ប្រជាកសិករមួយចំនួនរស់នៅខេត្តកំពត និងខេត្តតាកែវ កំពុងព្រួយបារម្ភលើបញ្ហាខ្វះស្បៀងសម្រាប់ផ្គត់ផ្គង់ជីវភាពប្រចាំថ្ងៃនៅឆ្នាំក្រោយ។ ក្តីព្រួយបារម្ភនេះបានកើតឡើងបន្ទាប់ពីពួកគាត់មិនមានទឹកធ្វើស្រែនៅរដូវវស្សាឆ្នាំ២០១២ នេះ។
ស្ត្រីវ័យចំណាស់ឈ្មោះ ជុំ សុបិន ជាកសិកររស់នៅឃុំនារាយណ៍ ស្រុកឈូក ខេត្តកំពត មានប្រសាសន៍នៅថ្ងៃទី១៣ ខែសីហា ថា គ្រួសារគាត់កំពុងព្រួយបារម្ភខ្វះស្បៀងផ្គត់ផ្គង់គ្រួសារឆ្នាំក្រោយ ព្រោះថា មកដល់ខែសីហា ទៅហើយមិនទាន់បានស្ទូងដកបានមួយអំពកណាទេ។
កសិកររូបនេះឲ្យដឹងថា មូលហេតុនាំឲ្យកសិករក្នុងមូលដ្ឋានមិនទាន់បានបង្កបង្កើនផលស្រូវរដូវវស្សាឆ្នាំនេះ ដោយសារដីធ្វើកសិកម្មស្ងួតហួតហែងគ្មានទឹក៖ «ដីស្ងួតហួតហែង អ្នកសាបគោកមុនៗសំណាបងាប់អស់ហើយ។ សាបលុបដីឥឡូវឆួលអត់ភ្លៀងងាប់អស់ហើយ។ ដូចអត់សង្ឃឹមទេ មេឃអត់អំណោយផល មេឃខ្ពស់ណាស់»។
ស្ត្រីជាកសិករមានកូន ១១នាក់ ក្នុងបន្ទុករូបនេះ សម្ដែងភ័យព្រួយថា បើគ្រោះរាំងស្ងួតបន្តអូសបន្លាយយូរថ្ងៃទៀតនោះ គ្រួសារគាត់ទំនងជាប្រឈមបញ្ហាខ្វះស្បៀងសម្រាប់ផ្គត់ផ្គង់គ្រួសារនៅឆ្នាំក្រោយមិនខាន។
អ្នកស្រីបន្តថា កង្វល់ខ្វះស្បៀង ឬបញ្ហាខ្វះទឹកធ្វើស្រែនេះ គ្រួសារគាត់មិនដឹងជាទៅពឹងស្ថាប័នផ្នែកណាមួយឲ្យជួយដល់ពលរដ្ឋបានទឹកធ្វើស្រែនោះទេ ព្រោះក្នុងមូលដ្ឋានឃុំនារាយណ៍ ស្រុកឈូក មិនមានប្រភពទឹកច្រើនទេ។
មិនខុសគ្នាក្ដីព្រួយបារម្ភរបស់កសិកររស់នៅស្រុកឈូក ខេត្តកំពត ទេ សម្រាប់ប្រជាកសិកររស់នៅស្រុកត្រាំកក់ ខេត្តតាកែវ ក៏មានកង្វល់លើបញ្ហាខ្វះស្បៀងផ្គត់ផ្គង់គ្រួសារឆ្នាំក្រោយនេះដែរ។
អ្នកស្រី សំបូរ ជាកសិកររស់នៅឃុំត្រពាំងកែស ស្រុកត្រាំកក់ ខេត្តតាកែវ។ អ្នកស្រីឲ្យដឹងថា សំណាបដែលគ្រួសារគាត់ និងកសិករផ្សេងទៀតបានសាបព្រោះក្នុងថ្នាលបានស្វិតអស់ ព្រោះគ្មានទឹក ឬក៏គ្មានភ្លៀងធ្លាក់ ចាប់ពីខែកក្កដា រហូតមកដល់ខែសីហានេះ។
ស្ត្រីមេម៉ាយរូបនេះព្រួយបារម្ភថា បញ្ហាខ្វះស្បៀងមិនអាចជៀសផុតទេ ប្រសិនគ្រោះរាំងស្ងួត ឬមិនមានភ្លៀងធ្លាក់បន្តអូសបន្លាយពេលយូរទៀតនោះ៖ «ពិបាកដល់ខែនេះមេឃអត់ភ្លៀងយើងអ្នកធ្វើស្រែ ដល់រាំងពេលរាំងក៏ភ័យ សំណាបទើបសាបបាន ២ថ្នាល។ ភ្លៀងតាំងថ្ងៃពេញបូណ៌មីបាន ១មេ រួចប្រវេប្រវាសាបដល់ពេលឥឡូវហ្នឹងសាបហើយស្ងួត ព្រោះភ្លៀងអត់ដែលភ្លៀងទៀតទេ»។
ទាក់ទងការព្រួយបារម្ភខ្វះស្បៀងនេះ កាលពីថ្ងៃពុធ ទី៨ ខែសីហា ឆ្នាំ២០១២ លោកនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលមិនទុកឲ្យពលរដ្ឋណាម្នាក់ស្លាប់ដោយអត់បាយ ឬខ្វះស្បៀងអាហារនោះទេ។
ស្របពេលនេះដែរ លោកនាយករដ្ឋមន្ត្រីឲ្យដឹងថា រដូវវស្សាឆ្នាំ២០១២ នេះ កសិករខ្មែរបានបង្កបង្កើនផលស្រូវរដូវវស្សា បានប្រមាណ ៧០ភាគរយហើយនៅទូទាំងប្រទេស។
លោក ហ៊ុន សែន សង្កត់ធ្ងន់ដូច្នេះ៖ «មិនត្រូវទុកឲ្យប្រជាជនណាម្នាក់ស្លាប់ដោយអត់បាយ ហើយយើងមិនបានដោះស្រាយនោះទេ»។
ទោះយ៉ាងណា ប្រជាកសិករមួយចំនួនរស់នៅខេត្តកំពត និងខេត្តតាកែវ ពួកគាត់បានត្អូញត្អែរថា មិនទាន់បានបង្កបង្កើន ឬដកស្ទូងស្រូវរដូវវស្សានោះទេ ព្រោះគ្មានទឹកភ្លៀង។
ប្រទេសកម្ពុជា មានប្រជាពលរដ្ឋសរុបប្រមាណ ១៤លាននាក់ ក្នុងនោះមានប្រជាពលរដ្ឋចំនួន ៨០ភាគរយ ជាកសិករប្រកបរបរកសិកម្មធ្វើស្រែចម្ការ។ ការធ្វើរបរកសិកម្មរបស់កសិករខ្មែរភាគច្រើន គឺពឹងផ្អែកទៅលើទឹកភ្លៀងពីធម្មជាតិ ដោយមិនមានប្រព័ន្ធធារាសាស្ត្រ ឬប្រភពទឹកជួយស្រោចស្រពទេ៕
