skip to main |
skip to sidebar
(ថ្ងៃទី 12 មីនា 2012, ម៉ោង 06:55:PM) | ដោយ: CEN
ភ្នំពេញ:
ក្រសួងមហាផ្ទៃ បានចេញលិខិតមួយច្បាប់ ឆ្លើយតបចំពោះលោក រ៉ុង ឈុន ប្រធានសហភាពសហជីពកម្ពុជា និងសមាគមគ្រូបង្រៀនកម្ពុជាឯករាជ្យ ដែលបានស្នើឲ្យបញ្ឈប់តំណែង ប្រធានស្ថាប័ន ពាក់ព័ន្ធក្នុងខេត្តស្វាយរៀង និងដាក់រដ្ឋបាលឲ្យបានធ្ងន់ធ្ងរ។
ក្រសួងមហាផ្ទៃ បានទទួលលិខិត របស់លោក រ៉ុង ឈុន មួយច្បាប់ ចុះថ្ងៃទី២៣ ខែកុម្ភៈ ឆ្នាំ២០១២ ដែលបានស្នើសុំឲ្យបញ្ឈប់តំណែងប្រធានស្ថាប័ន ពាក់ព័ន្ធខេត្តស្វាយរៀង និងដាក់វិន័យ
រដ្ឋបាលឲ្យបានធ្ងន់ធ្ងរ ដែលបានបាញ់ប្រហារ ទៅលើកម្មករ នៅរោងចក្រ
កាត់ដេរស្បែកជើង កៅវ៉េ កាលពីថ្ងៃទី២០ ខែកុម្ភៈ ឆ្នាំ២០១២
នៅសង្កាត់បាវិត ក្រុងបាវិត ខេត្តស្វាយរៀង។
ក្នុងលិខិតរបស់លោក ស
ខេង បានលើកឡើងថា ពាក់ព័ន្ធនឹងករណីផ្ទុះអាវុធខាងលើនេះ
សមត្ថកិច្ចក្រសួងមហាផ្ទៃបានធ្វើការ ស៊ើបអង្កេតយ៉ាងហ្មត់ចត់
ប្រមូលវត្ថុតាងនៅកន្លែងកើតហេតុ និងបានកសាងសំណុំរឿង បញ្ជូនទៅសាលាដំបូងខេត្តស្វាយរៀងរួចហើយ ដើម្បីចាត់ការទៅតាមផ្លូវច្បាប់។
លោកឧបនាយករដ្ឋមន្ត្រី
ស ខេង បានឆ្លើយតបក្នុងលិខិតនោះថា ការហូតងារមន្ត្រីរាជការស៊ីវិល
ត្រូវផ្អែកលើច្បាប់ ស្តីពី សហលក្ខន្តិកៈមន្ត្រីរាជការស៊ីវិល
នៃព្រះរាជាណាចក្រកម្ពុជា ដែលប្រកាសឲ្យប្រើប្រាស់ ដោយព្រះរាជក្រមលេខ
០៦ ន.ស.៩៤ ចុះថ្ងៃទី៣០ ខែតុលា ឆ្នាំ១៩៩៤ ជំពូកទី៦ ស្តីពី
ការចោទប្រកាន់តាមផ្លូវតុលាការ ត្រង់មាត្រា ៥៣ ចែងថា
“ការផ្តន្ទាទោសជាបទឧក្រិដ្ឋ ឬជាបទមជ្ឈឹម ដោយឥតព្យួរទោស
បណ្តាលឲ្យហូតងារមន្ត្រីរាជការនោះ
គិតពីថ្ងៃសាលក្រមចូលជាស្ថាពរ”។
លិខិតរបស់លោកឧបនាយករដ្ឋមន្ត្រី ស ខេង ខាងលើនេះ ត្រូវបានសមាគមគ្រូបង្រៀនរបស់លោក រ៉ុង ឈុន ផ្សព្វផ្សាយដល់អ្នកកាសែត នៅរសៀលថ្ងៃទី១២ ខែមីនា ឆ្នាំ២០១២។
ក្រុមសង្គមស៊ីវិល បានទាមទារឲ្យមានការដកតំណែង និងផ្តន្ទាទោសអាជ្ញាធរសមត្ថកិច្ច ពិសេសអតីតអភិបាលក្រុងបាវិត លោក ឈូក បណ្ឌិត និងចាប់ទៅផ្តន្ទាទោសតាមច្បាប់ ដោយសារតែលោកឈូក
បណ្ឌិត ជាជនសង្ស័យតែម្នាក់គត់
ក្នុងរឿងបាញ់ស្ត្រីកម្មកររោងចក្រកាត់ដេរ ៣ នាក់ ឲ្យរបួសធ្ងន់
ក្នុងព្រឹត្តិការណ៍តវ៉ា កាលពីថ្ងៃទី២០ ខែកុម្ភៈ ឆ្នាំ២០១២។
ក្នុងសំណុំរឿងនេះ តុលាការខេត្តស្វាយរៀង បានចេញដីកាកោះហៅលោកឈូក បណ្ឌិត ឲ្យចូលឆ្លើយបំភ្លឺ នៅថ្ងៃទី១៦ ខែមីនា ឆ្នាំ២០១២។ លោក ឈូក បណ្ឌិត កាលពីថ្ងៃទី៩ ខែមីនា ឆ្នាំ២០១២ ត្រូវបានដកតំណែងពីអភិបាលក្រុងបាវិត ឲ្យទៅបម្រើការនៅសាលាខេត្តស្វាយរៀង៕
0 comments:
Post a Comment