺដោយសារតែដណ្ដើមប្រជាប្រិយភាពនយោបាយគ្នា ព្រោះថា រដូវបោះឆ្នោតជិតមកដល់៕

ខ្មែរក្រោមជាតិនិយម - Khmer Krom Nationalism

ស្តាប់បទចំរៀងខ្មែរ

ចំនួនភ្ញៀវ ចូលទស្សនា

ព័ត៌មានក្នុងស្រុក

Friday, February 3, 2012