ថ្ងៃទី 25 មីនា 2012, ម៉ោង 10:58:PM | ដោយ: រតនា
កំពង់ធំ: សកម្មជនការពារព្រៃឈើម្នាក់ និងមន្រី្តអង្គការសិទ្ធិមនុស្សម្នាក់ប្រឈមនឹងការតាមចាប់ខ្លួនពី សំណាក់អាជ្ញាធរកងកំលាំងប្រដាប់អាវុធជាច្រើននាក់នៅខេត្តកំពង់ធំ នៅយប់ថ្ងៃទី២៥មីនា ឆ្នាំ២០១១ នេះបើតាមការបញ្ជាក់ពីលោកចាន់ សុវេត មន្ត្រីអង្គការសិទ្ធិមនុស្សអាដហុក ដែលបានតាមដានឃ្លាំមើលសហគមន៍ព្រៃ បានចូលទៅប្រមូលភស្តុតាងនៅក្នុងតំបន់ព្រៃឡង់។ លោកចាន់ សុវេត បានមានប្រសាសន៍តាមទូរស័ព្ទពីតំបន់មានសេវានៅក្នុងព្រៃឡង់ ខេត្តកំពង់ធំ បានឲ្យដឹងថា រហូតមកដល់យប់ម៉ោង៩ ថ្ងៃទី២៥មីនា នេះមានកំលាំងប្រដាប់អាវុធជានគរបាល ប៉េអឹម ជាច្រើនសិបនាក់ប្រដាប់ដោយអាវុធ បានតាមឃ្លាំមើលរាល់សកម្មភាពរបស់អង្គការសិទ្ធិមនុស្ស និងសហគមន៍ការពារព្រៃឈើ ដែលតាមក្រុមមន្ត្រីអង្គការក្រៅរដ្ឋាភិបាលទាំងនោះបានបញ្ជាក់ថា កំលាំងប្រដាប់អាវុធទាំងនោះឆ្មក់ចាប់ខ្លួនមន្ត្រីអង្គការក្រៅរដ្ឋាភិបាល ២ នាក់ ទី១លោកឆុត វុទ្ធី ប្រធានអង្គការការពារធនធានធម្មជាតិ និងទី២ លោកឈឹម សាវុធ មន្ត្រីសម្របសម្រួលនៃមជ្ឈមណ្ឌលសិទ្ធិមនុស្សកម្ពុជា។
ការតាម ចាប់ខ្លួនមន្ត្រីទាំង ២ នាក់នេះ ពីព្រោះនៅព្រឹកថ្ងៃទី២៦មីនា ឆ្នាំ២០១២ តំណាងសហគមន៍ព្រៃឡង់ ដែលបានចូលទៅក្នុងព្រៃឡង់ចំនួនប្រមាណជិត ៦០០នាក់ ជាមួយនឹងម៉ូតូចំនួន ២៥០ គ្រឿង (ក្នុងមួយគ្រឿងជិះគ្នា ២ នាក់) នឹងវិលត្រឡប់មកវិញ យកភស្តុតាងទាំងនោះដើម្បីបង្ហាញដល់មន្ត្រីរដ្ឋាភិបាល អង្គការអន្តរជាតិ និងក្រុមអ្នកតំណាងរាស្ត្រឲ្យបានដឹង ពីការកាប់បំផ្លាញព្រៃឈើ នៅតំបន់ព្រៃឡង់ ដែលប្រជុំខេត្តចំនួន ៤ គឺខេត្តព្រះវិហារ ក្រចេះ ស្ទឹងត្រែង និងខេត្តកំពង់ធំ។
លោកចាន់ សុវេត មានប្រសាសន៍បញ្ជាក់ថា សហគមន៍ព្រៃឈើបានចូលទៅក្នុងព្រៃឡង់ ដោយជិះម៉ូតូចំនួន ៥២ គ្រឿង ក្នុងមួយម៉ូតូចំនួន ២ នាក់ ដើម្បីប្រមូលភស្តុតាង របស់ក្រុមហ៊ុន និងសម្ភារៈ គ្រឿងចក្រជាច្រើនទៀត ដែលក្រុមហ៊ុនបានកាប់បំផ្លាញព្រៃឈើនៅក្នុងតំបន់ព្រៃឡង់ ដែលភស្តុតាងទាំងនោះ នឹងត្រូវដាក់បង្ហាញសមាគមន៍ជាតិ និងអន្តរជាតិ មន្ត្រីរដ្ឋាភិបាល ក្រុមអ្នកតំណាងរាស្ត្រ សមាជិកព្រឹទ្ធសភា និងក្រុមអ្នករាយការណ៍ព័ត៌មាននៅព្រឹកថ្ងៃទី២៦ មីនា ឆ្នាំ២០១២នេះផងដែរ។ ហើយព្រឹកថ្ងៃទី២៦មីនានោះ នឹងមានការបិទផ្លូវចូលទៅក្រុមហ៊ុនកាប់ព្រៃឈើ កាប់ព្រៃឡង់ ដើម្បីបង្ហាញនិងថតរូបភាពជាភស្តុតាងបង្ហាញភ្ញៀវជាតិ និងអន្តរជាតិ។
លោកចាន់ សុវេត បាននិយាយថា នេះជាការគំរាមគំហែងសិទ្ធិសេរីភាព ទៅដល់អង្គការសង្គមស៊ីវិល ជាពិសេសសហគមន៍ព្រៃឈើ ដែលមានការព្រួយបារម្មណ៍ពីការកាប់បំផ្លាញព្រៃឈើនៅតំបន់ព្រៃឡង់ ដែលជាព្រៃធម្មជាតិដ៏ធំនៅក្នុងប្រទេសកម្ពុជា។
ជាមួយគ្នា នោះ លោកចាន់ សុវេត មន្ត្រីអង្គការសិទ្ធិមនុស្សអាដហុក ក៏បានឲ្យដឹងដែរថា ក្រៅពីមន្ត្រីអង្គការក្រៅរដ្ឋាភិបាលចំនួន ២ នាក់ លោកឆុត វុទ្ធី និងឈឹម សាវុធ ដែលសមត្ថកិច្ចប្រមាញ់ចាប់ខ្លួននោះ គឹនៅថ្ងៃស្អែក និងពេលខាងមុខសមត្ថកិច្ចនឹងតាមចាប់អ្នកតំណាងសហគមន៍ព្រៃឈើ និងអ្នកតវ៉ាជាច្រើនទៀត ដែលហ៊ានចេញមុខតវ៉ាកុំឲ្យមានការកាប់បំផ្លាញព្រៃឈើនៅតំបន់ព្រៃឡង់ ៕
1 comments:
Hi, cool post. I have been thinking about this topic,so thanks for sharing. I will probably be subscribing to your blog. Keep up great writing!!!
1984 Buick Skylark AC Compressor
Post a Comment